Rhön



Rhön

Maak deel uit van die

Oos-Hessiese Bergland

Strek oor die deelstate

Hesse, Beiere en Thüringen
Vlag van Duitsland Duitsland

Oppervlakte

1 550 km²

Ligging in Duitsland

Hoogste bergpiek

Wasserkuppe (950 m)

Die Rhön is 'n middelgebergte met 'n oppervlakte van ruim 1 500 km² (sonder afhellings) in die grensgebied van die Duitse deelstate Beiere, Hesse en Thüringen. Die bergreeks van oorwegend vulkaniese oorsprong is in die uiterste suidooste van die Oos-Hessiese Bergland geleë wat hier oor meerdere deelstate strek. Die grootste deel van sy kerngebied (in Beiere ook dele van sy nie-vulkaniese, suidelike afhelling) is in die Biosfeerreservaat Rhön (1 850 km²) geleë.

Die bergreeks se gesteentes (sand-, silt-, klei-, kalk-, mergel- en basaltsteen) dateer uit die trias en tersiêr. Die hoogste bergpiek is die Wasserkuppe (950 meter bo seevlak) in die deelstaat Hesse. In die winter lok 'n aantal skigebiede wintersporttoeriste.

Die etimologie van die naam Rhön bly onseker. Dikwels word dit afgelei van die Keltiese raino ("heuwelagtig"), alhoewel daar ook ander interpretasies is. Middeleeuse monnike in Fulda het die omgewing van hul stad – en sodoende ook groot dele van die Rhön – Buchonia of Land van Beukewoude genoem. Beukehout was in die middeleeuse uiters gewild. Grootskaalse ontginning in dié tyd het daartoe gelei dat vandag nog sowat dertig persent van die gebied bebos is.