Galway
Galway Gaillimh (Iers-Gaelies) | |
|---|---|
Stad | |
 Die Galway-katedraal | |
 Seël | |
| Byname: City of Tribes | |
  Galway | |
| Koördinate: 53°16′19″N 9°2′56″W / 53.27194°N 9.04889°W | |
| Land |  Republiek van Ierland |
| Provinsie | Connacht |
| Graafskap | Galway |
| Stigting | 1124 |
| Anglo-Normandiese besetting | 1234 |
| Stadstatus | 1396 |
| Regering | |
| • Tipe | Stadsraad en burgemeester |
| • Burgemeester | Cllr Pearce Flannery |
| Oppervlak | |
| • Totaal | 50,6 km2 (19,5 vk. myl) |
| Hoogte | 0 m (0 ft) |
| Bevolking | |
| • Totaal | 75 529 |
| Tydsone | UTC+00:00 (WET) |
| • Somertyd | UTC+01:00 (IST) |
| Skakelkodes | 091 |
| Webwerf | galwaycity.ie |
Galway ([ˈgɔlweɪ]; Iers: Gaillimh [ˈɡalʲɪvʲ]) is die grootste stad van Wes-Ierland en die administratiewe setel en naamgewende nedersetting vir die omliggende graafskap met 'n bevolking van meer as 75 000 volgens die Ierse sensus van 2011. Galway, wat in die historiese provinsie Connacht geleë is en dikwels Ierland se "Poort na die Weste" genoem word, is aan weerskante van die Corrib-rivier geleë wat die gelyknamige meer (Lough Corrib) met die see verbind.
As nedersetting het Galway rondom 'n middeleeuse Ierse vesting ontstaan wat in 1124 opgerig is. Sowat een eeu lank was dit niks meer as 'n onbeduidende vissersdorpie nie. Eers met die Anglo-Normandiese besetting in 1234 het dit tot 'n strategies belangrike nedersetting as Engeland se voorpos in Ierland se onrustige weste ontwikkel. In 1396 het koning Richard III stadstatus aan Galway verleen en die politieke mag in die hande van veertien leidende koopmansgesinne van Engelse afkoms gelê wat in 'n voortdurende stryd met Ierse clans in die omgewing gewikkel was.[1] Na dié gesinne is as die Tribes of Galway ("Stamme van Galway") verwys, en sodoende het Galway die bynaam City of the Tribes gekry.[2] Iere is uit die stad verban.
Galway het sy onafhanklikheid ook in die 15de eeu gehandhaaf toe die Engelse invloed gaandeweg afgeneem het. Die stad het in dié tyd handelsbande met Spanje en Portugal aangeknoop waarheen die seuns van leidende gesinne vir hul skoolopleiding gestuur is. Die lojaliteit teenoor die Britse kroon was vir Galway gedurende die Engelse Burgeroorlog rampspoedig. In 1652 is die stad nege maande lank deur republikeinse troepe onder bevel van Oliver Cromwell beleër en uiteindelik ingeneem. Veertig jaar later is Galway deur Willem van Oranje se magte beset. Die oorlogshandelinge, die verlies van sy Suid-Europese markte en die groot Ierse hongersnood in die 1840's het Galway se ekonomie 'n nekslag toegedien waaruit die stad eers gedurende Ierland se ekonomiese opswaai in die laat 20ste eeu herstel het.
Vandag is Galway 'n gewilde bestemming vir inheemse en buitelandse toeriste. 'n Besondere kenmerk is die stadsbeeld wat argitektonies in tweeverdeel is – die oostelike rivieroewer word deur nou straatjies en ou steengeboue met winkelfasades van hout oorheers, terwyl daar in die stadsdeel Claddagh langs die wesoewer hoofsaaklik nuwe geboue aangetref word. Die historiese stadskern word omring deur uitgebreide voorstede met skakelhuise. Net suidwes van Galway is die gewilde strand- en vermaakoord Salthill geleë.
Verwysings
[wysig | wysig bron]- ↑ Ralph-Raymond Braun: Irland. Erlangen: Michael Müller Verlag 2012, bl. 477
- ↑ Encyclopædia Britannica: Galway. Besoek op 23 Maart 2015
