Giorgio Armani

Giorgio Armani
Gebore11 Julie 1935
Piacenza, Emilia-Romagna
NasionaliteitItalië
BeroepModeontwerper
Bekend virSuksesvolste Italiaanse ontwerper

Giorgio Armani (gebore 11 Julie 1935) is 'n Italiaanse ontwerper. Hy is veral bekend vir sy manspakke, wat baie gesog en peperduur is.[1] Sy bekendste handelsmerke is "Giorgio Armani" en "Emporio Armani". Naas klere sluit sy sakeryk ook brille, horlosies, skoonheidsmiddels, parfuum en juwele in. Sy ontwerpe is bekend vir hul skoon, gestileerde lyne.

Armani is in die Noord-Italiaanse dorpie Piacenza in Emilia-Romagna gebore. Hy studeer aanvanklik medisyne, maar verruil dit later vir fotografie. Hy begin sy maatskappy, Armani, in 1974. In 2001 is hy, met 'n jaarlikse omset van $1,691 triljoen,[2] as die suksesvolste ontwerper wat Italië opgelewer het beskryf.[3]

Armani se plaket op die Rodeo Drive Walk of Style.

In 1996 is Armani saam met verskeie ander mode-ontwerpers van korrupsie aangekla. Hy herstel van die terugslag en word in 2002 tot Goodwill Ambassador vir die Verenigde Nasies se vlugteling-program benoem. In September 2003 is hy in Beverly Hills met die eerste Walk of Style Award vereer vir sy bydraes tot die mode en vermaaklikheidswêreld. 'n Plaket met sy naam daarop is tydens die geleentheid op die nuwe Rodeo Drive Walk of Style aangebring.

Armani in 2009

In 2016 onderneem hy om nie meer pelse van diere in sy modereekse te gebruik nie, maar om na sintetiese alternatiewe oor te skakel.[4]

Verwysings

[wysig | wysig bron]
  1. ↑ HAT Taal-en-feitegids, Pearson, Desember 2013, ISBN 978-1-77578-243-8
  2. ↑ "Giorgio Armani". The World's Billionaires (in Portugees). Forbes. Maart 2012. Geargiveer vanaf die oorspronklike op 16 April 2020. Besoek op 30 April 2012.
  3. ↑ Craven, Jo (11 Mei 2011). "Giorgio Armani biography" (in Engels). Vogue. Geargiveer vanaf die oorspronklike op 1 Januarie 2011. Besoek op 11 Julie 2012.
  4. ↑ Armani draai sy rug op pelse, Maroela Media, besoek op 2 April 2016

Eksterne skakels

[wysig | wysig bron]