Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Kartonmeubels is meubels wat ontwerp is om van geriffelde karton, swaar karton of kartonbuise vervaardig te word.
Daar is verskillende soorte kartonmeubels.
Alhoewel mense so lank as wat dit al bestaan op verskillende maniere van karton gebruik maak, is dit waarskynlik eers deur Frank Gehry (f. 1929) aan die ontwerpwêreld bekendgestel. Sy produksielyn, wat nog deur Vitra vervaardig en verkoop word, bestaan uit moderne stoele en tafels. Die tafels, wat met verborge skroewe en veselbordrande gemaak is, kan blykbaar die gewig van duisende ponde hanteer. Die 'Wikkelstoel', wat al verskeie ontwerptoekennings verower het, word in museumuitstallings van die Londense Ontwerpmuseum en elders, vertoon. Die stoel bestaan uit 60 lae geriffelde karton wat deur versteekte skroewe en veselbord aanmekaar gehou word.
Aan die begin van die tagtigerjare het kartonmeubels in Frankryk baie gewild geraak na aanleiding van Eric Guiomar se tegniek. Dit verskil totaal van Frank Gehry se tegniek. Volgens Guiomar se tegniek word die meubels van geriffelde karton, wat enkel, dubbel of trippel groewe kan hê, gemaak. 'n Raam met ineengestrengelde kartonstukke, wat volgens die oorspronklike ontwerp gesny is, word eers gemaak. Dit vorm die ondersteuningsraamwerk van die meubelstuk. Daarna word die raamwerk met karton wat op die vorms "gerol" word, sodat dit perfek pas, bedek. Hierdie tegniek bied groot vryheid met betrekking tot die keuse van vorms en materiale.
Afgesien van galery-uitstallings, word die idee om karton as 'n materiaal vir die konstruksie van meubels te gebruik, al hoe gewilder, veral gegewe die volhoubare eienskappe daarvan. Karton is volledig herwinbaar en word hoofsaaklik van herwinde papier vervaardig. Dit is gewoonlik ook moontlik om dit in enige kleur en patroon te bedruk. Nuwe bemarkingsareas delf dieper in volhoubare produkte; groen bemarking identifiseer byvoorbeeld marksegmente wat daartoe geneig sal wees om 'n produk soos kartonmeubels te gebruik. (bv. LOHAS).