Belgravia

Belgravia
Distrik
29−37 Chesham Place
Belgravia
Koördinate: 51°30′00″N 0°09′44″W / 51.50000°N 0.16222°W / 51.50000; -0.16222
Land	Verenigde Koninkryk
Land	Engeland
Graafskap	Groter Londen
Borough	City of Westminster Kensington & Chelsea
Tydsone	UTC±00:00 (MGT)
• Somertyd	UTC+01:00 (BST)
Poskode	SW1
Skakelkodes	020

Belgravia [bɛlˈɡreɪviə] is 'n Londense stadsbuurt in die City of Westminster en die Royal Borough of Kensington and Chelsea. Die buurt, wat deur klassisistiese boukuns en duur residensiële eiendomme gekenmerk word, word onder die welvarendste woonkwartiere ter wêreld gereken. Groot dele daarvan, wat as Grosvenor Estate bekend staan, is steeds in adellike familiebesit en word deur die Hertog van Westminster se Grosvenor Group bestuur. Volgens die Leasehold Reform Act van 1967 was die Grosvenor Estate genoodsaak om baie van sy erwe in vrye erfpag aan vroeëre huurders te verkoop.

Die Grosvenors se familiegeskiedenis strek byna 1000 jaar terug tot in die tydperk van Willem die Veroweraar. Die familie se eiendomsbelange dateer uit die laat 17de eeu toe Sir Thomas Grosvenor in 1677 met Mary Davies in die huwelik getree het. Die Grosvenors het hierdeur grond wes van die City of London verwerf, bestaande uit moerasse, weiland en vrugteboorde, waarop later die nuwe stadsbuurte Mayfair en Belgravia ontstaan het. Die Grosvenors het steeds belange in albei kwartiere.^[1] Die naam Belgravia is ontleen aan een van die Hertog se sekondêre adellike titels, Viscount Belgrave (Burggraaf Belgrave).

Die huidige buurt is suidwes van Buckingham-paleis geleë en word rofweg begrens deur Knightsbridge in die noorde, Grosvenor Place en Buckingham Palace Road in die ooste, Pimlico Road in die suide en Sloane Street in die weste.

Verwysings

1. "www.grosvenor.com: History. Besoek op 7 November 2017". Geargiveer vanaf die oorspronklike op 10 Mei 2017. Besoek op 7 November 2017.