Mohammed ibn Moesa al-Chwarizmi

Mohammed ibn Moesa al-Chwarizmi
'n Posseël uit die Sowjetunie wat Al-Chwarizmi uitbeeld.
Gebore	ca. 780 Chorasmië
Oorlede	ca. 850
Bekend vir	Verhandelinge oor algebra en Indiese syfers

Mohammed ibn Moesa al-Chwarizmi (Persies: محمد بن موسى الخوارزمي; diverse spellingsvariante) was 'n Persiese^[1] figuur wat een van die beroemdste wetenskaplikes op die gebiede van wiskunde, geografie en astrologie was. Hy is tussen 780 en 800 gebore en het tussen 840 en 845 gesterf. Al-Chwarizmi het aan die Huis van Wysheid in Bagdad studeer.

Hy is in die streek Chorazmië gebore, destyds 'n deel van die Persiese Ryk (later as Xiva bekend, deesdae die provinsie Xorazm in Oesbekistan). Die naam Al-Chwarizmi beteken "van Chorazmië". Sy gesin het kort daarna na 'n dorpie naby Bagdad verhuis, waar hy in die tydperk 813 tot 833 die grootste gedeelte van sy werk geskryf het. Dis onduidelik watter taal hy gepraat het – Persies is 'n moontlikheid, maar waarskynlik is dit ook Chorasmisies, 'n dialek van Persies wat in onbruik geraak het. Chwarizmi het al sy werke in Arabies geskryf, die taal van die wetenskap in die Islamitiese wêreld.

Die konsep van 'n algoritme in wiskunde is sy idee. Om hierdie rede word hy wel die "vader van rekenaarwetenskap" genoem. Die woorde "algoritme" en "algorisme" is van sy naam afgelei, dus bewys dit sy belang as 'n wetenskaplike.

Verder het hy groot bydraes tot gebiede soos algebra, trigonometrie, astronomie, astrologie, aardrykskunde en kartografie gelewer. Sy sistematiese en logiese benadering van die oplossing van lineêre en kwadratiese vergelykings het gestalte aan algebra gegee, 'n vakgebied wat van sy boek se naam afgelei is. Die beroemde boek is Hisab al-jabr wa al-Muqabala (Arabies: حساب الجبر و المقابلة) - "die teorie van transformasie en herstel", dit verwys na die maniere waarop deelterme in algebraïese terme gemanipuleer kan word.

Verwysings

1. Toomer 1990; Oaks, Jeffrey A. "Was al-Khwarizmi an applied algebraist?". University of Indianapolis. Geargiveer vanaf die oorspronklike op 18 Julie 2011. Besoek op 30 Mei 2008.; Hogendijk, Jan P. (1998). "al-Khwarzimi". Pythagoras. 38 (2): 4–5. ISSN 0033-4766. {{cite journal}}: Ongeldige |ref=harv (hulp)