Kolomenskoje (Russies: Коломенское) is ’n voormalige keiserlike landgoed ’n paar kilometer suidoos van Moskou, op die antieke pad na die dorp Kolomna (vandaar die naam). Die skilderagtige landskap aan die oewers van die Moskwa-rivier het in die 1960's deel van Moskou geword.
Kolomenskoje word vir die eerste keer in 1339 in die testament van Iwan Kalita genoem. Mettertyd is die dorpie ontwikkel tot ’n gunsteling-landgoed van die grootprinse van Moskowië. Die oudste gebou wat nog staan, is die Hemelvaartkerk (1532), wat met wit stene gebou is om die langverwagte geboorte van ’n troonerfgenaam, die toekomstige Iwan die Verskriklike, te vier. Die tentdak is ’n wegbreek van die Bisantynse argitektuur. Dit is sedert 1994 op die Unesco-wêrelderfenislys.
Aan die ander kant van die kloof vanaf Kolomenskoje kan die Kerk van Johannes die Doper met sy vyf tentdakke uit 1547 gesien word. Die ontstaan van die kerk is onseker, maar sy argitektuur verteenwoordig ’n oorgangsfase tussen Kolomenskoje se Hemelvaartskerk en die Sint Basilius-katedraal in Moskou.
TsaarAleksei van Rusland het al die houtgeboue in Kolomenskoje laat afbreek en dit vervang met ’n nuwe houtpaleis, wat bekend is vir sy feëryke dak. Die toekomstige keiserin van Rusland, Elisabeth, is in 1709 daar gebore. Nadat die Russiese hoofstad na Sint Petersburg geskuif het, het die paleis vervalle geraak en Katharina die Grote het geweier om daar te bly wanneer sy in Moskou was. Sy het die paleis in 1768 laat afbreek, maar gelukkig het ’n houtmodel daarvan oorgebly en dit word herbou.
Tydens die bestaan van die Sowjetunie is ou houtgeboue van die Verre-Noorde en ander gebiede na Kolomenskoje geskuif. Sommige daarvan dateer uit die 17de eeu.
Panorama van Kolomenskoje, 18de eeu (waterverfskildery deur Soechof).
.jpg)
Rusland
