KV43

KV43
Die grafkelder van Toetmoses IV
Muurversiering: Toetmoses ontvang die lewe van (van links) Osiris, Anoebis en Hathor.
Muurversiering: Toetmoses ontvang die lewe van (van links) Osiris, Anoebis en Hathor.
Ligging Vallei van die Konings
Land Vlag van Egipte Egipte
Ontdek Januarie 1903
Uitgrawings deur Howard Carter
Versiering Muuskildering van Toetmoses voor Osiris, Anoebis en Hathor
← Vorige
KV42
Volgende →
KV44

KV43 in die Vallei van die Konings by Thebe, naby die moderne stad Luxor in Egipte, was die grafkelder van farao Toetmoses IV van die 18de Dinastie. Dit het 'n gebuigde uitleg, wat tipies is van die vroeë 18de Dinastie. KV43 is in 1903 herontdek deur Howard Carter, wat uitgrawings gedoen het namens die Amerikaanse sakeman Theodore M. Davis.[1]

Ontdekking en ligging

[wysig | wysig bron]

Die grakelder is in Januarie 1903 deur Howard Carter ontdek as deel van 'n stelselmatige ondersoek van die klein vallei wat van Ramses III se grafkelder (KV3) wes loop. 'n Albastervaas met die naam van Toetmoses IV is in 1902 in die vallei ontdek en Carter het vermoed hy was naby sy graf. Teen Januarie 1903 het die ondersoekers by die onderkant van 'n steil krans gekom waar die rotsbodem styg en 'n natuurlike platform skep. Op die platform is deposito's ontdek met albasterdrinkware en implemente. Die ontdekking van die voorwerpe, saam met ander met die koning se naam op, het bevestig dat dit Toetmoses IV se graf is. Op 18 Januarie 1903 is die ingang genoeg skoongemaak om verkenning moontlik te maak.[1]

Uitleg

[wysig | wysig bron]
Die uitleg van KV43
A – Ingang
B – Gang
C – Treetjies
D – Gang
E – Put
F – Eerste pilaarkamer
G – Steil gang
H – Treetjies
I – Sykamer
J – Grafkamer
Ja-Jd – Pakkamers

Die grafkelder is volgens die plan van KV35, maar lyn meer presies op. Die eerste drie gange eindig met 'n diep put en 'n kamer. Die as draai dan voor die eerste pilaarkamer 90 grade en loop met treetjies en 'n steil gang na die sy- en grafkamer. Vier pakkamers is weerskante van die grafkamer gerangskik.[2]

Inhoud

[wysig | wysig bron]

Die graf is in antieke tye beroof en die eerste gang was halfvol afval en gebreekte artefakte. In die eerste pilaarkamer en die sykamer is ook bewyse van rowery gekry.[1]

Die farao se rooi steensarkofaag met teks en figure was nog op sy plek in die grafkamer. Dit het 'n geronde koppenent en 'n vierkantige voetenent. Nephthys, met haar arms omhoog, is op die koppenent en Isis is in dieselfde posisie op die voetenent. Die kante beeld die koning uit met Anoebis, saam met teks. In die sarkofaag was net twee houtbeelde;[1] die koning se mummie is vyf jaar tevore saam met ander koninklikes s'n in KV35 ontdek.[3]

Die grafkamer het ook die bak van 'n strydwa bevat. Dit was eens bedek met bladsilwer en versier met tonele van die koning wat vyande verslaan.[4] Ander ontdekkings sluit in dele van 'n kleurryke kleed met die naam van Amenhotep II, swart geverfde beeldjies van die koning, fragmente van steenvase en dele van 'n houttroon.[1]

In die pakkamers is verskeie stukke lap en gemummifiseerde kos gekry. In kamer Jd (sien plan) was die ontoegedraaide mummie van 'n jong seun wat teen die muur laat sit is. Dit is waarskynlik prins Amenemhat (Toetmoses IV se seun), wie se begrafnisflesse in die grafkamer gekry is. Begrafnisflesse van prinses Tentamoen is ook gekry, wat daarop dui dat sy eens in haar pa se grafkelder begrawe was.[1]

Versiering

[wysig | wysig bron]

Net twee kamers in die grafkelder is versier: die boonste deel van die putkamer en die sykamer. Die plafonne van albei kamers is versier met geel sterre op 'n blou agtergrond. Die linkerkant van die putkamer beeld Toetmoses uit voor Osiris, Anoebis en Hathor. In die sykamer is net twee mure geverf en dit bevat dieselfde tema van die koning voor verskeie gode.[1]

Galery

[wysig | wysig bron]
  • 'n Verskeidenheid albastervase
    'n Verskeidenheid albastervase
  • 'n Armpaneel van Toetmoses IV se troon waarop uitgebeeld word hoe hy vyande verslaan
    'n Armpaneel van Toetmoses IV se troon waarop uitgebeeld word hoe hy vyande verslaan
  • 'n Verskeidenheid beeldjies en amulette
    'n Verskeidenheid beeldjies en amulette
  • 'n Vaas wat nou in die Metropolitaanse Kunsmuseum is
    'n Vaas wat nou in die Metropolitaanse Kunsmuseum is
  • Die sarkofaag in die grafkamer
    Die sarkofaag in die grafkamer

Verwysings

[wysig | wysig bron]
  1. ↑ 1,0 1,1 1,2 1,3 1,4 1,5 1,6 Carter, Howard; Newberry, Percy E. (1904). The Tomb of Thoutmôsis IV. Westminster: Constable. pp. vii–xii. Repr. Londen: Duckworth, 2002. ISBN 0-7156-3120-9.
  2. ↑ Reeves, Nicholas; Wilkinson, Richard H. (1996). The Complete Valley of the Kings : Tombs and Treasures of Egypt's Greatest Pharaohs (2010 uitg.). Londen: Thames and Hudson. pp. 105–108. ISBN 978-0-500-28403-2.
  3. ↑ Loret, Victor (1898). "Le tombeau d'Aménophis II et la cachette royale de Biban el-Molouk". Bulletin de l'Institut Égyptien. 9: 98–112. Besoek op 20 Julie 2020.
  4. ↑ Calvert, Amy M. (2013). "Vehicles of the Sun: The Royal Chariot in the New Kingdom". In Veldmeijer, André J.; Ikram, Salima (reds.). Chasing Chariots: Proceedings of the first international chariot conference (Cairo 2012) (in Engels). Leiden: Sidestone Press. pp. 45–71. ISBN 978-90-8890-209-3.

Skakels

[wysig | wysig bron]