Noc Kupały



Noc Kupaŀy
of
Noc Świętojańska

Slawiese fees van die Somersonstilstand

Иван-Купала in Rusland

Купалле in Wit-Rusland

Івана Купала in Oekraïne

Feesviering



24 Junie in Pole
7 Julie elders

Die Noc Kupały (Pools) of "Nag van Kupala" word tradisioneel in die nag van 21 en 22 Junie as Slawiese fees van die somerstilstand of Midsomerfees gevier. Die fees het heidense tradisies en word met vrugbaarheid, water en selfreiniging verbind. Die naam van die fees is dan ook afgelei van die Slawiese werkwoord kupat ("baai", Pools kąpać).

In Pole word die fees deesdae dikwels met Christelike tradisies verbind en op 24 Junie as Noc Świętojańska ("Nag van Sint Johannes die Doper") gevier. Dieselfde geld vir Ortodokse Slawiese gebiede (soos byvoorbeeld Wit-Rusland, Oekraïne en Rusland) waar die fees volgens die Gregoriaanse kalender op 7 Julie gevier word. Hier het die Ortodokse kerk die Slawies-heidense vrugbaarheidsrites aanvaar en met die Christelike figuur van Sint Johannes (Slawies Ivan) verbind. Die Russiese naam van die fees, Iwan Koepala, verwys na hom.

Waarsêery met blomkranse. Skildery deur Ivan Ivanovič Golikov (1886-1937)

Gewoonlik word kampvure aangesteek, liedjies gesing en gedans, maar ook pogings aangewend om die toekoms te voorspel. So laat jong vroue hul selfgevlegte blomkranse, wat met kerse versier is, in riviere (by voorkeur die Wisła-rivier) te water. Die manier, waarop die kranse in die water dryf, voorspel vir hulle die toekoms. Indien 'n jong man die krans vind, sal hy met die meisie trou. Maar sou die krans in vlamme opgaan of na die grond sink, sal die meisie, wat dit gemaak het, tot die volgende Midsomerfees ongetroud bly. 'n Poolse bynaam vir die fees, Wianki ("kransie"), verwys na hierdie tradisie. Daarnaas spring jong pare ook oor die kampvuur om hul toekoms te ken.

Volgens die tradisionele Baltiese en Slawiese volksgeloof is die nag van Kupala ook die enigste tyd van die jaar wanneer die varingblom (Pools kwiat paproci) verskyn en oop gaan. Baie mense stap in hierdie nag deur die bosse om bloeiende magiese varings op te spoor. Vir mense wat daarin slaag om een te vind word 'n voorspoedige toekoms voorspel.

Bronne

[wysig | wysig bron]

Eksterne skakels

[wysig | wysig bron]

Media - Feesvierings van die Inheemse Poolse Kerk