Krieket Kenia

Krieket Kenia
Kenteken van Krieket Kenia
Kenteken van Krieket Kenia
Engelse naam Cricket Kenya
Afkorting CK
Swahili-naam Shirikisho la Kriketi Kenya
Land Vlag van Kenia Kenia
Sportsoort Krieket
Stigting 2005 (1953)
Lid van Internasionale Krieketraad
Aangesluit in 2005
Vastelandse beheerliggaam Afrikakrieketvereniging
Voorsitter Manoj Patel
Setel Ruaraka Sportklubveld, Nairobi, Kenia
Amptelike tale Engels en Swahili
Amptelike webwerf cricket-kenya.com

Krieket Kenia (Engels: Cricket Kenya, afgekort “CK”; Swahili: Shirikisho la Kriketi Kenya) is die bestuursliggaam wat krieket in Kenia beheer en is by die Ruaraka Sportklubveld in Nairobi gesetel. Die beheerliggaam is in 2005 gestig en het die Keniaanse Krieketvereniging (Kenya Cricket Association, “KCA”) vervang, wat in 1953 gestig is. Sedertdien verteenwoordig dit Kenia by die Internasionale Krieketraad (IKR) as ’n assosiaatlid en ook by die Afrikakrieketvereniging (Africa Cricket Association, “ACA”).

Geskiedenis

[wysig | wysig bron]

Keniaanse Krieketvereniging

[wysig | wysig bron]

In 1953 is die beheerliggaam Keniaanse Krieketvereniging (Kenyan Cricket Association, “KCA”) gestig.[1] Kenia is lankal as sterkste deel van die Oos-Afrikaanse krieketspan beskou,[2] maar dit het in 1981 van dié span weggebreek en een jaar later op sy eie as ’n assosiaatlid by die Internasionale Krieketraad (IKR) aangesluit.[3][4] Daarbenewens was die Keniaanse beheerliggaam in 1997 ’n stigtingslid van die Afrikakrieketvereniging (Africa Cricket Association, “ACA”).[5] Ná sy verrassende oorwinning oor Wes-Indië tydens die Krieketwêreldbeker 1996 het Kenia as enigste nietoetsland van die IKR volle EDI-status verkry, wat aan hulle nuwe speelmoontlikhede besorg het. Destyds is die span as ’n toekomstige toetsland beskou.[1]

Ná sy verrassend goeie prestasie tydens die Krieketwêreldbeker 2003 is Kenia weer as die voorste kandidaat vir toetsstatus beskou.[6] Volgens verskeie waarnemers moes Kenia ná sy prestasie tydens die Krieketwêreldbeker 2003 toetsstatus verkry het,[7] nadat hulle glo reeds in 2000 op die punt was om toetsstatus te ontvang.[8]

Krisis en hervormings

[wysig | wysig bron]

In 2004 het die span ook onder ’n reeks spelerstakings gely, aangesien die beheerliggaam nie in staat was om aan sy finansiële verpligtinge te voldoen nie.[1] Die beheerliggaam se situasie het vererger, aangesien dit nie in staat was om aan die IKR se vereistes te voldoen nie.[9] Op die hoogtepunt van dié geskil was die Keniaanse krieket sonder borg in internasionale isolasie.[1] Een jaar later is die beheerliggaam eindelik as deel van ondersoeke oor wanbestuur deur die Keniaanse regering ontbind en vervang met ’n nuwe beheerliggaam, Krieket Kenia, wat sy rol by die IKR oorgeneem het.[1][10][11]

Nadat Krieket Kenia kennis geneem het van die ongebalanseerde span van amateur- teenoor professionele spelers tydens die Krieketwêreldbeker 2011[12][13] het die beheerliggaam aangekondig dat hulle die krieketwêreldbekertoernooi se debakel ná afloop van dié toernooi sal hersien. Dit het ’n reeks hervormings wat deur die raad geïnisieer is, ingelui.[14] As deel van die hervormings het die beheerliggaam die voormalige Sahara Eliteliga met Oos-Afrikaanse toernooie vervang. Terwyl die Oos-Afrikaanse Premierliga ’n T20-toernooi is, is die Oos-Afrikaanse beker ’n EDI-toernooi. Die nuwe toernooie is deur die beheerliggaam van stapel gestuur in die hoop dat hulle nuwe talente vir die Keniaanse span sal oplewer.[15] Binne enkele maande het die Oos-Afrikaanse toernooie ’n hoë belangstelling verwerf en die intensiteit het skerp gestyg, soos dit uit ’n ESPNcricinfo-onderhoud met Krieket Kenia se hoof- uitvoerende beampte Tom Sears blyk.[16]

’n Verdere belangrike hervorming wat deur die nuwe beheerliggaam ingebring is, was om met die ou personeel weg te doen. Soos dit die ESPN-joernalis Martin Williamson beskryf het, was die ou personeel nie aan vertoning toegewyd nie, maar eerder aan selfsugtige wense.[17] Die nuwe kontrakte het heeltemal met die verlede gebreek en die nuwe kaptein Collins Obuya was op 29 die oudste speler. Ervare spelers soos die voormalige kaptein Jimmy Kamande, ’n veteraan van vyf krieketwêreldbetertoernooie, Thomas Odoyo, en ander het nie eens in aanmerking gekom nie. Soos verwag het die ontslane spelers vinnig reageer en volgens hulle het dit die dood van Keniaanse krieket versnel. Hulle is ook deur die Keniaanse media bygestaan.[18] Onder die 20 krieketspelers wat wél kontrakte aangebied is, is aan 13 sentrale kontrakte aangebied. Nadat vyf spelers dié kontrakte van die hand gewys het, het die dinge nog moeiliker geword. Sears het daarop gesê dat hulle tevrede is met die groep van sewe spelers wat hulself verbind het tot Krieket Kenia, terwyl hulle ewe teleurgesteld is met diegene wat die kontrakte verwerp het.[19]

Krieket Kenia het kontrakte aan verdienstelike jong, talentvolle spelers aangebied.[20] Die agt spelers wat die raad se kontrakte verwerp het, is later ingesluit en het gevra dat hul menings gehoor word, en ondanks die nuwe kans wat die raad aan hulle toegestaan het, het hulle uiteindelik ’n sterk standpunt teen die raad ingeneem. Terwyl Obanda, Shem en James Ngoche, Odhiambo en Otieno nuwe aanbiedinge gemaak is, het Ouma, Luseno en Nelson ’n driemaandse ooreenkoms tot Maart 2012, onderhewig aan prestasie, met die raad gesluit. Indien hulle iets goeds sou kon bydra, kon hulle weer hul plek in die span inneem.[21] Intussen is die voormalige Otago-afrigter Mike Hesson as nasionale afrigter aangestel.[22] Onmiddellik daarna het Hesson in ’n onderhoud met die koerant Otago Daily Times aangekondig dat hy aangestel is om die geskil tussen die spelers en die raad op te los en te beëindig.[23]

Taak

[wysig | wysig bron]

Krieket Kenia organiseer verskeie nasionale spanne, insluitend Kenia se nasionale seniorkrieketspan vir mans (die Simbas), vroue en jeug. Hulle is ook verantwoordelik vir die bestuur en organisasie van T20I-reekse teen ander spanne, en vir die reëling van internasionale wedstryde tuis. Daarbenewens is Krieket Kenia verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Keniaanse span.

Daarbenewens bestuur die beheerliggaam kinder- en jeugkrieket in Kenia. Net soos ander krieketlande beskik Kenia oor ’n o/19-nasionale span wat aan die o/19-krieketwêreldbeker deelneem.[24]

Die beheerliggaam reël ook die plaaslike kompetisies. Onder andere reël hulle saam met Uganda die Oos-Afrikaanse Beker en die Oos-Afrikaanse Premierliga.

Krieket Kenia organiseer ook gereeld internasionale toernooie. Hulle het al opgetree as gasheer van die Kampioenetrofee 2000 en die Krieketwêreldbeker 2003 (saam met Suid-Afrika en Zimbabwe).

Kenteken

[wysig | wysig bron]

Die Keniaanse nasionale krieketspan se bynaam is Simbas, Swahili vir “leeu”.[25] Krieket Kenia se kenteken toon derhalwe ’n leeu.

Sien ook

[wysig | wysig bron]

Verwysings

[wysig | wysig bron]
  1. ↑ 1,0 1,1 1,2 1,3 1,4 (en) Martin Williamson (6 Oktober 2006). "A brief history of Kenyan cricket". ESPNcricinfo. Besoek op 8 Februarie 2024.
  2. ↑ (en) "A history of Kenyan cricket". Friends of Kenya Cricket. Geargiveer vanaf die oorspronklike op 24 Julie 2008. Besoek op 24 Julie 2008.
  3. ↑ (en) "Kenya". Cricket Archive. Geargiveer vanaf die oorspronklike op 4 Februarie 2020. Besoek op 4 Februarie 2020.
  4. ↑ (en) "Cricket Kenya". Internasionale Krieketraad. Besoek op 8 Februarie 2024.
  5. ↑ (en) "Members". Afrikakrieketvereniging. Besoek op 8 Februarie 2024.
  6. ↑ (en) Oliver Brett (22 Maart 2003). "No Test fast-track for Kenya". BBC. Besoek op 8 Februarie 2024.
  7. ↑ (en) "The decline and fall of Kenyan cricket". The Roar. 2 Maart 2018. Besoek op 8 Februarie 2024.
  8. ↑ (en) "Test Status: Kenya's next, but who then?". ESPNcricinfo. 13 Julie 2000. Besoek op 8 Februarie 2024.
  9. ↑ (en) "Court bars fresh Kenyan board elections". ESPNcricinfo. 1 Junie 2004. Besoek op 8 Februarie 2024.
  10. ↑ (en) Martin Williamson (16 Junie 2007). "Another day of confusion in Kenya". ESPNcricinfo. Besoek op 8 Februarie 2024.
  11. ↑ (en) "A new start with Cricket Kenya". ESPNcricinfo. 21 Desember 2005. Besoek op 8 Februarie 2024.
  12. ↑ (en) "Cricket Kenya chief hints at team discord". ESPNCricinfo. 27 Februarie 2011. Besoek op 8 Februarie 2024.
  13. ↑ (en) "Disappointing farewell for Tikolo". ESPNcricinfo. 20 Februarie 2011. Besoek op 8 Februarie 2024.
  14. ↑ (en) "Cricket Kenya to review World Cup debacle". ESPNcricinfo. 21 Maart 2011. Besoek op 8 Februarie 2024.
  15. ↑ (en) "Kenya prepare for new superleagues". ESPNcricinfo. 15 Augustus 2011. Besoek op 8 Februarie 2024.
  16. ↑ (en) "'Players know consistency will be the criterion for national selection'". ESPNcricinfo. 2 Oktober 2011. Besoek op 8 Februarie 2024.
  17. ↑ (en) "Kenyan board right to dump old guard". ESPNcricinfo. 3 Julie 2011. Besoek op 8 Februarie 2024.
  18. ↑ (en) "Kenya's new contracts cut ties with the past". ESPNcricinfo. 30 Junie 2011. Besoek op 8 Februarie 2024.
  19. ↑ (en) "Five players turn down Kenya contracts". ESPNcricinfo. 21 Julie 2011. Besoek op 8 Februarie 2024.
  20. ↑ (en) "Youngsters rewarded with central contracts". ESPNcricinfo. 1 September 2011. Besoek op 8 Februarie 2024.
  21. ↑ (en) "Cricket Kenya plays hardball with militant players". ESPNcricinfo. 1 September 2011. Besoek op 8 Februarie 2024.
  22. ↑ (en) "Mike Hesson appointed Kenya coach". ESPNcricinfo. 19 Julie 2011. Besoek op 8 Februarie 2024.
  23. ↑ (en) "Hesson's Kenyan baptism of fire". ESPNcricinfo. 29 November 2011. Besoek op 8 Februarie 2024.
  24. ↑ (en) Martin Williamson (11 Januarie 2006). "The Under-19 World Cup". ESPNcricinfo. Besoek op 8 Februarie 2024.
  25. ↑ (en) "ICC T20 World Cup Africa Final – Unique Trophy Shoot Leaves Captains In Awe". Ugandese Krieketvereniging. Geargiveer vanaf die oorspronklike op 16 Julie 2019. Besoek op 16 Julie 2019.

Eksterne skakels

[wysig | wysig bron]