Pierre Fournier

Borsbeeld van Pierre Fournier in Genève

Pierre Fournier (Parys, 24 Junie 1906 - Genève, 8 Januarie 1986) was 'n Franse tjellis. Hy word die "aristokraat van tjelliste" genoem vanweë sy elegante speelwyse en die majestueuse klank wat hy kon voortbring.

Hy was die seun van 'n generaal in die Franse leër. Sy moeder het hom leer klavier leer speel; maar hy het egter 'n milde vorm van polio opgedoen en is gevolglik van enige behendigheid in sy bene en voete ontdaan. Vanweë die gevolglike probleme met klavierpedale kies hy daarom die tjello as instrument.

Hy het sy opleiding aan die Paryse Konservatoria in 1923 voltooi toe hy maar sewentien jaar oud was. Hy is verwelkom as "die tjellis van die toekoms" en is wyd lof toegeswaai vir sy virtuositeit en tegniek met die strykstok. Hy het bekendheid verwerf toe hy in 1925 by die Orchestre Colonne gespeel het en het aan kompetisies van regoor die wêreld deelgeneem.

Hy het die volledige kamermusiek van Brahms en Schubert vir die BBC opgeneem (die opnames het ongelukkig verlore gegaan). Hy was baie gewaardeerd vir sy opnames van die ses suites vir onbegeleide tjello van J.S. Bach. Dit word nog steeds gehuldig as die beste opnames wat nog ooit van die suites gemaak is.

Fournier het vanaf 1937 tot 1949 lesse gegee aan die École Normale de Musique in Parys en aan die Paryse Konservatorium.

In 1956 het hy na Switserland verhuis, sonder om egter sy Franse nasionaliteit op te gee. Hy het aldaar verdere lesse gegee. Die Britse tjellis Julian Lloyd Webber was een van sy leerlinge.

Hy het verskeie onderskeidings behaal soos die van Offisier in die Franse Legioen van Eer, sowel as Offisier in die Franse Orde van Kunste en Lettere en Kommandeur in die Belgiese Orde van Leopold II.

Hy het tot twee jaar voor sy dood bly optree. Hy het op 79-jarige leeftyd in Genève gesterf.

Die tjelliste Mstislav Rostropovich, Kazimir Wilkomirski en Pierre Fournier in 1966 as deel van die beoordelingspaneel tydens die Derde Internasionale Tsjaikofski Kompetisie

Pryse en erkennings

Grammy-toekenning vir die beste kamermusiekuitvoering:

• Pierre Fournier, Arthur Rubinstein & Henryk Szeryng vir die uitvoering van Schubert se Klaviertrio's nr. 1 in B, op. 99 en nr. 2 in E, op. 100
• Pierre Fournier, Arthur Rubinstein & Henryk Szeryng vir die uitvoering van Brahms se volledige trio's en Schumann se trio nr. 1 in D-mineur.

Hierdie artikel is in sy geheel of gedeeltelik vanuit die Nederlandse Wikipedia vertaal.