Bermudaanse nasionale krieketspan

Bermuda

Kenteken van die Bermudaanse nasionale krieketspan
Bynaam	Gombey Warriors
Konferensie	Bermudaanse Krieketraad (BCB)
Personeel
Kaptein	Delray Rawlins
Afrigter	Cal Waldron[1]
Internasionale Krieketraad
IKR-status	Assosiaatlid (1966)
IKR-streek	Amerikas
IKR-ranglys Tans[3] Beste rang tot dusver T20I 30ste 29ste (30 September 2023)[2]
Internasionale eendagwedstryde
Eerste EDI	t Kanada op Queen’s Park-ovaal, Port of Spain; 17 Mei 2006
Laaste EDI	t Nederland op Senwespark, Potchefstroom; 8 April 2009
EDIs Gespeel Gewen/Verloor Algeheel[4] 35 7/28 (20,00%) (0 gelykop, 0 onbeslis) Vanjaar[5] 0 0/0 (0 gelykop, 0 onbeslis)
Krieketwêreldbeker-verskynings	1/14 (eerste in 2007)
Beste uitslag	Groepfase (in 2007)
Wêreldbeker- kwalifiserings	9 (eerste in 1979)
Beste uitslag	Naaswenner (in 1982)
Kampioenetrofee-verskynings	0/9
Twintig20s
Eerste T20I	t Skotland op Stormont, Belfast; 3 Augustus 2008
Laaste T20I	t Kanada op Bermuda Nasionale Stadion, Hamilton; 7 Oktober 2023
T20Is Gespeel Gewen/Verloor Algeheel[6] 32 18/13 (56,25%) (0 gelykop, 1 onbeslis) Vanjaar[7] 0 0/0 (0 gelykop, 0 onbeslis)
T20I-wêreldbeker-verskynings	0/9
T20I-wêreldbeker- kwalifiserings	5 (eerste in 2008)
Beste uitslag	Naaswenner (in 2023)
T20I-klere

Die Bermudaanse nasionale krieketspan (Engels: Bermuda national cricket team), met die bynaam Gombey Warriors, is die nasionale krieketspan wat die Britse oorsese gebied Bermuda in internasionale krieket verteenwoordig. Krieket word in Bermuda deur die Bermudaanse Krieketraad (BCB, van Engels: Bermuda Cricket Board) beheer en sedert 1966 is dit ’n assosiaatlid van die Internasionale Krieketraad (IKR). Krieket word in Bermuda as nasionale sport beskou^[8] en die oorsese gebied is een van die wenige in die streek wat nie spelers vir die Wes-Indiese nasionale span beskikbaar stel nie. Saam met Kanada en die Verenigde State is Bermuda tradisioneel een van die sterker nasionale krieketspanne van die Amerikas na die volle lid Wes-Indië.

Nadat in 1891 ’n toer na New York gereël is, is die eerste Bermudaanse nasionale span saamgestel. In die jare voor die Eerste Wêreldoorlog het Bermuda en Amerikaanse spanne (insluitende Philadelphia s’n) gereeld wedersydse toere onderneem, hoewel hulle eers in 1912 tydens die Australiese besoek hul eerste internasionale wedstryd gespeel het. Ná die 1920’s het die Bermudaanse krieket se fokus van die Verenigde State na die Wes-Indiese lande verskuif, hoewel Wes-Indiese spanne eers vanaf die 1950’s gereelde toere begin onderneem het.^[9] Bermuda se nasionale span het ook teen nasionale spanne gespeel wat na of van die Wes-Indiese eilande getoer het. Van hierdie wedstryde het egter slegs een, dié teen Nieu-Seeland in 1972, eersterangse status geniet.^[10]

Die IKR-trofee 1979 was die eerste wêreldbekerkwalifisering vir die IKR se geassosieerde lede. Bermuda het dié jaar die halfeindstryd gehaal en in 1982 het hulle tot die eindstryd deurgedring, maar teen Zimbabwe verloor. Vervolgens het hulle nie vir die Krieketwêreldbeker 1983 gekwalifiseer nie, aangesien aan dié toernooi slegs een assosiaatlid kon deelneem. Vir die IKR-trofee 2005 is die aantal assosiaatlede tot ses verhoog. Nadat hulle die halfeindstryd gehaal het, het Bermuda vir die Krieketwêreldbeker 2007 gekwalifiseer en sodoende die kleinste land in terme van beide bevolking en oppervlakte geword wat daarin geslaag het. Hulle het tot in 2009 ook EDI- en T20I-status geniet. Bermuda het tydens die Krieketwêreldbeker en hul aansluitende EDI-reekse egter swak vertoon, en ná die 2009-wêreldbekerkwalifisering is hulle na die 2011-wêreldkrieketliga se tweede afdeling afgegradeer. Sedertdien het hulle drie verdere afdelings geval.

In April 2018 het die IKR besluit om aan al sy lede volle T20I-status toe te ken. Vervolgens sal al die T20I-wedstryde wat Bermuda ná 1 Januarie 2019 teen ander IKR-lede speel, as ’n volle T20I erken word.^[11] Bermuda is tans (Maart 2024) 30ste op die Twintig20-wêreldranglys.^[12]

Beheerliggaam

Die hoofartikel vir hierdie afdeling is: Bermudaanse Krieketraad.

Die Bermudaanse Krieketraad (Engels: Bermuda Cricket Board, BCB) is in 1948 as die Bermudaanse Krieketbeheerraad (Bermuda Cricket Board of Control, BCBC) gestig met die samesmelting van die in 1844 gestigte Bermudaanse Krieketklub en die Somers Isles-krieketliga en verantwoordelik vir die reëling van krieket in Bermuda. In 1966 het hulle as ’n assosiaatlid by die Internasionale Krieketraad (IKR) aangesluit en in 2003 sy huidige naam aangeneem.^[13] Bermuda is een van die Engelstalige gebiede in die streek wat nie ’n lid van Krieket Wes-Indië is nie en van sy spelers kan nie vir die Wes-Indiese nasionale krieketspan gekeur word nie.^[14]

Die Bermudaanse Krieketraad bestuur al die Bermuda-verteenwoordigende nasionale spanne, insluitende die mans, vroue en jeug. Hulle is ook verantwoordelik vir die bestuur en organisasie van T20I-reekse teen ander spanne en die reëling van internasionale wedstryde tuis. Daarbenewens is die BCB verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Bermudaanse span.

Kinders en jongmense word reeds op skool aan krieket bekend gestel en na gelang van hul belangstelling en talent begin hul met hul afrigting. Net soos ander krieketlande beskik Bermuda oor ’n o/19-nasionale span wat aan die o/19-krieketwêreldbeker deelneem.^[15]

Geskiedenis

Invoering en vestiging van krieket

Op 30 Augustus 1844 het die eerste bekende krieketwedstryd in Bermuda plaasgevind,^[16] toe ’n garnisoenspan teen ’n ander weermagspan verloor het. In 1845 is die Bermudaanse Krieketklub gestig en dit het ondersteuning deur plaaslike inwoners én Britse soldate geniet. In 1891 is die eerste Bermudaanse nasionale krieketspan saamgestel, toe Philadelphia se span na Bermuda getoer het, waarmee die gereëlde internasionale wedstryde teen Amerikaanse spanne begin het. In 1902 het Somerset vir die eerste keer teen St. George’s te staan gekom en dié wedstryd word sedertdien jaarliks op ’n vakansiedag aangebied. In 1905 het die Hamilton-krieketklub die eerste Bermudaanse klub geword wat ’n toer onderneem en in beide New York en Philadelphia gespeel het. In 1911 het die nasionale span vir die eerste keer die Verenigde State besoek en twee oorwinnings oor Philadelphia aangeteken. In die tweede wedstryd het Gerald Conyers in albei beurte ’n driekuns behaal en in die wedstryd altesaam 15 paaltjies geneem. Die eerste amptelike internasionale wedstryd het Bermuda eers in 1912 gespeel, toe die Australiërs vir die eerste keer na Bermuda getoer het en in hul beurte op onderskeidelik 112 en 102 lopies uitgeboul is; desondanks het die besoekers met 57 lopies gewen. Een jaar later het Australië teruggekom en met ’n beurt gewen; die besoekers het ook ’n Bermudaanse “kleurspan” geklop, in Hamilton ’n oorwinning aangeteken en in ’n gelykop gespeel.^[17]

Ná die 1920’s het die Bermudaanse krieket se fokus na Wes-Indië begin verskuif, hoewel die Wes-Indiese span Bermuda eers van die 1950’s af besoek het.^[18] In 1933 was Sir Julien Cahn se keurspan een van min wat gedurende die tussenoorlogse tydperk Bermuda besoek het, dié toer se vyf wedstryde is nog oor jare heen bespreek.^[19] In dieselfde jaar het die in Bermuda gebore krieketspeler Alma Hunt vir die Wes-Indiese span verskyn, sy geskiktheid vir dié span is egter betwyfel. Die kwessie het meer daaroor gegaan of Bermuda deel sou wees van die Wes-Indiese Eilande en minder oor Hunt se persoonlike geskiktheid vir die Bermudaanse span. Onder andere het hy op die Engelse 1933-toer aan opwarmingswedstryde deelgeneem.^[20] Hunt is vir opwarmingswedstryde van die Wes-Indiese span genomineer, maar hy het nie aan die Wes-Indiese 1933-toer na Engeland deelgeneem nie.^[21] In 1939 het Wes-Indië Bermuda besoek.^[17]

Naoorlogse tydperk

Ná die Tweede Wêreldoorlog het die Bermudaanse krieket se gewildheid weer toegeneem. In 1948 het met die samesmelting van die Somers Isles-krieketliga en die Bermuda-krieketklub die beheerliggaam Bermudaanse Krieketbeheerraad (Bermuda Cricket Board of Control) ontstaan.^[16] Vervolgens het meer internasionale wedstryde plaasgevind, veral as toerwedstryde tydens toere deur die toetslande na Wes-Indië.^[16] In 1952 het Trinidad die reeks van twee wedstryde teen Bermuda met 1–0 beklink. Een jaar later het die Marylebone-krieketklub (MKK) onder Len Hutton Bermuda besoek en in albei driedaagse wedstryde onbeslis gespeel. In 1958 het Bermuda Jamaika besoek en Pakistan Bermuda. In 1960 het Bermuda vir die eerste keer Engeland besoek.^[19][17]

Bermuda is ook die plek, waar die eerste speler wat nie in Yorkshire gebore is nie, vir Yorkshire gespeel het. Volgens ’n tradisionele reël van Yorkshire kon niemand, wat buite die county gebore is, vir die span speel nie (dié reël is in die 1990’s geskrap). Die reël is in 1964 gebuig om Garry Sobers toe te laat vir die span onder hul kaptein Brian Close tydens ’n fees in Bermuda. Die besoekers het die wedstryd met 190 lopies gewen. Een jaar later het Nieu-Seeland Bermuda besoek en teen die nasionale span onbeslis gespeel.^[17]

In 1966 het Bermuda ’n assosiaatlid van die Imperiale Krieketkonferensie (IKK, nou die Internasionale Krieketraad) geword.^[16][19] Drie jaar later het hulle Nederland in Haarlem met ’n beurt verslaan. In 1970 het Glamorgan voor die begin van hul tuisseisoen Bermuda besoek, maar die tweedaagse wedstryd teen St. George’s verloor. Een jaar later is in Hamilton die waarskynlik enigste internasionale wedstryd van ’n mansspan teen ’n vrouespan aangebied, toe Bermuda teen Engeland onbeslis gespeel het. In April 1972 het vir die eerste keer ’n wedstryd teen Nieu-Seeland eersterangse status geniet, maar hulle het dié wedstryd verloor.^[17][22][23] Dit was vir meer as 30 jaar Bermuda se enigste wedstryd met die status; eers in 2004 het Bermuda sy tweede eersterangse wedstryd gespeel, dié keer teen die Verenigde State. Albei wedstryde is op die Bermuda Nasionale Stadion gehou.^[10] In 1974 het die MKK Bermuda met ’n beurt verslaan. In dieselfde jaar het Australië al die vyf wedstryde in Bermuda gewen, maar die enigste wedstryd teen die nasionale span moes weens reën afgelas word.^[17]

Eerste toernooideelnames

Bermuda is nie vir die eerste Krieketwêreldbeker 1975 genooi nie. Sedert 1979 het hulle aan ’n aantal internasionale toernooie deelgeneem soos die IKR-trofee, wat deur Alma Hunt, die destydse Bermudaanse verteenwoordiger by die IKR, voorgestel is.^[16] Reeds tydens die eerste IKR-trofee 1979 het Bermuda die halfeindstryd en tydens die tweede IKR-trofee 1982 onoorwonne die eindstryd gehaal, wat hulle teen Zimbabwe verloor het. Albei uitslae was egter nie genoeg om vir die krieketwêreldbekertoernooie in 1979 en 1983 te kwalifiseer nie. Tydens die daaropvolgende toernooie kon Bermuda nie daarin slaag om die prestasies te herhaal nie. Hunt self word as die beste Bermudaanse krieketspeler nog beskou,^[16] hy kon egter nie vir sy land verskyn nie en het later vir Skotland gespeel.^[19][17][20] Van 1966 af het Hunt vir 18 jaar gedien as die Bermudaanse beheerliggaam se president.^[24]

Tydens die IKR-trofee 1986 het Bermuda die vierde plek behaal, waarmee hulle die Krieketwêreldbeker 1987 misgeloop het. Tydens die IKR-trofee 1990 het hulle hul swakste uitslag behaal, toe hulle reeds in die groepfase uitgeskakel is en die Krieketwêreldbeker 1992 versuim het. Een jaar later het Australië die nasionale span met 93 lopies verslaan en in 1993 het Pakistan albei wedstryde teen Bermuda gewen. In dieselfde jaar het Derbyshire voor die begin van sy tuisseisoen Bermuda besoek en albei wedstryde teen die nasionale span asook die wedstryde teen die o/25-nasionale span, Somerset en St. George’s gewen. Daarop het die besoek van ’n Wes-Indiese keurspan gevolg, wat sy wedstryde teen die keurspanne Board President’s XI en Board XI, die o/25-nasionale span, Somerset en twee keer teen die nasionale span gewen het. Tydens die IKR-trofee 1994 het Bermuda die vierde plek behaal en daarmee die Krieketwêreldbeker 1996 naelskraap misgeloop. Twee jaar later het Bermuda vir die eerste keer aan die Wes-Indiese Eendagbeker deelgeneem, maar al die ses wedstryde verloor. Ter voorbereiding op die Amerikastrofee is in Barbados die Karibies-Atlantiese beker aangebied, waaraan saam met die gasheer ook Bermuda, Kanada en die Verenigde State deelgeneem het. Bermuda het dié toernooi na die gasheer in die tweede plek afgesluit. Aansluitend het Nieu-Seeland Bermuda besoek en met vier paaltjies gewen. Tydens die IKR-beker 1997 kon Bermuda nie vir die Krieketwêreldbeker 1999 kwalifiseer nie. Daarna het hulle Indië gehuisves, wat die nasionale en ’n keurspan geklop het. Een jaar later het Bermuda al die drie wedstryde tydens die Red Stripe Bowl verloor, net so in 1999. Daarna het die nasionale span in Kanada twee wedstryde teen die gasheer gewen, maar hulle is deur die o/23-nasionale span verslaan. Tydens die Amerikastrofee 2000 – destyds Amerikaskrieketbeker genoem – het Bermuda na Kanada in die tweede plek geëindig.^[25] Tydens die Red Stripe Bowl het die nasionale span teen die Kaaimanseilande hul eerste oorwinning tydens dié toernooi aangeteken, maar hulle is nietemin in die eerste rondte uitgeskakel. Tydens die IKR-beker 2001 het Bermuda die negende plek behaal, waarmee hulle ook die Krieketwêreldbeker 2003 misgeloop het. Een jaar later het hulle tydens die Amerikastrofee die vierde plek behaal.^[17] In 2003 is die beheerliggaam in Bermudaanse Krieketraad (Bermuda Cricket Council, BCB) hernoem.^[16]

Op pad na die eerste krieketwêreldbekerdeelname

Krieketwedstryd tussen Bermuda en Guernsey op die College Field, Saint Peter Port, Guernsey, 2006

In 2004 het Bermuda aan die eerste Interkontinentale Beker deelgeneem en in sy groep teen Kanada en die Verenigde State te staan gekom. Die span ist egter in die groepfase uitgeskakel, nadat hulle deur die Verenigde State verslaan is en teen Kanada onbeslis gespeel het.^[26] In dieselfde jaar het Bermuda vir die eerste keer die Amerikastrofee gehuisves, waartydens hulle na Kanada en die Verenigde State in die derde plek geëindig het. Tydens die tweede Interkontinentale Beker 2005 het hulle die Amerikas se groep ná oorwinnings oor Kanada en die Kaaimanseilande in Kanada eerste afgesluit, maar in Oktober dieselfde jaar het hulle in die halfeindstryd teen Kenia onbeslis gespeel. Nadat Kenia in die eerste beurt ’n bonuspunt behaal en in die tweede beurt ’n uitbouling afgeweer het, het dié span vir die eindstryd gekwalifiseer.^[27] Terwyl die eindstryd aangebied is, het Bermuda Namibië vir twee EDI-wedstryde gehuisves, wat hulle verloor het. Dié reeks is egter deur omstrede voorvalle oorskadu, nadat die Bermudaanse span Namibië van rassistiese beledigings beskuldig en tydens die tweede wedstryd die veld verlaat het, nadat ’n stormloop aan uitsmyters teen die Bermudaanse laerordekolwers ontketen is.^[28] Die Namibiese Krieketraad het die rassisme-aantygings ontken.^[29] Op 7 Julie 2005 het Bermuda waarskynlik sy grootste krieketoomblik beleef, toe die nasionale span tydens die IKR-trofee 2005 die halfeindstryd gehaal het. Daarmee het hulle vir die Krieketwêreldbeker 2007 in Wes-Indië gekwalifiseer en van 1 Januarie 2006 tot die krieketwêreldbekerkwalifisering 2009 EDI-status ontvang.^[17] Daarmee het Bermuda volgens beide oppervlakte en bevolking die kleinste land geword wat daarin geslaag het.^[16] Bermuda was egter ook die enigste land in dié kategorie wat oor geen geskikte stadion vir die aanbieding van EDIs beskik het nie, aangesien die IKR die Bermuda Nasionale Stadion as nie geskik geag het nie.^[30]

Bermudas se eerste internasionale wedstryde in 2006 het teleurstellend verloop, nadat hulle al die vyf wedstryde tydens die toer in die Verenigde Arabiese Emirate verloor het. In April 2006 het Bermuda die T20I-toernooi Wêreldkrieketklassiek aangebied. In Mei 2006 het hulle in hul eerste EDI gespeel en tydens ’n drienasiesreeks Kanada op die Queen’s Park Oval, Port of Spain, Trinidad en Tobago, met drie paaltjies verslaan.^[31] Daarmee het Bermuda ná Australië, Nieu-Seeland en Zimbabwe die vierde span geword wat sy eerste EDI gewen het.^[17] Bermuda het egter sy tweede EDI teen Zimbabwe met 194 lopies verloor, nadat hulle 338 lopies vir sewe paaltjies afgestaan het.^[32] In die daaropvolgende eindstryd is hulle weer deur Zimbabwe geklop, dié keer met 83 lopies.^[33]

In Julie 2006 het Bermuda tydens die Stanford 20/20-uitkloptoernooi teen Jamaika verloor en is daarmee uitgeskakel. Vir die deelname het hulle ’n prysgeld van $100 000 ontvang. In die daaropvolgende maand het Bermuda Kanada besoek vir ’n vierdaagse wedstryd tydens die Interkontinentale Beker 2006 en twee EDIs. Hulle het die vierdaagse wedstryd, wat in die laaste uur beslis is, met nege paaltjies verloor, maar albei EDIs teen Kenia en Nederland gewen. Tydens hul besoek aan Kanada het Bermuda in Augustus aan die Amerikastrofee se afdeling een deelgeneem en dié toernooi vir die eerste keer gewen, nadat hulle onoorwonne gebly het. In November het Bermuda Kenia vir ’n wedstryd tydens die Interkontinentale Beker en drie EDIs besoek. In die Interkontinentale Bekerwedstryd, wat deur reën beïnvloed is, het hulle onbeslis gespeel en is daarmee uit die toernooi geskakel, terwyl hulle die drie EDIs verloor het.^[34] Daarna het Bermuda Suid-Afrika vir ’n Interkontinentale Bekerwedstryd teen Nederland besoek. Hulle het in dié wedstryd onbeslis gespeel, nadat Glamorgan se kolwer David Hemp met 247 onoorwonne lopies ’n nuwe rekordbeurt aangeteken het. Dit was die hoogste individuelle telling in die toernooigeskiedenis.^[35] Daarop het ’n driehoekige reeks met Kanada en Nederland gevolg. Bermuda het die eerste drie wedstryde verloor, maar hulle het Nederland in die laaste wedstryd met ’n lae telling geklop.^[17][36]

Einde Januarie 2007 het Bermuda Kenia vir die Wêreldkrieketliga 2007/09 se afdeling een besoek. Hulle het vier van die vyf wedstryde verloor: met tien paaltjies teen die latere wenner Kenia,^[37] met vier paaltjies teen Ierland,^[38] met 56 lopies teen Kanada (nadat hulle binne 16 kolfbeurte uitgeboul is)^[39] en met agt paaltjies teen Nederland.^[40] Hul enigste oorwinning was oor Skotland met vyf paaltjies.^[41] Bermuda het weens sy swakker lopietempo na Ierland in die laaste plek geëindig (Bermuda met −1.310, Ierland met −0.061).^[42] Daarmee het hulle die eerste T20I-wêreldbeker 2007 misgeloop. Daarop het die Driehoekige Assosiaatreeks op die Antigua Recreation Ground in St. John’s, Antigua en Barbuda, gevolg, waartydens Bermuda teen Bangladesj en Kanada te staan gekom het. In die openingswedstryd teen Bangladesj het hulle 205/8 in 50 boulbeurte aangeteken, Lionel Cann was met 33 lopies van 23 aflewerings die beste kolwer. Bangladesj se aanvangskolwer Shahriar Nafees het Bermuda se hoop op ’n oorwinning egter beëindig, nadat hy 104 onoorwonne lopies aangeteken en sy span na ’n oorwinning met agt paaltjies geneem het.^[43] In die wedstryd teen Kanada het hulle eerste gekolf en 206/8 in 50 boulbeurte aangeteken, waartoe veral die vennootskappe tussen die kaptein Irving Romaine en Saleem Mukuddem met 57 lopies, asook dié tussen Lionel Cann en Delyone Borden met 38 lopies, bygedra het. Cann het 42 lopies in slegs 25 aflewerings gemoker, waaronder vyf grenshoue. Tydens die Kanadese beurt het die aanvangskolwer Abdool Samad op ’n soortgelyke manier soos Nafees een dag vroeër uitgeblink. Sy 83 lopies in 86 aflewerings het Kanada met 135/3 aan die rand van ’n oorwinning gebring. Delyone Borden se draaiboulwerk het Bermuda laat herstel, toe hy vier paaltjies vir slegs 33 lopies geneem en Kanada op 179/6 beperk het; Kanada het egter 207/7 aangeteken.^[44]

Eerste krieketwêreldbekerdeelname

In voorbereiding op die Krieketwêreldbeker 2007 het Bermuda in St. Vincent twee opwarmingswedstryde gespeel: Op 5 Maart 2007 teen Engeland en drie dae later teen Zimbabwe. Die Engelse het 286/8 in hul 50 beurte aangeteken, waartoe Jamie Dalrymple 76 vinnige lopies bygedra het, asook Ian Bell en Kevin Pietersen met onderskeidelik 46 en 43 lopies. Die Bermudaanse beurt is reeds ná 22.2 beurte beëindig, nadat Engeland al die tien paaltjies vir slegs 45 lopies geneem het, die beste Bermudaanse kolwer het slegs elf lopies aangeteken. Jon Lewis het drie paaltjies geneem, James Anderson en Andrew Flintoff twee elk.^[45] Teen Zimbabwe het hulle eerste gekolf, maar hul paaltjies vinnig verloor. Janeiro Tucker het 56 lopies aangeteken, maar hy was slegs een van vier spelers met dubbelsyfers, voordat Bermuda met die laaste aflewering op 136 lopies uitgeboul is. Zimbabwe het twee paaltjies binne die eerste drie kolfbeurte verloor, Sean Williams het egter met 72 onoorwonne lopies uitgeblink en hy het Zimbabwe die teiken van 137 lopies binne 29 beurte laat behaal, waartydens hulle slegs vier paaltjies verloor het.^[46]

Ná meer as een jaar se teleurstellende uitslae het Bermuda tydens sy eerste krieketwêreldbekerdeelname in die groepfase drie verwagte swak nederlae teen die gevestigde toetslande Sri Lanka, Indië en Bangladesj gely. In die openingswedstryd het Bermuda slegs 78 lopies aangeteken, nadat Sri Lanka ’n teiken van 321/6 opgestel het.^[47] In die tweede wedstryd teen Indië het hulle met die boulwerk gesukkel en Indië het die hoogste telling tydens ’n krieketwêreldbekertoernooi aangeteken: 413/5. Tydens die Bermudaanse beurt het David Hemp met 76 onoorwonne lopies die eerste Bermudaanse vyftigtal tydens ’n krieketwêreldbekertoernooi gemoker. Behalwe vir Hemp het die kolwers ook gesukkel: die naasbeste kolwer was Dean Minors met 21 lopies, en vyf van die elf spelers is met ’n nulletjie uitgeskakel, waarvolgens Bermuda met die destyds hoogste telling van 257 lopies verloor het.^[48][49] Dwayne Leverock se vangs het vir heelwat oproer gesorg. Met sy 127 kg was hy die swaarste speler tydens die toernooi en hy het die bal met ’n skouspelagtige sprong gevang.^[50] Reën het die laaste wedstryd teen Bangladesj erg ontwrig: Nadat die wedstryd aanvanklik op 41 beurte per span verkort is, moes dit later op slegs 21 beurte per span verkort word. Bermuda het 94/9 aangeteken en David Hemp was weer die beste kolwer (met 23 lopies); Bangladesj het die 96 lopies binne 17.3 beurte behaal en slegs drie paaltjies verloor.^[51]

Ná die krieketwêreldbeker het Bermuda Denemarke besoek, waar hulle albei wedstryde teen die nasionale span verloor het. In Augustus 2007 het hulle tydens die Interkontinentale Beker swak nederlae teen Ierland en Nederland gely, maar ook tydens die EDI-reeks in Nederland is hulle in albei wedstryde verslaan.^[52] Tussen Oktober en November het hulle die oorblywende Internasionale Bekerwedstryde in Kenia en die Verenigde Arabiese Emirate en ook EDI-reekse teen albei spanne gespeel, maar hulle is in al daardie wedstryde verslaan.^[53] Bermuda het tydens dié toernooi in die laaste plek geëindig.^[54][55] In Kenia het Bermuda ook teen Uganda te staan gekom en in die reeks van twee wedstryde gelykop gespeel.^[17][56]

Verdere agteruitgang en ineenstorting

Die Bermudaanse span nadat hulle die T20I-wêreldbeker 2024 Amerikas-substreekkwalifisering gewen het

In 2008 het Bermuda tydens die tweede Stanford 20/20 se eerste rondte teen Guyana met nege paaltjies verloor. Daarna het hulle die EDI-reeks in Kanada met 2–1 beklink^[57] en ook die Interkontinentale Bekerwedstryd gewen. Aansluitend het hulle vir hul eerste tuiswedstryd tydens dié toernooi sedert 2004 Skotland gehuisves, maar dié wedstryd verloor. Tydens die T20I-wêreldbekerkwalifisering 2008 het hulle in die laaste plek geëindig en sodoende die T20I-wêreldbeker 2009 misgeloop.^[58] Daarna het Bermuda Nederland vir ’n EDI-reeks van twee wedstryde besoek, maar met 0–1 verloor.^[59] Tydens die Driehoekige Assosiaatreeks in Kanada het Bermuda sy twee wedstryde teen die gasheer en Wes-Indië in King City verloor.^[60][61] Die Amerikastrofee in Florida het hulle na die gasheer in die tweede plek afgesluit.^[17][62]

Daarna het Bermuda aan die krieketwêreldbekerkwalifisering 2009 deelgeneem en in die negende plek geëindig, waarmee hulle na die wêreldkrieketliga 2011 se afdeling twee afgegradeer is en vir die Interkontinentale Skild 2009/10 gekwalifiseer het.^[63] Gevolglik is Bermuda van sy EDI-status ontneem.^[64] As gevolg van hul afgradering het hulle die Krieketwêreldbeker 2011 misgeloop. Tydens die Interkontinentale Skild 2009/10 het hulle ná nederlae teen Uganda, Namibië en die Verenigde Arabiese Emirate slegs in die laaste plek geëindig.^[65] Daarmee het hulle ook die Interkontinentale Bekertoernooie in 2009/2010, 2011/2013 en 2015/2017 misgeloop. Aan die T20I-wêreldbekerkwalifisering 2010 vir die T20I-wêreldbeker 2010 het hulle ook nie deelgeneem nie, terwyl hulle tydens die T20I-wêreldbekerkwalifisering 2012 slegs die 13de plek behaal en daarmee nie vir die T20I-wêreldbeker 2012 gekwalifiseer het nie.^[66]

Die afdeling twee het Bermuda in die laaste plek afgesluit en hulle is na afdeling drie afgegradeer.^[67] In April 2013 het hulle die afdeling drie aangebied en dié toernooi in die vierde plek afgesluit, genoeg om in die afdeling aan te bly.^[68] Tydens die T20I-wêreldbekerkwalifisering 2013 vir die T20I-wêreldbeker 2014 het Bermuda, ná oorwinnings oor Denemarke en ’n verrassende oorwinning oor Skotland, danksy Jacobi Robinson se uitstekende boulwerk, in die 14de plek geëindig.^[69] Tydens die afdeling drie 2014 is Bermuda in amper al die wedstryde verslaan en hulle kon slegs oor Maleisië ’n oorwinning aanteken. Daarmee het hulle weereens in die laaste plek geëindig en is na afdeling vier 2016 afgegradeer.^[70] Binne ses jaar het Bermuda van die krieketwêreldbekerkwalifisering na afdeling vier 2016 geval. Daarmee het die nasionale span nie die kwalifiseringstoernooie vir die twee krieketwêreldbekertoernooie in 2015 en 2019 gehaal nie.

Bermuda is reeds in die T20I-wêreldbekerkwalifisering 2015 se plaaslike kwalifisering vir die T20I-wêreldbeker 2016 deur Kanada en die Verenigde State verslaan.^[71] In die afdeling vier 2016 het hulle met hul vierde plek slegs in die afdeling aangebly.^[72] Tydens die T20I-wêreldbekerkwalifisering 2019 is Bermuda reeds in die eerste rondte uitgeskakel en het sodoende die T20I-wêreldbeker 2021 misgeloop.^[73] Tydens afdeling vier in 2018 het hulle slegs die sesde plek gehaal en is afgegradeer na afdeling vyf, wat later die Uitdaagliga 2019–2022 geword het. Dit was een van die Krieketwêreldbeker 2023 se kwalifiseringstoernooie.^[74] In 2021 is Bermuda in die plaaslike kwalifisering vir die T20I-wêreldbeker 2022 weer deur die Verenigde State en Kanada verbygesteek.^[75] Nadat Bermuda in Junie 2022 tydens die Uitdaagliga al vyf hul wedstryde verloor het, kon hulle nie vir die hooftoernooi gekwalifiseer nie.^[76][77] Tydens die Amerika-kwalifisering het die gasheer Bermuda gelyk aan punte met Kanada geëindig, maar vanweë ’n swakker lopietempo die T20I-wêreldbeker 2024 naelskraap misgeloop, nadat hulle in die laaste wedstryd deur dié opponent uitgeboul is.^[78] Tydens die Uitdaagliga-uitspeelrondte 2024 het Bermuda versuim om die Uitdaagliga 2023–2026 vir die Krieketwêreldbeker 2027 te haal, waarmee hulle die hooftoernooi misgeloop het.^[79]

Kleure, kenteken en bynaam

In T20I-krieket dra Bermuda blou truie met rooi kleuraksente, blou moue en ’n wit V-halslyn, en blou broeke. Veldwerkers dra ’n blou bofbalpet of ’n blou sonhoed. Die kolwers se helms is ook blou geverf. Gedurende IKR-toernooie verskyn die borg se embleem op die regtermou en die letters Bermuda verskyn op die middel van die trui.

Die Bermudaanse Krieketraad se kenteken toon ’n paaltjie met gekruisde kolwe en ’n krieketbal daaragter, omring deur die letters Bermuda Cricket Board.

Die Bermudaanse nasionale krieketspan se bynaam is Gombey Warriors, ontleen aan die kleurryke maskerdans in Bermuda, die Gombey.

Tuisstadions

White Hill

Nasionale Stadion

Ligging van Bermudaanse krieketstadions

Bermuda beskik oor geen amptelike tuisstadion vir sy nasionale span nie. Die Bermudaanse nasionale krieketspan gebruik vir hul krieketwedstryde eerder ’n verskeidenheid stadions dwarsdeur Bermuda:

No.	Stadion	Plek	Eerste wedstryd
1	White Hill Field	Sandys Parish	18 Augustus 2019
2	Bermuda Nasionale Stadion	Devonshire Parish	19 Augustus 2019

Spelers

Spelerstatistieke

Altesaam het vir Bermuda 38 spelers EDI- en 37 spelers T20I-krieket gespeel. Vervolgens die spelers wat vir die Bermudaanse span die meeste lopies aangeteken en die meeste paaltjies geneem het.

Lopies

EDI				T20I
Speler	Tydperk	EDIs	Lopies	Speler	Tydperk	T20Is	Lopies
Irving Romaine	2006–2009	35	783	Kamau Leverock	2019–hede	29	842
David Hemp	2006–2009	22	641	Delray Rawlins	2019–hede	28	776
Lionel Cann	2006–2009	26	590	Tre Manders	2021–hede	17	516
Janeiro Tucker	2006–2009	26	496	Allan Douglas	2019–2021	21	416
Dean Minors	2006–2007	20	478	Terryn Fray	2019–hede	21	216
Korrek teen: 4 Maart 2024[80]				Korrek teen: 4 Maart 2024[81]

Paaltjies

EDI				T20I
Speler	Tydperk	EDIs	Paaltjies	Speler	Tydperk	T20Is	Paaltjies
Dwayne Leverock	2006–2009	32	34	Delray Rawlins	2019–hede	28	32
Saleem Mukuddem	2006–2007	20	23	Kamau Leverock	2019–hede	29	25
Kevin Hurdle	2006–2007	19	23	Derrick Brangman	2019–hede	16	22
Rodney Trott	2007–2009	11	16	Allan Douglas	2019–hede	21	18
Delyone Borden	2007–2009	12	15	Rodney Trott	2008–2021	21	17
Korrek teen: 4 Maart 2024[82]				Korrek teen: 4 Maart 2024[83]

Spankapteins

Tot op hede was twee spelers reeds die kaptein vir Bermuda tydens ’n EDI en ses tydens ’n T20I.^[84]

EDI[85]			T20I[86]
No.	Naam	Tydperk	Naam	Tydperk
1	Janeiro Tucker	2006	Irving Romaine	2008
2	Irving Romaine	2006–2009	Rodney Trott	2008–2019
3			Terryn Fray	2019
4			Dion Stovell	2019
5			Kamau Leverock	2021
6			Delray Rawlins	2023–hede

Rekords

EDI-rekord teen ander lande

Teenstander	Wedstryde	Gewen	Verloor	Gelykop	Onbeslis	% Gewen	Eerste oorwinning
t. Toetslande
Bangladesj	2	0	2	0	0	0,00	–
Ierland	1	0	1	0	0	0,00	–
Indië	1	0	1	0	0	0,00	–
Sri Lanka	1	0	1	0	0	0,00	–
Wes-Indië	1	0	1	0	0	0,00	–
Zimbabwe	2	0	2	0	0	0,00	–
t. Assosiaatlede
Kanada	11	5	6	0	0	45,45	17 Mei 2006
Kenia	8	0	8	0	0	0,00	–
Nederland	7	1	6	0	0	14,28	2 Desember 2006
Skotland	1	1	0	0	0	100,00	5 Februarie 2007
Algeheel	35	7	28	0	0	20,00	17 Mei 2006
Rekords volledig tot en met EDI #4738 op 3 Maart 2024. Laaste keer hersien op 4 Maart 2024. Wenpersentasies sluit onbesliste wedstryde uit en tel gelykop as ’n halwe oorwinning.[87]

Krieketwêreldbekerrekord

Jaar	Uitslag
1975	Nie genooi nie
1979	Nie gekwalifiseer nie
1983	Nie gekwalifiseer nie
1987	Nie gekwalifiseer nie
1992	Nie gekwalifiseer nie
1996	Nie gekwalifiseer nie
1999	Nie gekwalifiseer nie
2003	Nie gekwalifiseer nie
2007	Groepfase
2011	Nie gekwalifiseer nie
2015	Nie gekwalifiseer nie
2019	Nie gekwalifiseer nie
2023	Nie gekwalifiseer nie
2027	Nie gekwalifiseer nie
2031	N.v.t.

Kampioenetrofeerekord

Jaar	Uitslag
1998	Nie gekwalifiseer nie
2000	Nie gekwalifiseer nie
2002	Nie gekwalifiseer nie
2004	Nie gekwalifiseer nie
2006	Nie gekwalifiseer nie
2009	Nie gekwalifiseer nie
2013	Nie gekwalifiseer nie
2017	Nie gekwalifiseer nie
2025	Nie gekwalifiseer nie
2029	N.v.t.

T20I-rekord teen ander lande

Teenstander	Wedstryde	Gewen	Verloor	Gelykop	Onbeslis	% Gewen	Eerste T20I-oorwinning
t. Toetslande
Ierland	1	0	1	0	0	0,00	–
t. Assosiaatlede
Argentinië	4	4	0	0	0	100,00	14 November 2021
Bahamas	2	2	0	0	0	100,00	10 November 2021
Belize	1	1	0	0	0	100,00	13 November 2021
Kaaimanseilande	4	4	0	0	0	100,00	21 Augustus 2019
Kanada	6	1	4	0	1	16,67	30 September 2023
Kenia	1	0	1	0	0	0,00	–
Namibië	1	0	1	0	0	0,00	–
Nederland	1	0	1	0	0	0,00	–
Panama	4	4	0	0	0	100,00	11 November 2021
Papoea-Nieu-Guinee	1	0	1	0	0	0,00	–
Singapoer	1	0	1	0	0	0,00	–
Skotland	2	0	2	0	0	0,00	–
Verenigde State	3	2	1	0	0	66,67	18 Augustus 2019
Algeheel	32	18	13	0	1	56,25	18 Augustus 2019
Rekords volledig tot en met T20I #2494 op 4 Maart 2024. Gelykop verwys na wedstryde wat deur ’n valbyl (soos ’n Superboulbeurt) beslis is. Wenpersentasies sluit onbesliste wedstryde uit en tel gelykop as ’n halwe oorwinning (ongeag die valbyl).[88]

T20I-wêreldbekerrekord

Jaar	Uitslag
2007	Nie gekwalifiseer nie
2009	Nie gekwalifiseer nie
2010	Nie gekwalifiseer nie
2012	Nie gekwalifiseer nie
2014	Nie gekwalifiseer nie
2016	Nie gekwalifiseer nie
2021	Nie gekwalifiseer nie
2022	Nie gekwalifiseer nie
2024	Nie gekwalifiseer nie
2026	N.v.t.
2028	N.v.t.
2030	N.v.t.

Sien ook

Krieketportaal

Verwysings

1. (en) Mehluli Sibanda (29 Februarie 2024). "Disappointed coach Cal Waldron urges cricketers to play with pride". The Royal Gazette. Besoek op 4 Maart 2024.
2. (en) "ICC unveils Global Men's T20I Rankings Table featuring 80 teams". Internasionale Krieketraad. Besoek op 4 Maart 2024.
3. (en) "ICC Rankings". Internasionale Krieketraad.
4. (en) "ODI matches – Team records". ESPNcricinfo.
5. (en) "ODI matches – 2024 Team records". ESPNcricinfo.
6. (en) "T20I matches – Team records". ESPNcricinfo.
7. (en) "T20I matches – 2024 Team records". ESPNcricinfo.
8. (en) Will Luke (Maart 2007). "Cricket by association". The Wisden Cricketer. Geargiveer vanaf die oorspronklike op 10 Desember 2007. Besoek op 10 Desember 2007.
9. (en) "Other matches played by Bermuda". Cricket Archive. Geargiveer vanaf die oorspronklike op 9 Maart 2016. Besoek op 4 September 2015.
10. (en) "First-class matches played by Bermuda". Cricket Archive. Geargiveer vanaf die oorspronklike op 30 Junie 2021. Besoek op 30 Junie 2021.
11. (en) "All T20 matches between ICC members to get international status". Internasionale Krieketraad. 26 April 2018. Besoek op 4 Maart 2024.
12. (en) "Men's T20I Team Rankings". Internasionale Krieketraad. 28 Februarie 2024. Besoek op 4 Maart 2024.
13. (en) "Bermuda Cricket Board". Internasionale Krieketraad. Besoek op 4 Maart 2024.
14. (en) "West Indies as separate cricketing countries?". Emerging Cricket. 8 Julie 2020. Besoek op 4 Maart 2024.
15. (en) Martin Williamson (11 Januarie 2006). "The Under-19 World Cup". ESPNcricinfo. Besoek op 4 Maart 2024.
16. (en) "Bermuda Cricket Board". Internasionale Krieketraad. Besoek op 4 Maart 2024.
17. (en) "A Timeline of Bermuda Cricket". Cricket Europe. Geargiveer vanaf die oorspronklike op 13 Augustus 2011. Besoek op 13 Augustus 2011.
18. (en) "Other matches played by Bermuda". Cricket Archive. Geargiveer vanaf die oorspronklike op 9 Maart 2016. Besoek op 4 September 2015.
19. (en) "Cricket in Bermuda". ESPNcricinfo. 6 Oktober 2006. Besoek op 4 Maart 2024.
20. (en) "Alma Hunt". ESPNcricinfo. Besoek op 4 Maart 2024.
21. (en) Ira Philip (1987). Freedom Fighters (From Monk To Mazumbo). Akira Press. p. 150. ISBN 978-0-947638-42-9.
22. (en) "Bermuda's maiden First-class match". Emerging Cricket. 14 April 2020. Besoek op 4 Maart 2024.
23. (en) "New Zealand in Bermuda, 1971/72: Bermuda v New Zealanders". ESPNcricinfo. Besoek op 4 Maart 2024.
24. (en) Ira Philip (1987). Freedom Fighters (From Monk To Mazumbo). Akira Press. p. 152. ISBN 978-0-947638-42-9.
25. (en) Tony Munro (13 Augustus 2000). "Canada win inaugural Americas Cup". ESPNcricinfo. Besoek op 4 Maart 2024.
26. (en) "Draw puts Canada in semi-finals". ESPNcricinfo. 16 Augustus 2004. Besoek op 4 Maart 2024.
27. (en) "Suji's ton drives Kenya to final". ESPNcricinfo. 25 Oktober 2005. Besoek op 4 Maart 2024.
28. (en) "Racism, rows and a walk-off tarnish 'friendly' one-dayers". ESPNcricinfo. 30 Oktober 2005. Besoek op 4 Maart 2024.
29. (en) "Bermuda's allegations 'rejected with contempt'". ESPNcricinfo. 4 November 2005. Besoek op 4 Maart 2024.
30. (en) "Bermuda await inspection on national ground". ESPNcricinfo. 21 Maart 2008. Besoek op 4 Maart 2024.
31. (en) "2nd Match, Port of Spain, May 17, 2006, ICC Tri-Series (in West Indies)". ESPNcricinfo. 17 Mei 2006. Besoek op 4 Maart 2024.
32. (en) "3rd Match, Port of Spain, May 18, 2006, ICC Tri-Series (in West Indies)". ESPNcricinfo. 18 Mei 2006. Besoek op 4 Maart 2024.
33. (en) "Final, Port of Spain, May 20, 2006, ICC Tri-Series (in West Indies)". ESPNcricinfo. 20 Mei 2006. Besoek op 4 Maart 2024.
34. (en) Martin Williamson (14 November 2006). "Ageless Tikolo turns back the clock". ESPNcricinfo. Besoek op 4 Maart 2024.
35. (en) Rod Lyall (24 November 2006). "Ten Doeschate hits another century". Cricket Europe. Geargiveer vanaf die oorspronklike op 26 November 2006. Besoek op 26 November 2006.
36. (en) "Bermuda earn consolation win". ESPNcricinfo. 3 Desember 2006. Besoek op 4 Maart 2024.
37. (en) "Rampant Kenyans rout dismal Bermuda". ESPNcricinfo. 29 Januarie 2007. Besoek op 4 Maart 2024.
38. (en) "4th Match, Nairobi (Jaff), Jan 31 2007, ICC World Cricket League Division One". ESPNcricinfo. 31 Januarie 2007. Besoek op 4 Maart 2024.
39. (en) "7th Match, Nairobi (Gym), Feb 2 2007, ICC World Cricket League Division One". ESPNcricinfo. 2 Februarie 2007. Besoek op 4 Maart 2024.
40. (en) "10th Match, Nairobi (Ruaraka), Feb 4 2007, ICC World Cricket League Division One". ESPNcricinfo. 4 Februarie 2007. Besoek op 4 Maart 2024.
41. (en) "Hussain reprimanded for dissent". ESPNcricinfo. 5 Februarie 2007. Besoek op 4 Maart 2024.
42. (en) "ICC World Cricket League – Points Table". ESPNcricinfo. Besoek op 4 Maart 2024.
43. (en) "Shahriar ton puts Bermuda in their place". ESPNcricinfo. 25 Februarie 2007. Besoek op 4 Maart 2024.
44. (en) "Samad sets up tight Canada victory". ESPNcricinfo. 26 Februarie 2007. Besoek op 4 Maart 2024.
45. (en) "Bermuda crumble for 45". ESPNcricinfo. 4 Maart 2007. Besoek op 4 Maart 2024.
46. (en) "Williams eases Zimbabwe to victory". ESPNcricinfo. 8 Maart 2007. Besoek op 4 Maart 2024.
47. (en) Siddhartha Vaidyanathan (15 Maart 2007). "Sri Lanka storm to 243-run win". ESPNcricinfo. Besoek op 4 Maart 2024.
48. (en) Anand Vasu (19 Maart 2007). "Virender Sehwag stars in thumping India win over Bermuda". ESPNcricinfo. Besoek op 4 Maart 2024.
49. (en) George Binoy, HR Gopalakrishna (19 Maart 2007). "Sehwag sizzles in record-breaking win". ESPNcricinfo. Besoek op 4 Maart 2024.
50. (en) Mohammad Isam (6 Januarie 2015). "The catch that shook the world". ESPNcricinfo. Besoek op 4 Maart 2024.
51. (en) Jamie Alter (25 Maart 2007). "Bangladesh storm into Super Eight". ESPNcricinfo. Besoek op 4 Maart 2024.
52. (en) "Netherlands brush Bermuda aside to sweep series". ESPNcricinfo. 20 Augustus 2007. Besoek op 4 Maart 2024.
53. (en) "Wise Tikolo edges thriller for Kenya". ESPNcricinfo. 28 Oktober 2007. Besoek op 4 Maart 2024.
54. (en) "ICC Intercontinental Cup 2007–2008/09 Table". ESPNcricinfo. Besoek op 4 Maart 2024.
55. (en) "Bermuda Cricket Calendar". Cricket Europe. Geargiveer vanaf die oorspronklike op 20 April 2007. Besoek op 1 Mei 2007.
56. (en) "Youthful Uganda humiliate Bermuda's old guard". ESPNcricinfo. 24 Oktober 2007. Besoek op 4 Maart 2024.
57. (en) "Samad ton gives Canada consolation win". ESPNcricinfo. 2 Julie 2008. Besoek op 4 Maart 2024.
58. (en) "ICC impressed by improving Associates". ESPNcricinfo. 6 Augustus 2008. Besoek op 4 Maart 2024.
59. (en) "ten Doeschate stars in Netherlands win". ESPNcricinfo. 8 Augustus 2008. Besoek op 4 Maart 2024.
60. (en) "Debutants star in Canada victory". ESPNcricinfo. 19 Augustus 2008. Besoek op 4 Maart 2024.
61. (en) "Sarwan seals West Indies success". ESPNcricinfo. 21 Augustus 2008. Besoek op 4 Maart 2024.
62. (en) "USA claim Americas title". ESPNcricinfo. 1 Desember 2008. Besoek op 4 Maart 2024.
63. (en) "Ireland ease closer to 2011 World Cup". ESPNcricinfo. 13 April 2009. Besoek op 4 Maart 2024.
64. (en) "Bermuda lose ODI status after defeat". ESPNcricinfo. 8 April 2009. Besoek op 4 Maart 2024.
65. (en) "ICC Intercontinental Shield 2009–2010/11". ESPNcricinfo. Besoek op 4 Maart 2024.
66. (en) "Scotland claim fifth in dramatic finish". ESPNcricinfo. 23 Maart 2012. Besoek op 4 Maart 2024.
67. (en) "Bermuda players' commitment questioned". ESPNcricinfo. 17 April 2011. Besoek op 4 Maart 2024.
68. (en) "Airee, Vesawkar carry Nepal to Div 3 title". ESPNcricinfo. 6 Mei 2013. Besoek op 4 Maart 2024.
69. (en) "Ahmed five-for helps USA avoid last-place finish". ESPNcricinfo. 26 November 2013. Besoek op 4 Maart 2024.
70. (en) "Nepal claim title despite Mukasa's all-round show". ESPNcricinfo. 30 Oktober 2014. Besoek op 4 Maart 2024.
71. (en) Peter Della Penna (14 Mei 2015). "Individuals impress, but USA miss Canada's depth". ESPNcricinfo. Besoek op 4 Maart 2024.
72. (en) Peter Della Penna (6 November 2016). "USA hold off Oman to claim WCL Division Four title". ESPNcricinfo. Besoek op 4 Maart 2024.
73. (en) Peter Della Penna (24 Oktober 2019). "MacLeod passes 1000 runs and sends Bermuda packing". ESPNcricinfo. Besoek op 4 Maart 2024.
74. (en) Peter Della Penna (20 Oktober 2018). "Associates pathway to 2023 World Cup undergoes major revamp". ESPNcricinfo. Besoek op 4 Maart 2024.
75. (en) "ICC Men's T20 World Cup Americas Region Qualifier 2021/22". ESPNcricinfo. Besoek op 4 Maart 2024.
76. (en) "Win against Bermuda ends a perfect week for Jersey Cricket". Jersey Evening Post. 27 Junie 2022. Besoek op 4 Maart 2024.
77. (en) Tom Grunshaw (28 Junie 2022). "Challenge League B – Jersey clean sweep sets up thrilling finale". Emerging Cricket. Besoek op 4 Maart 2024.
78. (en) "Dhaliwal, Sana star as Canada qualify for T20 World Cup for the first time in their history". ESPNcricinfo. 8 Oktober 2023. Besoek op 8 Oktober 2023.
79. (en) Cleon Scotland (2 Maart 2024). "Sorry Bermuda consigned to World Cup purgatory". The Royal Gazette. Besoek op 4 Maart 2024.
80. (en) "Records / Bermuda / One-Day Internationals / Most Runs". ESPNcricinfo. Besoek op 4 Maart 2024.
81. (en) "Records / Bermuda / Twenty20 Internationals / Most Runs". ESPNcricinfo. Besoek op 4 Maart 2024.
82. (en) "Records / Bermuda / One-Day Internationals / Most Wickets". ESPNcricinfo. Besoek op 4 Maart 2024.
83. (en) "Records / Bermuda / Twenty20 Internationals / Most Wickets". ESPNcricinfo. Besoek op 4 Maart 2024.
84. Die tydperk verwys na die ooreenstemmende krieketseisoen waarin die eerste of laaste wedstryd van die tyd as kaptein gespeel is.
85. (en) "Records / Bermuda / One-Day Internationals / List of Captains". ESPNcricinfo. Besoek op 4 Maart 2024.
86. (en) "Records / Bermuda / Twenty20 Internationals / List of Captains". ESPNcricinfo. Besoek op 4 Maart 2024.
87. (en) "Records / Bermuda / ODI matches / Result summary". ESPNcricinfo. 3 Maart 2024. Besoek op 4 Maart 2024.
88. (en) "Records / Bermuda / Twenty20 Internationals / Result summary". ESPNcricinfo. 4 Maart 2024. Besoek op 4 Maart 2024.

Eksterne skakels

Wikimedia Commons bevat media in verband met Bermudaanse nasionale krieketspan.

• (en) Amptelike webwerf van die Bermudaanse Krieketraad
• (en) Bermuda op ESPNcricinfo
• (en) Bermuda by die IKR