Billy Graham

Billy Graham
Billy Graham in 1993
Gebore
William Franklin Graham Jr.

(1918-11-07)7 November 1918
Charlotte, Noord-Carolina
Sterf21 Februarie 2018 (op 99)
Montreat, Noord-Carolina
NasionaliteitVlag van Verenigde State van Amerika Verenigde State
BeroepEvangelis
TitelDoktor (ere)
EggenootRuth Graham (1943–2007; haar dood)
KindersVirginia, Anne, Ruth Graham, William III, and Nelson
Ouer(s)William Franklin Graham, Sr.
Morrow, née Coffey
Webwerfwww.billygraham.org
Handtekening

William Franklin Graham, Jr., ook bekend as Billy Graham (1918-2018), was 'n Amerikaanse evangelis en wêreldbekende godsdienstige en politieke leier.

Belangrikste prestasies

[wysig | wysig bron]

Hy het die Evangelie van Christus aan meer mense as enigiemand anders in die geskiedenis gepreek.[2] Meer as 210 miljoen mense in meer as 185 lande en gebiede, waaronder elke land van die voormalige Oosblok, het sy stem gehoor en sy gesig gesien.

Ontelbare miljoene meer is deur televisie, video, boeke en rolprente bereik. Hy het vriende gemaak met verskeie wêreldleiers waaronder koningin Elizabeth II van die Verenigde Koninkryk, die Pous en amper elke Amerikaanse president na Truman. Hy het ook verskeie toekennings en eredoktorate van verskeie instellings in die Verenigde State en oorsee ontvang.

Lewensgeskiedenis

[wysig | wysig bron]
Franklin Graham saam met sy vader Billy in Cleveland, Ohio, 1994
Billy Graham ontmoet met president Barack Obama in 2010

William Franklin Graham jr (Billy) is op 7 November 1918 gebore as seun van William Franklin en Morrow Coffey Graham. Sy pa, 'n suksesvolle boer en sakeman, het 'n melkplaas in Charlotte, Noord-Carolina, begin waar Billy, sy broer en twee sussies groot geword het.

In 1934, op die ouderdom van sestien, het Graham sy lewe aan Jesus Christus toegewy deur die opwekkingsdienste van Mordecai Fowler Ham, 'n kontroversiële reisende evangelis wat Charlotte besoek het.

In die herfs van 1936 het hy begin om die fundamentalistiese skool, Bob Jones Kollege, by te woon, maar na 'n paar maande opgehou weens die klimaat en Dr Jones se streng reëls. Daarna het hy oorgegaan na Florida Bybelskool waar hy in 1939 tydens die Suidelike Baptiste Konvensie verordineer is. Ter uitbreiding van sy onderrig, is hy na Wheaton Kollege in Illinois waar hy in 1943 met 'n BA in antropologie gegradueer het.

Op 13 Augustus 1943 is hy met Ruth McCue Bell, 'n medestudent en die dogter van 'n sendelingchirurg, getroud. In dieselfde jaar word hy pastoor van die Eerste Baptiste Kerk van Western Springs, Illinois, sy eerste en laaste pastoraat.

Na sy graduering, het Graham aangesluit by Jeug vir Christus, 'n organisasie wat ontstaan het uit die Christelike byeenkomste wat in die middelveertigerjare regoor die land vir weermagmans en ander jong mense gehou is. In 1945 het Graham buiteverteenwoordiger van Jeug vir Christus Internasionaal geword en begin om JVC-byeenkomste te reël en toesprake te lewer.

Graham het hom in 1949 tot grootskaalse evangelisme gewend en 'n reeks toere in die Verenigde State en Europa onderneem. Sy charismatiese persoonlikheid, selfvertroue en welsprekendheid het gehore van tot honderde duisende mense getrek en sy kruistogte is dikwels vir weke verleng.

Graham het in 1950 die Billy Graham Evangelistiese Assosiasie (BGEA) begin. Afgesien van kruistogte en evangelistiese byeenkomste, sluit BGEA se aktiwiteite ook die volgende in:

  • televisie-uitsendings van byeenkomste;
  • die produksie en verspreiding van evangelistiese rolprente;
  • Decision tydskrif wat 'n sirkulasie van 1,7 miljoen in 160 lande het;
  • 'n weeklikse radioprogram wat deur meer as 600 stasies in die hele wêreld uitgesaai word; en
  • 'n sindikaatkoerantrubriek met 'n gekombineerde sirkulasie van meer as vyf miljoen lesers.

Billy Graham het ook 24 boeke geskryf wat almal topverkopers geword het.

Sy vrou Ruth is oorlede. Hulle het drie dogters, twee seuns, negentien kleinkinders en verskeie agterkleinkinders.

Verwysings

[wysig | wysig bron]
  1. ↑ celebritynetworth.com: Billy Graham Net Worth
  2. ↑ "BILLY GRAHAM: A MAN WITH A MISSION.(SPECIAL SECTION)" (in Engels). Cincinnati Post. 27 Junie 2002. Geargiveer vanaf die oorspronklike op 28 Maart 2015. Besoek op 18 Augustus 2007.

Eksterne skakels

[wysig | wysig bron]