Point Conception
Point Conception is 'n kaap aan die Stille Oseaankus van die Amerikaanse deelstaat Kalifornië, in die suidweste van Santa Barbara County, waar die waters van die Santa Barbarakanaal en die Stille Oseaan ontmoet.
Dit is ook die hoek tussen die noordelike deel van die kuslyn, wat oorwegend in noord-suidelike rigting loop, en die kusgedeelte naby Santa Barbara wat in oos-westelike rigting loop. Die kaap vorm sodoende 'n natuurlike skeiding tussen Suid- en Sentraal-Kalifornië.
Die oorspronklike vuurtoring by Point Conception, wat in 1856 nog op 'n ander, hoër geleë plek ontstaan het, was een van die eerstes in Kalifornië. Nadat sy lig dikwels deur digte mis verhul is, is dit in 1881 vervang deur die huidige Point Conception-vuurtoring wat op 'n laer geleë rotspunt opgerig is. Die vuurtoring word omring deur grond in privaat besit en is nie toeganklik vir die publiek nie.[1]