Buffelspoort
Buffelspoort in die Wes-Kaap is die mees westelike van vyf poorte waar rivierlope reg deur die Swartberge-reeks kerwe. Die ander is die Seweweekspoort, Die Poort, waar die Gamkarivier Die Hel oorsteek, Meiringspoort, en Snykloof in die verre ooste van die bergreeks.
Die diep kloof is in die Klein-Swartberge, sowat 10 km van die westelike limiet van die Swartberge-reeks geleë. Nadat dit die Floriskraaldam verlaat, loop die Buffelsrivier die Swartberge se voetheuwels, oftelwel Wit Nekke, binne voor dit Buffelspoort uit die noorde bereik.[1][2] Die 9 km lange kloof verbind die noordelike voetheuwels van die Swartberg met die Klein-Karoo in die suide, waar die Buffelsrivier die poort verlaat. Stroomaf van hierdie punt staan die Buffels as die Grootrivier bekend.
Die plantegroei van hierdie afgeleë en ongerepte kloof bestaan oorwegend uit spesies van die dorre, vetplantryke Gamkaruigte-bioom, en sluit etlike lokaal-endemiese plante in, waaronder Astroloba cremnophila.[3]
Die poort moet nie met dié van Buffelspoortdam, 'n onverwante en verafgeleë landvorm in die nabye van Marikana, Noord-Wes, verwar word nie.
Verwysings
[wysig | wysig bron]- ↑ G. Ross: Romance of Cape Mountain Passes. New Africa Books, 2004. p. 155.
- ↑ P. Raper, T. du Plessis: Dictionary of Southern African Place Names. Jonathan Ball-uitgewers, 2014.
- ↑ E. van Jaarsveld: Astroloba cremnophila, a new cliff dwelling succulent from the Klein Karoo (Western Cape, South Africa). Bradleya 33/2015, Januarie 2015.