Asa Briggs

Asa Briggs, Lord Briggs of Lewes (7 Mei 1921 – 15 Maart 2016) was 'n Engelse geskied- en opvoedkundige en akademiese administrateur wat as een van die vernaamste kenners op die gebied van die Victoriaanse tydperk en die geskiedenis van uitsaaiwese beskou is. Met sy navorsing en publikasies oor verskillende aspekte van moderne Britse geskiedenis het Briggs gedurende sy langdurige wetenskaplike loopbaan internasionale erkenning geniet. Baanbrekend was sy bydraes tot onderwys vir volwassenes.

Gedurende die Tweede Wêreldoorlog was Briggs as medewerker by Bletchley Park betrokke, die Churchill-oorlogskabinet se militêre dekoderingsbasis waar geheime Duitse kommunikasie gedekodeer is - waaronder die Enigma-kode. Later sou Briggs ook Winston Churchill se historiese werk oor die Engelssprekende wêreld in vier boekdele, A History of the English-speaking Peoples, proeflees.[1]

As dosent was Asa Briggs aan die Universiteit van Sussex verbonde, die eerste van sewe sogenaamde New Universities of plateglass universities (wat ten opsigte van die moderne glas-en-staal-en-beton-argitektuur van hul kampusse met die historiese klassieke of Gotiese boukuns van historiese instellings gekontrasteer het) wat gedurende die 1960's nuut gestig is en waar hy - as een van die medestigters - ook verskeie administratiewe poste beklee het.[2] Sy bydraes tot onderwys en navorsing by ander tersiêre instellings sowel as openbare en hoër onderwys in die algemeen was ook instrumenteel in die vestiging van die Open University.

In 1976 is hy as lewenslange lid van die Britse Hoërhuis benoem en in 1980 as Fellow of the British Academy (Vennoot van die Britse Akademie) verkies.[3] Reeds in 1970 is hy as lid van die American Academy of Arts and Sciences verkies.[4]

Eers later in sy lewe sou hy onthul dat hy in 1952 as dosent aan die Worcester-kollege te Oxford enkele van sy studente op 'n onkonvensionele pad- en kampeervakansie in die Midde-Ooste saamgeneem het - onder wie die latere Australiese persmagnaat Rupert Murdoch.[5]

Werke

[wysig | wysig bron]

Asa Briggs se gunstelingwerk, die Victoriaanse trilogie (bestaande uit Victorian Things, Victorian People en Victorian Cities) was baanbrekend op die gebied van historiografie met sy nuwe benadering tot Victoriaanse geskiedenis. Briggs het nie geskroom om lig te gooi op die hele bandwydte van die Victoriaanse samelewing nie, sy alledaagse lewe, sy verbruikersgoedere, en selfs sy vulgariteit - aspekte wat voorheen in klassieke geskiedskrywing nouliks aandag geniet het nie. In 1985 is Briggs se werk oor die geskiedenis van die BBC gepubliseer, The BBC: A Short Story of the First Fifty Years. 'n Meer omvattende werk, The History of Broadcasting in the United Kingdom, het in vyf boekdele tussen 1961 en 1995 verskyn.

Verwysings

[wysig | wysig bron]
  1. ↑ University of Westminster: Lord Asa Briggs’ memorial reception held at the University of Westminster. Besoek op 19 Junie 2020
  2. ↑ The Scotsman, 22 Maart 2016: Obituary: Lord Asa Briggs of Lewes. historian and educationalist. Besoek op 19 Junie 2020
  3. ↑ The British Academy: Lord (Asa) Briggs Of Lewes. Besoek op 18 Junie 2020
  4. ↑ Members of the American Academy of Arts and Sciences, 1780–2019, Chapter B, bl. 73
  5. ↑ History News Network, 6 Februarie 2012: Rupert Murdoch and me: eminent historian Asa Briggs tells of Middle East road trip. Besoek op 19 Junie 2020

Eksterne skakels

[wysig | wysig bron]
Media
Tydskrifartikels
Doodsberigte