Alice (Resident Evil)

Alice
Skepping
Eerste verskyning	Resident Evil (2002)
Geskep deur	Paul W. S. Anderson
Uitgebeeld deur	Milla Jovovich
Inligting
Ander name	Janus Prospero
Byname	Alice
Spesie	Mens
Geslag	Vroulik
Beroep	Voormalige sekerheidspesialis Geheime operatiewe by Umbrella Korporasie Anti-Umbrella aktivis
Getroud met	Spence Parks (vals man)
Nasionaliteit	Verenigde State

Alice is 'n denkbeeldige personage en heldin uit die Resident Evil (Bose Bewoner) rolprentreeks, soos dit op die Resident Evil videospeletjie gegrond is. Hoewel sy nie as 'n speelbare karakter in die speletjies voorkom nie, tree sy uiteindelik met 'n aantal ander karakters uit dieselfde speletjies in wisselwerking, soos Jill Valentine, Carlos Oliveira, Claire Redfield en Nemesis. Alice voer die hoofrol in al die flieks, waar die intrige meestal om haar stryd teen die Umbrella Korporasie, haar vorige werknemer, draai. Sy word in die eerste Resident Evil-fliek as 'n persoon wat aan tydelike geheueverlies ly uitgebeeld. In Resident Evil: Apocalypse word haar karakter as 'n taai, stoere individu beskryf, omrede sy vertroud is met haar omringende omstandighede; Alice speel 'n soortgelyke rol in Resident Evil: Extinction. Sy word, afgesien van die rolprente, ook in hul romanverwerkings aangetref, waar haar agtergrond beter uiteengesit word. Hierdie inligting wat in die romans en rolprente voorkom, word nie so eg as dié in die videospeletjies beskou nie. In al die drie rolprente vertolk Milla Jovovich die rol van Alice, waar laasgenoemde ook as Alice Abernathy, Janus Prospero en Alice Parks, bekend staan. Die Umbrella Korporasie, daarenteen, verkies om na haar te verwys as Projek Alice of Program Alice.

Resident Evil

Alice word in Resident Evil as 'n sekerheidsbeampte van Umbrella Korporasie voorgestel. Sy gee onder die dekmantel voor om met Spence Parks getroud te wees, en bewoon 'n herehuis buitekant Raccoon City (Wasbeerstad). Hierdie woning dien as die ingangsportaal na The Hive (Die Korf), 'n groot, hoogs vertroulike, ondergrondse bedienende laboratorium, wat deur Umbrella besit en bedryf word en sowat 805 meter ter aarde bestel is.

Toe Alice na 'n voorval weer bykom, ly sy aan geheueverlies en kan niks van bogenoemde inligting herroep nie. Sy sluit by Matt Addison, 'n omgewingsbewaarder wat hom as polisiebeampte voordoen, en 'n kommando aan, wat saam Die Korf aandurf. Hierdie poging word aangewend om uit te vind waarom die kunsmatige intelligensie-rekenaar, genaamd die Red Queen, al die werknemers gedood het.

Spence word gevind en ly, net soos Alice, ook aan geheueverlies, wat bevind word veroorsaak is toe 'n senugas, as voorsorgmaatreël, deur die Red Queen binne die herehuis vrygestel is om te verhoed dat die virusuitbreking verder versprei. Dit word later onthul dat Alice, as betrokke werknemer, bereidwillig was om Umbrella se lewensgevaarlike en onwettige proewe aan die kaak te stel, in 'n poging om die maatskappy se ondergang te bewerkstellig. Daar word ook getoon dat Alice kop in een mus was met Matt se suster, Lisa Addison, wie probeer het om 'n monster van die T-virus uit die laboratorium te smokkel. Alice deel Matt hiervan mee. Teen die einde van die rolprent word daar vertoon hoe Spence, wie werklik aangetrokke tot Alice in hul man-en-vrou-toneelspel begin voel het, van haar planne te hore gekom het. Spence het Alice se voorneme om Umbrella te sink verkeerd verstaan; gevolglik was hý die één wat die T-Virus monsters gesteel het, met die bedoelinge om dit op die sluikhandel te verkwansel, sodat beide van hulle daardeur voordeel kan trek. Dit was ook Spence gewees wat die virus in Die Korf vrygestel het om hul spore uit te wis.

Alice weier volstrek om by sy planne in te val. Hy rig sy geweer op haar, Rain, Matt en Kaplan, dreig en sluit hulle in die laboratorium toe en loop na die trein waar die teenvirus gehuisves word. Sodra Spence op die trein klim word hy deur 'n licker aangeval, en toe hy as 'n zombie weeropgewek word, maak Alice hom dood. Kaplan se lewe word ook later kortgeknip toe 'n licker hom oorval. Hoewel Rain met die teenvirus ingeënt is, verander sy nogtans in 'n lewende lyk en noodsaak Matt om ‘haar’ van kant te maak. Alice en Matt is die enigste oorlewendes wat uit Die Korf ontsnap. Met die terugkeer na die herehuis word beide deur Umbrella-wetenskaplikes oorrompel en onder kwarantyn in die Raccoon City Hospitaal geplaas.

'n Effens verswakte Alice kom in 'n afgesonderde wit kamer op 'n operasietafel by, ruk 'n aantal diepingedrukte elektrodes stadig uit haar liggaam en kortsluit 'n elektroniesbeheerde deur met een oop. Soos in die begin van die rolprent dra sy geen kennis wat haar oorgekom het nie. Alice kies koers na buitekant die hospitaal, en bemerk dat Raccoon City deur die T-Virus-besmetting in verwoesting gesaai is.

Resident Evil: Apocalypse

Alice ontdek dat sy weens blootstelling aan die T-Virus meer geneties aangepas is, deurdat menslike sintuie en verbeterde vlugheid saamgesmelt word. Met die ontruiming van Raccoon City word sy deur die Umbrella-werksame Majoor Timothy Cain vrygelaat om hul nuutste biologiese oorlogswapen, Nemesis, te beveg.

Alice sluit by 'n groep langslewendes aan wat deur die S.T.A.R.S.-offisier, Jill Valentine, gelei word. Hulle bereik 'n ooreenkoms met die Umbrella-wetenskaplike, dokter Charles Ashford, om sy dogter, Angela Ashford, op te spoor en te red, in ruil daarvoor om 'n veilige weg uit die stad te kry, omrede 'n atoombom, teen sonop, die stad met die grond sal gelyk maak. Alice kry vir Angela en stap saam met die U.B.C.S.-soldaat, Carlos Oliveira en burger, L.J.

Hulle haas om by die stadsaal, vir die finale ontruiming, uit te kom, maar Ashford se plan word deur Majoor Cain gekortwiek, en die hele groep word aangekeer. Hy dwing Alice om met Nemesis te baklei, en hulle raak in 'n geveg betrokke, waar Alice as die oorwinnaar uit die stryd tree. Voordat sy die doodskoot toedien, herken sy Nemesis as die vroeëre Matt Addison en weier om hom om die lewe te bring.

Hierteenoor beveel Majoor Cain vir Nemesis om Alice vir altyd uit die weg te ruim, maar in plaas daarvan verleen Nemesis bystand om haar groep te help ontsnap. Nemesis sterf terwyl hy vir Alice beskerm. Die kernontploffing veroorsaak dat Alice deur 'n losvlieënde paal in die hefskroefvliegtuig deurboor word; wat Angela se lewe red. Die helikopter stort daarna weens die skokgolf op die Arkley-bergreeks neer. 'n Umbrella-taakspan, wat deur dokter Isaacs ontplooi is, haal Alice uit die helikopterwrak vir nadere proefnemings.

Alice is drie weke later ten volle herstel, word van haar skyndood ontslaan en, deur van haar nuutgevonde telekinetiese kragte in te span, loop sy ongedeerd uit die inrigting. Sy kom later te staan voor 'n troep gewapende wagte, maar word deur Jill, L.J. en Carlos (vergesel deur Angela) wat hulself as Umbrella-agente voordoen, weggelei. Met hul vertrek beveel Isaacs die sekerheidsbeamptes om die voortvlugtendes met rus te laat. Soos Alice-hulle wegtrek, gee Isaacs die opdrag om Program Alice in werking te stel. Umbrella se naambeeld flikker in Alice se oë, en die fliek eindig.

Tussen RE: Apocalypse en die begin van RE: Extinction het 'n aantal ongesiene gebeurtenisse plaasgevind wat slegs deur die derde rolprent vlugtig van melding gemaak word. Alice, wat deur dokter Isaacs beheer is, vermoor Angela en moet van haar bondgenote, om hul eie veiligheidsonthalwe, afsonder. L.J. en Carlos sluit kort daarna by Clair Redfield se konvooi aan, en, terwyl hulle oorlewendes langs die pad oplaai, soek hul ook na 'n veilige toevlugsoord om deur te bring.

Resident Evil: Extinction

Die oorgrote meerderheid van die wêreld het, in Resident Evil: Extinction, onder die T-Virus beswyk en Alice word van haar groepslede geskei. Sy bly gedurig op die trekpad om Umbrella se satelliete te ontwyk, nadat sy daarvan te wete kom dat Umbrella haar daardeur kan opspoor, en maak van die satellietspoorbane gebruik om die stelsel te ontglip.

Op haar reistog kry sy 'n inligtingstuk wat die moontlikheid noem dat Alaska, wat van die res van die T-virus-besmette wêreld afgesny is, as veilige hawe kan dien. Umbrella het egter hierdie keer 'n nuwe, meer gevorderde kunsmatige intelligensie rekenaar, die White Queen, tot hul beskikking, wat heeltemal in staat is om Alice te kan opspoor. Alice maak aan die begin van die rolprent van haar telekinese gebruik om Claire Redfield se konvooi te red.

'n Geweldige hoeveelheid psioniese bedrywigheid word hierdeur afgegee, wat Alice se ligging aan die White Queen verklap, en Isaacs hierdeur verwittig. Die leiers van die konvooi besluit om hul reis noordwaarts na Alaska voort te sit, maar moet eers by Las Vegas aandoen om brandstof in te gooi. Dokter Isaacs verontagsaam die Umbrella-hoofbaas, Albert Wesker, se opdragte en sit Alice agterna.

Tydens 'n veldslag tussen die zombies en oorlewendes probeer Isaacs om Alice af te skakel – die Umbrella-logo flits in haar oë en strem haar oombliklik ter plaatse. Alice oormeester dit deur middel van haar parapsigologiese kragte, wat veroorsaak dat die satelliet se verwerkingseenheidskyfie uitbrand. Nou is dit Alice se beurt om Isaacs te vervolg. Hoewel hy ontsnap, moet Isaacs eers 'n gevorderde zombie se byt, wat hy in die begin van die rolprent uit Alice-klone se bloedmonsters probeer kweek het, ontgeld.

Die oorblywendes kies koers na die Umbrella-basis; die pasbesmette Carlos kus vlugtig vir Alice voordat hy 'n weg deur 'n horde zombies baan met 'n olievragmotor wat met dinamiet volgelaai is. Die konvooi gee per helikopter pad, met Alice wat alleen agterbly. Sy ontmoet die White Queen, wat haar inlig dat die geneesmiddel vir die T-Virus in Alice se bloed te vinde is, asook dat sy Isaacs moet uitwis. Alice agtervolg Isaacs tot in die kelderverdiepings, waar sy haar eie kloon gewaar, voordat dokter Isaacs, wat ondertussen in 'n monster (Tyrant) ontaard het, haar aanval. Die kloon ontwaak, maar sterf oënskynlik kort daarna. Alice bly op Isaacs se hakke, en bevind haar kort voor lank in 'n namaaksel van die oorspronklike herehuis uit die eerste rolprent. Die twee raak in 'n hewige stryd betrokke, waar albei van hul eie telekinese gebruik maak, en beland in die laserkamer, wat óók 'n replika uit die eerste fliek is. Die laserstrale kerf Isaacs aan flenters. Net voordat Alice dieselfde lot begroet, verdwyn die strale oombliklik – haar kloon het dit afgeskakel.

'n Rukkie later onderbreek Alice, deur holografiese tegnologie, 'n vergadering tussen Wesker en ander Umbrella-bestuurders. Alice waarsku die bestuurslui dat sy na hulle op pad is en “`n paar vriende” met haar gaan saambring. Sodra sy langs haar kloon staan, kyk hulle oor 'n kamer uit wat stampvol honderde ander klone is. Soos die klone begin wakker word, eindig die rolprent.

Resident Evil: Afterlife

Milla Jovovich vertolk weereens Alice in die vierde hoofstuk van die Resident Evil-rolprentreeks. Alice en haar klone beveg Albert Wesker in die aanvang van die fliek. Hy spuit Alice met ’n entstof in wat haar aansienlik van haar bomenslike kragte, wat telekinesis insluit, beroof. Alice bedank hom hiervoor, omrede sy nou weer ten volle mens is. Sy ontsnap uit die Tokio-laboratorium deur op ’n helikopter weg te kruip, met Wesker as passasier, nadat voorsitter Wesker ’n bom in werking stel wat die gebou en al die klone vernietig (laasgenoemde gesigspunt word weens die getalverskil tussen die derde en vierde rolprent onder fliekvlooie beredeneer). Skaars nadat sy nouliks haar dood vrygespring het, ’n gebeurtenis wat moontlik mag dui op sekere vermoëns wat behoue gebly het of nuwes wat geskep is uit die teengif, soos toe sy deur die lug gevlieg het na ’n toringspits toe, sowel as die weerstand teen die ontploffing wat geen mens kon oorleef nie, vlieg sy na Alaska toe. Sy kom op ’n verlate Umbrella-helikopter af, sowel as die boek wat sy vir K-Mart in Resident Evil: Extinction gegee het. Sy vind Claire Redfield voosgeslaan binne die woud, onderworpe aan ’n denkbeheerstoestel wat aan haar geheg is. Alice vernietig die toestel en bevind dat Claire haar geheue kwyt is. Hulle vlieg saam na die Los Angeles Gevangenis en kom op Claire se broer, Chris Redfield, af, asook die ander oorlewendes, by name Bennent, Kim Yong, Crystal en Luther West. Hulle probeer uit die tronk kom om Albert Wesker in sy spore te stuit, maar kom kort voor lank te staan voor die Axe Man, ’n laksman-Majini wat uit die videospeletjie, Resident Evil 5, afkomstig is. Alice word bewusteloos geslaan; Claire slaag daarin om die laksman kortliks katswink te slaan. Hy kry weer vastrapplek en werp sy swaar, tamaai groot hamerbyl na hul al twee, met Alice wat enkele sekondes tevore bygekom het. Met die hamerbyl wat skadeloos oor hul koppe vlie, draai Alice om en skiet ’n swaarkaliberkoeël in die laksman die kop, wat veroorsaak dat dit ontplof.

Tydens die ontsnapping word Luther West oorval en moontlik deur ’n zombie doodgemaak. Alice reis saam met Chris en Claire Redfield om finaal met Albert Wesker af te reken. Sy toon die psigiese vermoë om voorwerpe se toekoms te voorspel, daar sy met die aanraak van ’n huls die lot van die laaste insittende daarvan kan sien. Gedurende die laaste aanval op Wesker word Alice, Claire en Chris deur sy kragte oorweldig en verslaan. Alice, met behulp van K-Mart, oorwin egter vir Wesker, deur hom ’n kopskoot toe te dien en oënskynlik te laat sterf. Maar selfs met ’n oopgeskiete kop oorleef Wesker die aanval en Chris en Claire skiet hul pistole op hom leeg. Hy herstel nietemin geheel en al van sy wonde, ontsnap per helikopter en aktiveer ’n bom. Alice het egter die bom alreeds op Wesker se helikopter geplaas, maar met die afgaan is ’n valskerm in die lug opmerkbaar, moontlik dié van Wesker. Nadat al die oorlewendes op die Arcadia vrygelaat is, besluit Alice om dit in ’n toevlugsoord te omskep en saai die skip se ligging en skuilplekstatus oor die lug uit, voordat sy ’n eskader Umbrella-helikopters stampvol soldate opmerk. Dit kom toe vorendag dat die eskader onder leiding van haar voormalige kamerade, Jill Valentine, gestuur word, wie se gedrag nou deur die Umbrella-denkbeheertoestel beïnvloed word.

Wapens

Die dubbel kukri-messtel wat Alice in RE: Extinction gebruik, kan as 'n bronverwysing van RE: Apocalypse dien, waar sy twee knuppels teen die Umbrella-wagte benut. Hierdie kukri-beeld is op vele reklame- en fliekplakkate gebruik. Die kukrimes-rekwisiete bestaan elk uit 'n aluminiumlem met 'n houthandvatsel en is sowat 49,5 cm lank. Volgens die roman het sy hierdie stel van die aasvreters en zombie-honde, wat sy afgemaai het, afgeneem. Sy maak ook van 'n verskeidenheid outomatiese wapens gebruik, soos masjiengewere, pistole en, natuurlik, die beslissende zombie-moordwapen – die haelgeweer. Dit wil voorkom of Alice die 1911-tipe .45ACP pistole, sowel as 'n Mossberg 500 met 'n pistoolhandvatsel, wat sy in beide die tweede en derde rolprent gebruik, verkies.

Eksterne skakels

• Alice se Profiel Geargiveer 13 Januarie 2008 op Wayback Machine by IGN.com
• Alice op die Resident Evil wiki

Hierdie artikel is in sy geheel of gedeeltelik vanuit die Engelse Wikipedia vertaal.