G8-spitsberaad in Heiligendamm 2007
Die G8-spitsberaad in Heiligendamm 2007 is die 33ste spitsberaad van die Groep van Agt se regeringshoofde, wat tussen 6 en 8 Junie 2007 in Heiligendamm (Duitsland) plaasgevind het. Die spitsberaad onder die presidentskap van die Duitse bondskanselier Angela Merkel het "Groei en Verantwoordelikheid" as sy hooftemas behandel. Die Duitse regering het vooraf ekonomiese vraagstukke en ontwikkelingshulp vir Afrika as die belangrikste onderwerpe genoem.
Vir die spitsberaad is spesiale veiligmaatreëls getref, aangesien teenstanders van globalisering vooraf betogings aangekondig het om die spitsberaad te ontwrig. Gedurende gewelddadige betogings in die hawestad Rostock (Mecklenburg-Voorpommeren) is reeds dae voor die spitsberaad 520 betogers en 433 polisiemanne as gevolg van klipgooiery beseer.[1] Die onluste het uitgebreek nadat sogenaamde "outonome groepe", gewelddadige betogers, die polisie met klippe bestook het.
Agenda
[wysig | wysig bron]| Groep van Agt (G8) |
|---|
 |
 Duitsland – Angela Merkel
|
 Frankryk – Nicolas Sarkozy
|
 Italië – Romano Prodi
|
 Japan – Shinzō Abe
|
.svg){kind=small} Kanada – Stephen Harper
|
 Russiese Federasie – Vladimir Poetin
|
 Verenigde State – George W. Bush
|
.svg){kind=small} Verenigde Koninkryk – Tony Blair
|
Klimaatbeskerming
[wysig | wysig bron]Aangesien die Kyoto-protokol in 2012 sal eindig, het die Duitse bondskanselier vooraf 'n oproep aan die regeringshoofde van die belangrikste nywerheids- en ontwikkelende lande gedoen om hulle storting van kweekhuisgasse drasties te verminder.
Globalisering
[wysig | wysig bron]Bondskanselier Angela Merkel pleit vir 'n liberale ekonomiese wêreldorde, en volgens haar moet die oopheid van die handel gepaardgaan met 'n billike en regverdige beslegting van geskille en die internasionale handhawing van sekere sosiale en ekologiese norme.
Buitelandse beleid
[wysig | wysig bron]Die belangrikste internasionale vraagstukke het die onluste in die Gasastrook, Palestynse missielaanvalle op Israel, die politieke situasie in Libanon en Iran se kernprogram ingesluit.
Afrika
[wysig | wysig bron]Die G8-state het vooraf aangekondig dat die ontwikkelingshulp vir Afrika hersien sal moet word. Die G8-state gaan hulle in die toekoms konsentreer op Afrikalande wat politieke en ekonomiese hervorming steun. Bereidheid tot goeie regering en die skepping van 'n klimaat wat beleggings bevorder, die stryd teen MIV/Vigs en vrede en veiligheid is die belangrikste sleutelwoorde in hierdie verband.
Gevorderde ontwikkelende lande
[wysig | wysig bron]Gevorderde ontwikkelende lande wat deur 'n sterk ekonomiese groei gekenmerk word – soos byvoorbeeld die Volksrepubliek China, Indië, Brasilië, Meksiko en Suid-Afrika – sal volgens die G8-state 'n groter rol by onderhandelinge speel. Nogtans sal die Groep van Agt geen nuwe lidlande aanvaar nie.
Veiligheidsmaatreëls
[wysig | wysig bron]In Duitsland is onder meer die veiligheidsmaatreëls in verband met die spitsberaad gekritiseer. 16 000 polisiemanne, 1 100 soldate, 'n Duitse fregat, twaalf patrolliebote en twee Amerikaanse Vlootskepe is vir die driedaagse spitsberaad benodig. Heiligendamm is deur middel van 'n omheining met 'n totale lengte van twaalf kilometer en 'n seespergebied met 'n oppervlakte van 280 vierkante kilometer teen aanvallers en betogers beskerm. Die totale koste van die veiligheidsmaatreëls het 92 miljoen € beloop.[2]
Verwysings
[wysig | wysig bron]- ↑ "Der blutige Auftakt des G8-Gipfels, Berliner Morgenpost, 4 Junie 2007". Geargiveer vanaf die oorspronklike op 30 September 2007. Besoek op 6 Junie 2007.
- ↑ Berliner Morgenpost, 6 Junie 2007: Heiligendamm: Das ist der Gipfel
Bronne
[wysig | wysig bron]- Heiligendamm: Das ist der Gipfel. Berliner Morgenpost, 6 Junie 2007 Geargiveer 30 September 2007 op Wayback Machine