Presbiteriaanse Kerk (VSA)
Die seël is saamgestel uit die simbool, bestaande uit die kruis, die Skrif, 'n neerdalende duif by die boonste gedeelte van die kruis en vlamme aan weerskante van die kruis se laer gedeelte. Die simbool word omring deur die denominasie se naam
Die Presbiteriaanse Kerk (VSA), Engels: Presbyterian Church (U.S.A.), of kort PC(USA), is 'n Christelik-Protestantse hoofstroomkerk in die Verenigde State. Die kerk, wat binne die gereformeerde tradisie staan, is die grootste Presbiteriaanse denominasie in die VSA.
Die PC(USA) het in 1983 met die samesmelting van die vroeëre Presbiteriaanse Kerk in die Verenigde State (met gemeentes in die Suid- en sogenaamde Border- of Grensstate) en die Verenigde Presbiteriaanse Kerk in die Verenigde State van Amerika (met gemeentes in elke Amerikaanse deelstaat) ontstaan.
Met 'n ledetal van 2 077 158 en 13 462 geordineerde predikante in 10 657 gemeentes volgens statistieke van 2009[1] is dié verenigde kerk die sigbaarste en invloedrykste Presbiteriaanse denominasie in Noord-Amerika. Teen die einde van 2010 het die PC(USA) se lidmaatskap met 61 047 (of 2,9 persent) gedaal tot 2 016 091.
Die kerk se hoofkwartier is in Louisville, Kentucky geleë. Die PC(USA) is 'n lidkerk van die Nasionale Raad van Kerke, die Wêreldgemeenskap van Gereformeerde Kerke, die Wêreldraad van Kerke en Christian Churches Together. Vir lede van die PC(USA), Evangelies-Lutherse Kerk in Amerika (ELCA), die Gereformeerde Kerk in Amerika (RCA) en die Verenigde Kerk van Christus (UCC) is volgens die sogenaamde Formula of Agreement die onderlinge deelname aan Nagmaalvierings moontlik. Dieselfde soort ooreenkoms is met ekumeniese susterkerke van die Unie van Evangeliese Kerke (UEK) in Duitsland en die Christian Church (Discipels of Christ) gesluit.
Die PC(USA) word, wat sy teologiese leerstellings en interpretasie van die Skrif betref, algemeen as 'n liberale denominasie beskou - die kerk ordineer vroulike en manlike predikante en seën sedert 2000 ook burgerlike verbintenisse van pare van dieselfde geslag.
Verwysings
[wysig | wysig bron]Eksterne skakels
[wysig | wysig bron]- Geskiedenis