Robert Graves

Die Engelse skrywer Robert Graves (24 Julie 1895 – 7 Desember 1985)^[1] is veral bekend vir sy historiese romans, maar hy het ook goeie poësie, belangrike kritiese werke en een van die beste outobiografiese verslae van die Eerste Wêreldoorlog, geskryf. Oor die algemeen word sy werk gekenmerk deur volkome eerlikheid.

Robert Graves is op 26 Julie 1895 in Londen gebore, die seun van 'n Ierse digter en volkskenner en 'n afstammeling van die Duitse historikus Von Ranke. Gedurende die Eerste Wêreldoorlog het hy in die Royal Welsh Fusiliers gedien. Ná die oorlog het hy in Oxford gaan studeer. Sy eerste en enigste huwelik was van korte duur, en tot in 1940 het hy saam met die Amerikaanse digteres Laura Riding (gebore 1901) gewoon. Sy het 'n groot invloed op sy werk uitgeoefen. In 1930 het hy hom op Mallorca gevestig. Van 1961 tot 1966 was hy die opvolger van W.H. Auden as hoogleraar in poësie in Oxford.

Graves se eerste werk, die digbundel Over the brazier, is in 1916 gepubliseer en sy eerste kritiese studie, On English poetry, in 1922. Toe sy belangrike outobiografiese Goodbye to all that in 1929 verskyn, het hy al verskeie digbundels, essays en bloemlesings (onder meer van Engelse en Skotse ballades) die lig laat sien. Goodbye to all that, wat hy in 1957 hersien het, gee nie net 'n goeie insig in Graves, sy familie, jeug en oorlogservaringe nie, maar is ook 'n unieke beeld van sy tydgenote.

Sy eerste Collected poems het in 1938 verskyn, gevolg deur versamel bundels in 1948, 1959, 1965 en 1968. Sy poësie is suiwer, van alle heroïek ontdaan, in gewone dinge en ervarings gewortel, geestig en persoonlik. Sy liefdesgedigte is dikwels so eerlik dat sommige kritici dit te "koel" vind. Graves se eerlikheid blyk ook uit sy herhaaldelike stelling dat hy nie vir die nageslag skryf nie, maar vir die hede. Sy belangrikste kritiese werke oor poësie is The white goddess (1948, hersien 1952) en The common asphodel (1949), en oor prosa The reader over your shoulder (1943). Graves se wye belangstelling blyk uit The real David Copperfield (1933), 'n herskrywing van Dickens se roman, uit The Greek myths (1955), 'n oorsig van die hele Griekse mitologie en uit The Nazarene gospel restored (1953), waarin Jesus vanuit 'n Joodse oogpunt beskou word. Hy het ook talle werke vertaal, onder meer die Pharsalia van Lueanus en die Vitae caesarum van Suetonius, asook in omstrede vertaling met kommentaar van die Roebajat van Omar Khajjam, wat in 1967 verskyn het. Sy prosawerk omvat, naas 'n aantal kostelike kinderboeke (onder meer The poor boy who folio wed his star, 1968) en 'n groot aantal versamelings essays en verhale (byvoorbeeld But it still goes on, 1930), die bekende historiese romans I, Claudius (1934) en Claudius the god (1934), oor die tragiese Romeinse keiser wat teen sy sin van 41 tot 54 regeer het, Count Belisarius (1938), Wife to Mr Milton (1934), The golden fleece (1944), oor Jason, King Jesus (1946) en Homer's daughter (1955). Ander werke sluit in Antigua, penny, puce (1936) en die toekomsroman Seven days in new Crete (1949).

Bronnelys

Wêreldspektrum, Volume 9, bl.129-130, ISBN 0908409451

Verwysings

↑ "National Portrait Gallery – Person – Robert Ranke Graves" (in Engels). Npg.org.uk. Geargiveer vanaf die oorspronklike op 3 Junie 2020. Besoek op 19 Desember 2010.

Eksterne skakels

Wikimedia Commons het meer media in die kategorie Robert Graves.

[npg-1] "National Portrait Gallery – Person – Robert Ranke Graves" (in Engels). Npg.org.uk. Geargiveer vanaf die oorspronklike op 3 Junie 2020. Besoek op 19 Desember 2010.

[1]