Krieket Skotland

Krieket Skotland
Kenteken van Krieket Skotland
Kenteken van Krieket Skotland
Engelse naam Cricket Scotland
Afkorting CS
Land Vlag van Skotland Skotland
Sportsoort Krieket
Stigting 1879 (1908)
Lid van Internasionale Krieketraad
Aangesluit in 1994
Vastelandse beheerliggaam Europese Krieketraad
Setel Edinburg, Skotland
Amptelike taal Engels
Amptelike webwerf cricketscotland.com

Krieket Skotland (Engels: Cricket Scotland, afgekort “CS”), voorheen die Skotse Krieketunie (Scottish Cricket Union, “SCU”), is die bestuursliggaam wat krieket in Skotland beheer. Die beheerliggaam is in 1908 gestig en in Edinburg gesetel. Sedert 1994 verteenwoordig dit Skotland by die Internasionale Krieketraad (IKR) as ’n assosiaatlid en ook by die Europese Krieketraad (European Cricket Council, “ECC”).

Geskiedenis

[wysig | wysig bron]

In 1879 is met die Skotse Krieketunie (Scottish Cricket Union, SCU) die eerste beheerliggaam gestig,[1] wat weens finansiële moeilikhede en ’n dalende ledetal egter net vier jaar bestaan het.[2][3] In 1908 is die Skotse Krieketunie opnuut gestig.[1]

Tot in die vroeë 1990’s is Skotland (net soos Ierland) in internasionale krieket amptelik verteenwoordig deur die Engelse nasionale krieketspan wat as ’t ware die span van die hele Verenigde Koninkryk en die Republiek Ierland was. In 1992 het Skotland sy bande met die Engelse beheerliggaam Toets- en Countykrieketraad verbreek en aansoek gedoen vir eie lidmaatskap in die Internasionale Krieketraad (IKR), wat in 1994 goedgekeur is,[2][1][4] een jaar later as Ierland.[5][6] In 2001 is die beheerliggaam in Krieket Skotland hernoem wat met strukturele hervormings gepaard gegaan het.[7]

Taak

[wysig | wysig bron]

Krieket Skotland organiseer verskeie nasionale spanne, insluitend Skotland se nasionale seniorkrieketspan vir mans, vroue en jeug. Hulle is ook verantwoordelik vir die bestuur en organisasie van EDI- en T20I-reekse teen ander spanne, en vir die reëling van internasionale wedstryde tuis. Daarbenewens is Krieket Skotland verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Skotse span.

Daarbenewens bestuur die beheerliggaam kinder- en jeugkrieket in Skotland.[8] Net soos ander krieketlande beskik Skotland oor ’n o/19-nasionale span wat aan die o/19-krieketwêreldbeker deelneem.[9]

Die beheerliggaam reël ook die plaaslike kompetisies. Die belangrikste krieketligas in Skotland is die Regional Pro Series. In 2019 het Krieket Skotland saam met die Krieket Ierland en Koninklike Nederlandse Krieketbond die Euro T20 Slam aangekondig. Aan dié nuwe toernooi sal twee spanne elk uit Ierland, Nederland en Skotland deelneem.[10]

Krieket Skotland organiseer ook gereeld internasionale toernooie. Hulle het al opgetree as gasheer van die Krieketwêreldbeker 1999 (saam met Engeland, Ierland en Nederland). Saam met Engeland en Ierland sal Skotland ook die T20I-wêreldbeker 2030 aanbied.[11]

Kenteken

[wysig | wysig bron]

Die dissel is die nasionale blom van Skotland en ook die embleem van die Skotse nasionale krieketspan. Volgens ’n legende het die “beskermende dissel” sy rol gespeel tydens die verdediging van Skotland teen ’n snagse aanval deur Noorse Wikings, een van hulle skree van pyn toe hy kaalvoet op ’n dissel trap, wat die Skotse verdedigers waarsku. Die Latynse Nemo me impune lacessit (“Niemand ontlok my ongestraf nie!” in Afrikaans) is ’n antieke leuse van die Skotse monarge, en ook van die voorste ridderorde van Skotland, die oudste en edelste orde van die dissel, en van die Skotswagte (van wie die twee laasgenoemde aan die monarg “behoort” het).[12]

Sien ook

[wysig | wysig bron]

Verwysings

[wysig | wysig bron]
  1. ↑ 1,0 1,1 1,2 (en) "A Timeline of Scottish Cricket". Europese Krieketraad. Geargiveer vanaf die oorspronklike op 6 Februarie 2013. Besoek op 6 Februarie 2013.
  2. ↑ 2,0 2,1 (en) "Scottish Cricket History". Krieket Skotland. Besoek op 14 Februarie 2024.
  3. ↑ (en) "A History of Cricket in Scotland". Europese Krieketraad. Geargiveer vanaf die oorspronklike op 3 Julie 2007. Besoek op 3 Julie 2007.
  4. ↑ (en) Wisden Cricketers’ Almanack (128 uitg.). John Wisden & Co Ltd. 1991. pp. 293, 1321. ISBN 0-947766-16-2.
  5. ↑ (en) "Scotland". Internasionale Krieketraad. Geargiveer vanaf die oorspronklike op 23 Januarie 2013. Besoek op 23 Januarie 2013.
  6. ↑ (en) "Scotland". Cricket Archive. Geargiveer vanaf die oorspronklike op 26 Januarie 2020. Besoek op 26 Januarie 2020.
  7. ↑ (en) "Cricket Scotland". Internasionale Krieketraad. Besoek op 14 Februarie 2024.
  8. ↑ (en) "Schools Cricket". Krieket Skotland. Besoek op 14 Februarie 2024.
  9. ↑ (en) Martin Williamson (11 Januarie 2006). "The Under-19 World Cup". ESPNcricinfo. Besoek op 14 Februarie 2024.
  10. ↑ (en) "'Euro T20 Slam' – Name of the new European T20 league confirmed". Internasionale Krieketraad. 20 Maart 2019. Besoek op 14 Februarie 2024.
  11. ↑ (en) Nagraj Gollapudi (16 November 2021). "USA co-hosts for 2024 T20 WC, Pakistan gets 2025 Champions Trophy, India and Bangladesh 2031 World Cup". ESPNcricinfo. Besoek op 14 Februarie 2024.
  12. ↑ (en) "The Scottish Thistle – Beautifully Bold!". Scottish at Heart. Besoek op 14 Februarie 2024.

Eksterne skakels

[wysig | wysig bron]