Lavazza
| Lavazza S.p.A. | |
.svg){kind=logo}  | |
| Tipe | Aandelemaatskappy |
|---|---|
| Gestig | 1895 |
| Hoofkantoor | Turyn, Italië |
| Sleutelpersone | Alberto Lavazza (voorsitter) Antonio Baravalle (hoof uitvoerende beampte) |
| Gebied bedien | Wêreldwyd |
| Industrie | Koffie |
| Produkte | Heelboontjie-Koffie, handelsware, koffie uit kapsules (Lavazza A Modo Mio en Lavazza Blue) |
| Inkomste | €1,33 miljard[1] (2012) |
| Werknemers | 3 800 |
| Webwerf | lavazza.it |
Lavazza is die grootste vervaardiger van koffie en espresso in Italië wat tans 'n markaandeel van 48 persent het. Die Turynse onderneming, wat reeds vier generasies lank in besit van die Lavazza-familie is, het filiaalmaatskappye in meer as 90 lande vir die internasionale bemarking en verspreiding van koffieprodukte en -masjiene. Die Lavazza-groep self bestaan uit 'n dertigtal ondernemings wat regstreeks of indirek deur die Turynse moedermaatskappy Luigi Lavazza S.p.A. bestuur word.[2]
Geskiedenis
[wysig | wysig bron]
Die maatskappy Lavazza het sy oorsprong in die klein kruidenierswinkel van Luigi Lavazza (1859-1949) in Paissa Olivero, die ou sakedistrik van Turyn, Noord-Italië. Soos baie ander van sy soort is ook Lavazza se winkel 'n kleinhandelonderneming wat sy eie handelsgoedere vervaardig. Luigi Lavazza het hom op die koffieproduksie toegespits, en hy rooster in sy winkel koffiebone en vermeng hulle volgens sy spesiale resepte.
In 1910 brei Lavazza sy onderneming op groothandelvlak uit. Die toetrede van sy drie seuns Mario, Beppe en Pericle tot die onderneming in die tydperk van die Eerste Wêreldoorlog en die toespitsing op 'n kleiner reeks produkte lei tot die vinnige groei van die maatskappy. Dit speel gou 'n beduidende rol op die plaaslike mark van Turyn en sy omgewing. Die Volkebond se tydelike sanksies teen Italië, wat ook 'n verbod op die uitvoer van koffie na die land insluit, en die ekonomiese gevolge van die Tweede Wêreldoorlog is geen werklike teenslag vir Lavazza nie.
In 1927 word die moderne Lavazza S.p.A. in sy huidige vorm gestig, en die onderneming begin hom op die koffievervaardiging toespits. Lavazza se produkte kry die eerste spesiaal ontwerpte etiket. Die jaarlikse produksie beloop aanvanklik 1 000 ton koffie.
In 1936 tree Luigi Lavazza af en oorlaat die bestuur van die maatskappy aan sy seuns. Hy sterf in 1949. Lavazza het sy hoofkwartier nog steeds in Turyn en word tans deur die vierde generasie van Luigi Lavazza se nakomelinge bestuur.
Verwysings
[wysig | wysig bron]
Wikimedia Commons het meer media in die kategorie Lavazza.
- ↑ "Lavazza numbers" (in Engels). Lavazza. Geargiveer vanaf die oorspronklike op 8 November 2017. Besoek op 8 Februarie 2015.
- ↑ lavazza.com: The Group. Besoek op 25 November 2018