Reims

Reims
Kaart	Wapen



	Vlag


Land	Frankryk
Région (gewes)	Grand Est
Département	Marne
Koördinate	49°15′N 4°02′O / 49.250°N 4.033°O / 49.250; 4.033
Stigting	80 v.C. (Durocorter)
Oppervlakte:
- Totaal	46,9 vk km
Hoogte bo seevlak	80–135 m
Bevolking:
- Totaal (2019)	181 194
- Bevolkingsdigtheid	3 900/vk km
Tydsone	UTC +1 (MEST)
- Somertyd	UTC +2 (MEST)
Burgemeester	Arnaud Robinet (LR)
Amptelike webwerf	reims.fr

Reims (Frans: [ʁɛ̃s], luister (hulp·inligting)), wat in Frans ook la Cité des Sacres of "Kroningsstad" genoem word nadat Franse konings eeue lank in die plaaslike katedraal gekroon is, is 'n stad in die noordooste van Frankryk met 'n oppervlak van 46,9 vierkante kilometer en 'n bevolking van 184 400 (2004).

Reims lê sowat 130 kilometer noordoos van Parys in die département Marne, wat deel uitmaak van die administratiewe gewes (région) Grand Est. Die stad trek voordeel uit sy strategiese ligging in die noord-ooste van die Paryse Bekken. Reims is die dertiende grootste stad in die land, terwyl sy metropolitaanse gebied tans as die 29ste grootste in Frankryk geranglys word. Ondanks sy groot inwonertal is Reims nog die hoofstad van sy département nog dié van sy administratiewe gewes.

Die katedraal van Reims is die bekendste baken van die stad, en sy Gotiese argitektuur het wêreldfaam vanweë sy volmaakte proporsies en sy rykdom aan kerkvensters en beeldhouwerke. Ander belangrike besienswaardighede is Reims se Art Deco-geboue. Ná die verwoestinge van die Eerste Wêreldoorlog is die middestad grotendeels in dié styl heropgebou.

Naas sy historiese rol as Franse kroningsstad, die plek waar die Frankiese koning Clovis I in 498 die Christelike doop ontvang het en as die geboortestad van Jean-Baptiste Colbert en Saint-Jean-Baptiste de la Salle het Reims internasionale bekendheid verwerf as die hoofstad van die Franse sjampanje-nywerheid, en talle bekende wynkelders het hulle hoofkwartiere in die stad. Die wynbedryf het ook die plaaslike kookkuns bevorder sodat Reims met 'n groot aantal eersterangse restourante pronk.

Reims se Notre-Dame-katedraal, die historiese Saint Rémi-abdy en die Tau-paleis is deur Unesco tot wêrelderfenis verklaar, net soos die sjampanje-huise en -wynkelders in die omgewing. Dit was een van die gasheerstede tydens die FIFA Sokker-Wêreldbekertoernooi in 1938.

Geografiese ligging

Reims lê in die sentrum van Champagne – 'n streek in die uitgestrekte ooste van die Paryse Bekken. Die stadsgebied lê in 'n vlakte aan die regteroewer van die Vesle, 'n takrivier van die Aisne, en aan die kanaal wat die Aisne met die Marnerivier verbind. Die bergreeks Montagne de Reims lê in die suidelike en westelike omgewing van die stad. Ook die plaaslike sjampanje-produsente se wingerde is in die omgewing van Reims geleë.

Geskiedenis

Romeinse tydperk

Menslike nedersettings het in die gebied van Reims reeds van die vroegste tye af bestaan, en by argeologiese opgrawings in die omgewing van die stad is onder meer begraafplase uit die Bronstydperk met urne ontdek.

Die plaaslike Keltiese stamme het omtrent 80 v.C. 'n stedelike nedersetting (Latyn: oppidum) met die naam Durocortorum gestig, wat ná die verowering deur die Romeine herdoop is tot Civitas Remorum en as die hoofstad van die Romeinse provinsie Belgica gedien het. Die plaaslike stam, die Remers (Latyn: Remi), het deel uitgemaak van die Keltiese Belgae, maar in teenstelling met hul volksgenote steeds goeie betrekkinge met die Romeinse owerhede onderhou. Die voorregte, wat hul nedersetting in ruil hiervoor geniet het, het van die Civitas Remorum 'n welvarende stad gemaak.

In die laat-Romeinse tydperk het die plaaslike bevolking die Christelike geloof aangeneem, en die stad het as 'n biskopsetel gedien. In 336 het die Romeinse stadhouer Jovinus 'n oorwinning oor Barbaarse invallers in Champagne behaal.

Middeleeue

Vanaf die laat antieke tydperk en die vroeë Middeleeue het Reims eeue lank 'n beduidende rol in die Europese geskiedenis gespeel. In die vroeë 5de eeu is die stad deur die dramatiese gebeure rondom die Volksverhuising geraak. Biskop Nicasus, wat omtrent 401 'n kerk in Reims opgerig het, is net vyf jaar later tydens die Vandale se aanval op die stad gedood. Hy is later heilig verklaar. In 451 het die Hunne onder die bevel van Attila die stad verower, maar hulle ná die Slag op die Katalauniese Velde naby Reims weer teruggetrek. Die Franke het Reims in 483 ingeneem.

In 498 het die Frankiese koning Clovis I deur biskop Remigius in die katedraal van Reims die Christelike doop ontvang en sodoende die suksesvolle simbiose tussen die Frankiese gesag en die Rooms-Katolieke Kerk bevorder wat 'n beslissende rol by die opbou en uitbreiding van die Frankiese Ryk gespeel het. Reims het vinnig ook die setel van 'n aartsbiskop en ná die Merovingiese verdeling van die ryk die administratiewe hoofstad van een van die nuwe deelryke geword.

Bronne

Met erkenning aan die Maison de la France, die Comité Régional du Tourisme de Champagne-Ardenne en die Région Champagne-Ardenne wat inligtingsmateriaal beskikbaar gestel het.

Eksterne skakels

(en) Toerisme-inligting oor Reims op Wikivoyage
(fr) Amptelike webwerf