McFly
McFly | |
|---|---|
| Oorsprong | Engeland |
| Genres | Pop, poprock |
| Jare aktief | 2004 — hede |
| Etikette | Island Records |
| Webwerf | www.mcflyofficial.com |
| Lede | Tom Fletcher Danny Jones Dougie Poynter Harry Judd |
McFly is 'n Engelse musiekgroep wat bekendheid verwerf het met hul nommer een-treffer "5 Colours in Her Hair" in 2004. Die groep is deur Tom Fletcher (gebore 17 Julie 1985) gestig. Danny Jones (gebore 12 Maart 1986), Dougie Poynter (gebore 30 November 1987) en Harry Judd (gebore 23 Desember 1985) is die ander lede van McFly. McFly het 'n platekontrak by Island Records en hulle word deur Prestige Management bestuur.
Sedert Mei 2007 het McFly al twaalf top-tien treffers gehad, waarvan sewe die nommer een-posisie op die trefferlyste behaal het. Hulle het ook twee nommer een-albums opgelewer. Hul debuutalbum was Room on the 3rd Floor, gevolg deur Wonderland. Hul derde album, Motion in the Ocean, is op 6 November 2006 uitgegee en het die trefferlyste by nommer ses binnegetree. Die groep het in April 2007 op hul webjoernaal op MySpace gesê dat hulle beplan om 'n Greatest Hits so Far op 22 Oktober 2007 uit te gee, en 'n vierde studio-album in Maart 2008.
Die naam McFly is deur Tom Fletcher, die stigter van die groep, gekies. Hy het die naam uit 'n Amerikaanse wetenskapfiksiekomedie, Back to the Future, gekies, waarin Michael J. Fox se karakter Marty McFly geheet het.
