Alexander van Griekeland

Alexander
Koning van die Hellene

Periode 11 Junie 1917 – 25 Oktober 1920
Voorganger Konstantyn I
Opvolger Konstantyn I
Huis Sleeswyk-Holstein-Sonderburg-Glücksburg
Vrou Aspasia Manos
Kinders Prinses Alexandra van Griekeland
Vader Konstantyn I
Moeder Prinses Sophie van Pruise
Gebore 1 Augustus 1893, Athene
Oorlede 25 Oktober 1920, Athene
Sien Alexander die Grote vir ’n artikel oor die antieke koning met dieselfde naam.

Alexander (Grieks: Ἀλέξανδρος, Βασιλεὺς τῶν Ἑλλήνων, Aléxandros, Vasiléfs ton Ellínon; 1 Augustus 1893 – 25 Oktober 1920) was van 1917 tot 1920 koning van die Hellene (Griekeland).

Vroeë lewe en bewind

[wysig | wysig bron]

Hy is op 1 Augustus 1893 in Tatoi naby Athene gebore as die tweede oudste seun van koning Konstantyn I en prinses Sophie van Pruise. Nadat Konstantyn en sy oudste seun, kroonprins George, gedwing is om die land te verlaat weens Konstantyn se steun aan Duitsland tydens die Eerste Wêreldoorlog, het Alexander koning geword. Hy het egter in werklikheid geen mag gehad nie en was net ’n marionet in die hande van die eerste minister, Eleftherios Venízelos.

In een belangrike saak het hy teen die wil van die eerste minister opgetree: Op 4 November 1919 het hy skelm getrou met Aspasia Manos, ’n gewone burgerlike en die dogter van kol. Petros Manos. Dit was ’n groot skandaal en Venizelos was woedend. Aspasia moes uit Athene vlug tot die krisis opgelos is en die huwelik wettig verklaar is. Sy was egter nooit koningin nie en slegs bekend as "Madame Manos". Die egpaar het Parys ses maande later besoek op voorwaarde dat hulle nie saam reis of saam by amptelike geleenthede opdaag nie.[1]

Dood

[wysig | wysig bron]

Alexander is op 27 jaar dood nadat ape sy hond op 2 Oktober 1920 tydens ’n wandeling aangeval het. Hy het die hond verdedig en is self gebyt.[2] Hy het infeksie opgedoen en binne dae ’n hewige reaksie ontwikkel. Op 12 Oktober het hy ernstig siek geword[3] en op 25 Oktober is hy in Athene dood.[4] Sy pa, Konstantyn, is gevra om terug te keer as koning.

Interessante feite

[wysig | wysig bron]
  • Alexander se enigste kind, wat ná sy dood gebore is, was prinses Alexandra van Griekeland, wat later met Pieter II, koning van Joego-Slawië, getrou het. Konstantyn het haar ma, Madame Manos, die titel "prinses Alexander" gegee.[5]
  • Die stad Alexandroupolis (voorheen Dedeagatch) op die Grieks-Turkse grens is in 1920 na hom hernoem toe hy dit besoek het. Hy was die eerste Griekse koning wat die stad besoek het nadat die Griekse leër dit tydens die Eerste Wêreldoorlog verower het.
  • Alexander was ’n ongewone monarg omdat hy koning geword het hoewel sy oudste broer, George, steeds gelewe het. Boonop sou George later self koning van Griekeland word in ’n ongewone geval waar ’n ouer broer ’n jonger een opvolg (hoewel nie direk in dié geval nie).

Verwysings

[wysig | wysig bron]
Hierdie artikel is merendeels vertaal vanaf die Engelse Wikipedia-artikel en:Alexander I of Greece
  1. ↑ John Van der Kiste, Kings of the Hellenes (Alan Sutton Publishing, Stroud, Gloucestershire, Engeland, 1994) ISBN 0-7509-0525-5 p. 119
  2. ↑ "King of Greece Dies/ Monkey Bites Inflicted Oct. 2 Fatal to Alexander" Daily Herald (Chicago), 21 Oktober 1920, p.2
  3. ↑ "King Bitten By Monkey Has New Shivering Fit" Syracuse Herald, 13 Oktober 1920, p.1
  4. ↑ Van der Kiste, p.122
  5. ↑ Van der Kiste, p. 132
  • Hindley, Geoffrey (2000). The Royal Families of Europe. New York: Caroll & Graf. ISBN 0-7867-0828-X.
  • "Alexander (Greece)". Encyclopedia Britannica (15). (1990).