Capoeira

'n Capoeira

Capoeira of die krygsdans. Skildery deur Johann Moritz Rugendas (1825)

Capoeira is 'n Brasiliaanse mengsel van dans- en vegkuns wat op die maat van musiek beoefen word. Dit het sy oorsprong in NíGolo ("Sebradans"), 'n dans van Afrika.

Capoeira is gedurende die koloniale tydperk deur slawe beoefen wat na Brasilië verskeep is en in dié Suid-Amerikaanse land verder ontwikkel. Daar is tans twee hoofstyle van Capoeira - die tradisionele Capoeira Angola en die moderne Capoeira Regional. Afrika-elemente het in die Capoeira Regional vanaf die 1970's saamgesmelt met invloede uit ander vegkunste soos stoei, jioe-jitsoe en wushu. Die kenmerkende akrobatiese elemente, wat met Capoeira verbind word, het eweneens in hierdie tydperk begin ontwikkel.

Capoeira behels drie verskillende vlakke: vegkuns, musiek en roda (Portugees: "kring"), die sosiale geleentheid waartydens Capoeira beoefen word. Die roda of kring, waarbinne twee dansers (Capoeiristas) veg, word deur ander dansers en musikante gevorm. Die liedere, wat tydens die dansgevegte gesing word, dateer dikwels nog uit die tyd van slawerny.