Amarok
| Amarok | |
| |
| |
Skermkiekie van Amarok 2.4
| |
| Skrywer | Mark Kretschmann |
|---|---|
| Ontwikkelaar | KDE |
| Aanvanklike vrystelling | 23 Junie 2003 |
| Nuutste weergawe | 2.8[1]/ 16 Augustus 2013 |
| Programmeertaal | C++ (Qt) |
| Beskikbaar in | Verskeie tale |
| Kategorie | Oudiospeler |
| Lisensie | GPL |
| Webblad | amarok.kde.org |
Amarok (uitspraak: ˈæmərɒk)[2] is 'n vrye sagteware- musiekspeler vir Linux en ander weergawes van Unix. Dit gebruik kernelemente van die KDE grafiese omgewing, alhoewel dit onahanklik van die sentrale KDE-vrystellingsiklus vrygestel word. Die nuutste weergawe van die sagteware heet Amarok 2, is op 10 Desember 2008 vrygestel, en is 'n totale estetiese en funksionele herontwerp van die Amarok 1.4x-reeks. Om hierdie rede is sekere vorige funksionele eienskappe in die nuwe weergawe uitgelaat en moet dit eers aangepas word om in volgende weergawes van die program ingesluit te word. Die program is aanvanklik amaroK genoem, maar is in Junie 2006 na Amarok hernoem.
Ten spyte van die feit dat Amarok se kenteken op 'n wolf gebaseer is en dat die naam "amarok" of "amaroq" letterlik na die Inuktitut-woord vir "wolf" verwys, is die sagteware oorspronklik na die album Amarok van Mike Oldfield vernoem. Die 1.2-weergawe het oorspronklik 'n wolfikoon gehad, maar dit is later onttrek weens ooreenkomste wat dit met die kenteken van WaRP Graphics Inc. gehad het. Amarok se wolfkenteken is nou tot 'n mate gewysig waarin dit nie WaRP se kopieregte skend nie.