Domrémy-la-Pucelle

Domrémy-la-Pucelle
Die geboortehuis van Johanna van Arkel is tans 'n museum
Wapen
Domrémy-la-Pucelle
Koördinate: 48°26′35″N 5°40′33″O / 48.44306°N 5.67583°O / 48.44306; 5.67583
Land	Frankryk
Gewes	Grand Est
Département	Vosges
Arrondissement	Neufchâteau
Kanton	Coussey
Regering
• Burgemeester	Daniel Coince
Oppervlak
• Totaal	8,99 km^2 (3,47 vk. myl)
Hoogte	268–407 m (879–1 335 ft)
Bevolking
• Totaal	153
• Digtheid	17/km^2 (40/vk. myl)
Poskode	88630
Skakelkodes	88154

Domrémy-la-Pucelle is 'n Franse dorpie en munisipaliteit in die département Vosges in die gewes Grand Est. Die dorpie het 'n bevolking van 153 inwoners (2008) en 'n oppervlakte van 8,99 km². Die inwoners word in Frans Domrémois genoem.

Geografie

Domrémy is in die vallei van die Maas-rivier (Frans: Meuse) noord van Coussey geleë. Die westelike dorpsgebied behels 'n heuwelagtige bosgebied met 'n maksimale hoogte van 407 meter bo seevlak wat bo-oor die nabygeleë dorpie Les Roises verrys.

Geskiedenis

Domrémy staan bekend as die geboortedorp van Frankryk se nasionale heldin Johanna van Arkel en het die bynaam 'la Pucelle' gekry wat in Frans as 'n sinoniem vir die Jonkvrou van Orléans (la Pucelle d'Orléans) gebruik word. Die dorp se omgewing staan bekend as die Pays de Jeanne ('Johannaland').

In die 15de eeu – die tydperk van Johanna van Arkel – was die parogie in twee gedeeltes verdeel, waarvan een deur die graafskap Champagne oorheers is, terwyl die ander deel uitgemaak het van die Franse gedeelte van die hertogdom Bar. Johanna het bekend gestaan vir haar vroomheid en haar gewoonte om elke Saterdag na die kapel van Bermont naby Greux te gaan waar sy gebid het.

Die noordelike gedeelte van Domrémy, waar die geboortehuis van Johanna staan, is ter geleentheid van haar verheffing tot die adelstand deur koning Karel VII van Frankryk net ná sy bekroning tot by die jaar 1571 van alle belastings bevry. Die stad Greux het tot by die jaar 1766 hierdie voorreg geniet aangesien dit steeds op Franse gebied geleë was, terwyl Domrémy, wat in 1571 amptelik by die Hertogdom Opper-Lotaringe ingelyf is, op hierdie tydstip sy belastingvryheid weer kwytgeraak het – Lotaringe het destyds nog deel van die Heilige Romeinse Ryk uitgemaak en het eers sowat twee eeue later onder koning Lodewyk XV van Frankryk weer 'n Franse gebied geword. Die parogie van Domrémy is in 1578 amptelik herdoop tot Domrémy-la-Pucelle.

Op die plek bo-oor die dorp, waar Johanna na bewering haar goddelike visioene gehad het, is teen die begin van die 20ste eeu die basiliek van Bois-Chenu opgerig. Besoekers kan vanuit die kerk 'n pragtige uitsig in oostelike rigting oor die heuwellandskap van Lotaringe geniet.

Besienswaardighede

• 
  Die heilige Sebastiaan se marteldood word in die kerk van Domrémy-la-Pucelle uitgebeeld
• 
  Die kerk Saint-Rémy (Sint Remigius)
• 
  Die kerk se doopvont waar Johanna van Arkel die doop ontvang het
• 
  Die fasade van die basiliek Bois-Chenu wat ook die "basiliek van die heilige Johanna van Arkel" genoem word
• 
  Die kerkskip van die basiliek
• 
  Die uitsig vanuit die basiliek se terras
• 
  Domrémy – die Maasrivier se watervolume het vanweë die sterk herfsreën gestyg
• 
  Domrémy: Johanna van Arkel luister na die hemelse stem
• 
  Domrémy – die dorpskerk waar Johanna die doop ontvang het
• 
  Die kerk van Domrémy met 'n standbeeld van die heilige Eliphius van Rampillon wat ná sy onthoofding sy hoof in sy hande hou

Bronne

• Hierdie artikel, of gedeeltes daarvan, is uit die volgende Wikipedia-artikel vertaal: Domrémy-la-Pucelle

Eksterne skakels

• Wikimedia Commons het meer media in die kategorie Domrémy-la-Pucelle.