Aglona
Aglona | |
|---|---|
 Die basiliek van Aglona | |
  Aglona | |
| Koördinate: 56°08′N 27°01′O / 56.133°N 27.017°O | |
| Land |  Letland |
| Historiese landskap | Letgallen |
| Streek | Aglonas novads |
| Hoogte | 145 m (476 ft) |
| Bevolking | |
| • Totaal | 964 |
| Tydsone | UTC+2 (OET) |
| • Somertyd | UTC+3 (OEST) |
| Webwerf | Aglona |
Aglona (Duits: Aglohn) is die administratiewe setel van die gelyknamige munisipaliteit (Aglonas novads) in die historiese gewes Letgallen, Letland. Die dorp is op 'n smal landstrook tussen die Cirišs- en Egles-mere sowat 40 kilometer noord-oos van Daugavpils naby die grens met Rusland geleë en het met die samesmelting van Aglona met twee ander nedersettings, Somerseta en Jaunciems, ontstaan.
Aglona is 'n beduidende Rooms-Katolieke bedevaartsoord en staan veral bekend vir sy basiliek. Jaarliks vergader meer as 50 000 gelowiges uit Letland en aangrensende Oos-Europese lande om hier die kerklike feesdag Maria Hemelvaart (15 Augustus) met misse en plegtige prosessies te vier.
Geskiedenis
[wysig | wysig bron]Die ontwikkeling van Aglona tot 'n beduidende Rooms-Katolieke sentrum het omstreeks 1700 begin toe die welvarende Szostowicky-familie 'n deel van hulle besittings aan die Dominikane-orde geskenk het. Die orde het 'n klooster en 'n houtkerk in die dorp laat bou, teen die einde van die 18de eeu het die basiliek in die Barokstyl en binneversierings met Grimaille-skilderye in die Rokoko-styl ontstaan waar ook die genadebeeld "Onse Liewe Vrou van Aglona" bewaar en vertoon word. Sedertdien dien die kerkheuwel van Aglona as die geestelike sentrum van Letland se Rooms-Katolieke minderheid. Aan die fontein naby die kerk word genesende kragte toegeskryf.
Ter geleentheid van die kerk se 200-jaarviering in 1980 het pous Johannes Paulus II die amptelike status van basiliek aan die sakrale gebou verleen. In die 1990's het omvattende herstelwerk en renovasie plaasgevind, veral met die oog op pous Johannes Paul II se besoek in 1992 wat 300 000 pelgrims uit Letland en die buurlande na Aglona gelok het.
Besienswaardighede
[wysig | wysig bron]Die basiliek
[wysig | wysig bron]
Die spierwit basiliek van Aglona staan te midde van 'n groot omheinde plein. Opvallend by die kerk in die laat Barok-styl is die twee kloktorings met 'n hoogte van 60 meter en oop klokkestoele. Die kerkfasade se regte lyne en die pastelkleurige versierings in die binneruimte dui op vroeë Klassisistiese invloede.[1]
Die basiliek se waardevolste skat kan bo-oor die altaar besigtig word: aan die ikoon van die Moeder van God van Aglona word wonderlike kragte toegeskryf. Die skepper en herkoms van die 17de eeuse skildery is onbekend. Kunskenners wys daarop dat 'n byna identieke kunswerk reeds in die 14de eeuse Litaue ontstaan het en tans in Trakai bewaar word. Dit is tans nie duidelik of die Litause ikoon as voorbeeld vir die skildery van Aglona gedien het nie.
Die plaaslike ikoon word gewoonlik met 'n ander kunswerk bedek en net op kerklike feesdae aan die publiek vertoon.
Die steengebou met twee verdiepings naas die basiliek het vroeër die biblioteek en skool van die Dominikane-klooster gehuisves totdat dit in 1880 gesluit is. Die gebou dien deesdae onder meer as gastehuis.
Omgewing van Aglona
[wysig | wysig bron]Die natuurskoon van Aglona se omgewing lok talle besoekers, en jaarliks spandeer ook baie gesinne uit Rusland hul somervakansie in die gebied. Die nabygeleë Slagoffer-eiland (Lets: Upursala), die Duiwelsmeer (Lets Velnezers) en die kasteel Madelan (Madelāņu pilskalns) is gewilde toeristebestemmings.
Die dennebosse rondom Aglona is grotendeels afgekap sodat die oorspronklike natuurskoon in die gebied intussen aan aantreklikheid ingeboet het.
Verwysings
[wysig | wysig bron]- ↑ Jochen Könnecke: Lettland. Ostfildern: DuMont 2009, bl. 237
Eksterne skakels
[wysig | wysig bron] |
Wikimedia Commons bevat media in verband met Aglona. |
- (en) Amptelike webwerf Geargiveer 7 November 2018 op Wayback Machine
- (en) Die basiliek van Aglona
- (en) Gedetaillerde beskrywing van Aglona Geargiveer 4 September 2006 op Wayback Machine