2 Tessalonisense

2 Tessalonisense is die 14de boek in die Nuwe Testament van die Bybel. Hierdie boek, ook 'n brief aan die Tessalonisense, is enkele maande na die eerste brief geskryf. Die misverstande oor die wederkoms van die Here het die gelowiges in Tessalonika nog steeds verwar. Hulle het die wederkoms in hulle eie leeftyd verwag en daar is selfs beweer dat die Here reeds gekom het. In hierdie brief word daarop gewys dat die wettelose mens wat hom teen God sal verset en sal voorgee dat hy self God is, eers moet verskyn. Hy sal die goddeloosheid in die wêreld tot 'n hoogtepunt voer voordat die wederkoms daar is. Daarom moet die gelowiges standvastig bly, voortgaan met hulle werk en nie moeg word om goed te doen nie.

Bron

• Die Bybel: Nuwe vertaling (Bybelgenootskap van Suid-Afrika)