Allgemeine Zeitung (Namibië)
_seit_14.1.2013.jpg){kind=small}
Allgemeine Zeitung
Windhoek
Namibië
Opgerig
22 Julie 1916 as Der Kriegsbote
Hoofredakteur
Frank Steffen
Publikasie
Maandag tot Vrydag
Sirkulasie
5 000
Uitgewery
Namibia Media Holdings (NMH)
Webtuiste
Allgemeine Zeitung
Die Allgemeine Zeitung (letterlik in Afrikaans "Algemene Koerant", kort AZ) word reeds sedert 1916 as die oudste dagblad in Namibië en as die enigste Duitsmedium-koerant in Afrika gepubliseer. Die AZ verskyn vyf keer per week (Maandag tot Vrydag) met 'n daaglikse drukoplaag van 5 000 wat by intekenaars se huise afgelewer of op straat en in winkels verkoop word.[1][2]
Die AZ se uitgawes, wat tussen Maandag en Donderdag verskyn, beslaan 'n gemiddeld van tussen 12 en 16 bladsye, die groter Vrydag-uitgawe tot 32 bladsye. Tot en met Maart 2013 het die AZ op elke eerste Donderdag van die maand 'n toerismebylae, Tourismus Namibia, met 'n sirkulasie van sowat 10 000 saamgestel. In Maart 2013 is omgeskakel na 'n drietalige bylae in Duits, Afrikaans en Engels wat in samewerking met twee ander Namibiese dagblaaie, Die Republikein (Afrikaansmedium) en Namibian Sun (Engelsmedium) op die eerste Dinsdag van die maand met 'n sirkulasie van 50 000 uitgegee word.
Die AZ dek die hele nuusspektrum, van politieke gebeure tot ekonomiese sake en van sport tot kulturele gebeure. Die hooffokus van die verslaggewing is nuus oor gebeure in Namibië, naas nuusberigte uit Suider-Afrika en die res van die wêreld. As liberaal-behoudende Duitsmedium-dagblad is die AZ veral gemik op Namibië se Duitssprekende bevolking van sowat 15 000, maar daar word ook enkele honderd eksemplare na Duitssprekende huishoudings in Suid-Afrika en oorsee versprei. Die AZ se 10 redaksielede en medewerkers is oorwegend boorlinge van Namibië of immigrante wat Namibiese burgerskap aanvaar het.
In 1991 is die dagblad oorgeneem deur Democratic Media Holdings (DMH; sedert 2014 bekend as Namibia Media Holdings, kort NMH). Die pos van hoofredakteur word sedert 2004 beklee deur Stefan Fischer, wat tot 2002 as hoofredakteur van die Brandenburgse dagblad Märkischer Bote in Cottbus werksaam was. Fischer het die AZ se verspreiding en uitleg gemoderniseer en sy sirkulasie opgestoot. Die dagblad is sedert 2004 winsgewend en verdien driekwart van sy winste deur advertensies.
In NMH se eie drukkery, Newsprint Namibia, word ook die AZ se susterblaaie Die Republikein en Namibian Sun gedruk. Nuusberigte word deur drie nuusagentskappe aan die AZ verskaf - Reuters, Deutsche Presse-Agentur (dpa) en Transocean GmbH.
Geskiedenis
[wysig | wysig bron]Die Allgemeine Zeitung is op 22 Julie 1916 onder die naam Der Kriegsbote gestig en het aanvanklik veral oor die gebeure tydens die Eerste Wêreldoorlog berig. Toe Suidwes-Afrika ná die Duitse neerlaag onder Suid-Afrikaanse administrasie gekom het, is die dagblad se naam op 1 Julie 1919 gewysig tot Allgemeine Zeitung.
In 1937 is die dagblad deur die uitgewery John Meinert Ltd. gepubliseer. Die AZ het in dié tyd daagliks, behalwe vir Sondae, met 'n sirkulasie van 1 800 verskyn. Destyds het hoofsaaklik Duitsers en Duitssprekendes in Windhoek en sy omgewing op die koerant ingeteken of dit op straat gekoop. Volgens sy ondertitel het die AZ in dié tyd die belange van Duitssprekendes behartig. Vanaf 1939 het die dagblad tydelik die naam Deutscher Beobachter gedra.
Gedurende die 1930's is naas die AZ ook 'n reeks gedrukte media as susterblaaie uitgegee, waaronder Der Farmer, die Volksblatt ('n nuusblad in besit van die werkersvereniging Arbeiterverband für Südwestafrika), die Karakulzüchter ("Karakoelteler", gestig in 1933) en die Heimat (as Luthers-Evangeliese gemeentenuusblad in Afrika).
Tussen 1978 en 1991, toe dit deur DMH (later NMH) oorgeneem is, is die dagblad deur die Duitse teoloog, predikant, indoloog en publisis Diether Lauenstein (1914-1990) uitgegee. Sedert 14 Januarie 2013 verskyn die dagblad met 'n nuwe uitleg, terwyl ook sy slagspreuk verander is van Älteste Tageszeitung Namibias - Nachrichten auf gut Deutsch na Aktuell, Mittendrin, Für Dich.
Die huidige AZ-redakteurspan steun die verbetering van die lewensgehalte van Namibiese burgers en beywer hom vir die vryheid van die indiwidu in 'n demokratiese regstaat. So staan onder meer korrupsie, verspilling van belastinggeld, ampsmisbruik en politieke pogings om demokratiese regte of die onafhanklike regstelsel te ondermyn in die kollig van sy kritiese beriggewing.[3]
Verwysings
[wysig | wysig bron]- ↑ "mysubs.co.za: Allgemeine Zeitung. Besoek op 8 Julie 2015". Geargiveer vanaf die oorspronklike op 9 Julie 2015. Besoek op 8 Julie 2015.
- ↑ www.namibiana.de: Allgemeine Zeitung. Besoek op 9 Julie 2015
- ↑ www.namibiana.de: AZ. Besoek op 9 Julie 2015