Kambuses

Kambuses is die Griekse weergawe van die naam van etlike heersers van die Achaemenidiese lyn van antieke Persië. Dieselfde naam verskyn as Kambujija (of moontlik Kambaujija of Kamboujija) in ou-Persies, as Kamboja in die Indiese epos Mahabharata, as K-n-b-n-z-y in Aramees, Kambuzia in Assiries, Kambythet in Egipties, Kam-bu-zi-ia in Akkadies, Kan-bu-zi-ia in Elamities en as Kanpuzija in Susaans. Dit was blykbaar 'n baie gewilde naam onder antieke Iraniërs.

'n Noukeurige ondersoek van Ou-Persiese inskripsies en klassieke geskrifte openbaar dat daar ten minste drie regeerders met die naam Kambuses was in die koningslyn van die Achaemeniede.

Kambuses I (Kambujija I) was 'n vroeëre lid van die Achaemenidiese lyn (7de eeu v.C.). Hy was moontlik die seun en opvolger van Teispes van Ansjan, wat op sy beurt die opvolger was van Achaemenes, die grondlegger van die vorstehuis. (Herod., VII.II)

Kambuses II (Kambujija II) was 'n seun van Kores I en het tussen 600 en 559 v.C. regeer. Hy was 'n Persiese koning uit 'n goeie familie, aan wie koning Astuages van Medië sy dogter Mandane as vrou gegee het. Hulle seun was Kores II (Herod., I, 46, 107).

Kambuses III (Kambujija III) was die seun en opvolger van Kores II (of Kores die Grote, die Bybelse Kores, soos vermeld in Daniël 6:29) en het vanaf 530 tot 522 v.C. oor Persië regeer. Hy is beroemd weens sy verowering van Egipte, en die verwoesting wat hy in daardie land gesaai het.

Hooggeagte geleerdes soos dr. C. Lassen, dr. S. Levi, dr. E. Kuhn, dr. J. Charpentier, dr. H. W. Bailey, dr. M. Witzel en talle ander het die koningsnaam Kambujija of Kambaujija van die Achaemenid line met die etniese naam Kamboja van die antieke Sanskrit/Pali tekste en van koning Asjoka se Rots-edikte geassosieer. Tallose antieke bronne getuig daarvan dat die land van Kambojas die middelpunt van die Iranese beskawing was wat ook gesien kan word aan die Mazdaïese godsdiensgebruike van die antieke Kambojas, asook aan die Avestaanse taal wat hulle gepraat het. Die hedendaagse nasie Kambodja is blykbaar sy naam aan die Kambojas verskuldig.

Sien ook die volgende vir vergelyking:

• Koressilinder
• Kambuses I van Ansjan
• Kambuses II van Persië
• Kambojas
• Etimologie van Kamboja

Bron

Vertaal uit die ooreenstemmende artikel in die Engelse Wikipedia.