Rotes Rathaus
Die Berlynse Raadsaal, wat vanweë sy fasadeontwerp met rooi klinkerstene as Rotes Rathaus bekend staan, is geleë in die Rathausstraße en dien as die setel van die deelstaatregering (Senaat) en regerende burgemeester (eerste minister) van die Duitse hoofstad Berlyn.
Die raadsaal is tussen 1861 en 1869 deur die argitek Hermann Friedrich Waesemann (1813–1879) gebou, waarby die raadsaal van Thorn in Wes-Pruise as argitektoniese voorbeeld gedien het. Die ontwerp van die toring met 'n hoogte van 94 meter is aan die torings van die katedraal van Laon in Frankryk ontleen. Die gebou is 'n tipiese voorbeeld van die Berlynse rondboogstyl, wat oorspronklik deur die argitek Karl Friedrich Schinkel en sy skool ontwikkel is, en het daarnaas ook baie kenmerke van Gotiese raadsale.
Die raadsaal het 'n aantal ouer geboue vervang, wat gedeeltelik uit die Middeleeue gedateer het, en beslaan 'n hele straatblok. Die gebou het na sy voltooiing steeds as raadsaal gedien. Nadat dit tydens die Tweede Wêreldoorlog verniel is, is dit in die 1950's herbou as die setel van die Oos-Berlynse stadsregering, die Magistrat, terwyl die Wes-Berlynse regering na die Rathaus Schöneberg in die gelyknamige stadsdeel verhuis het. Met die hereniging van Wes- en Oos-Berlyn in 1991 het die Berlynse Raadsaal weer die amptelike setel van die Berlynse stadsregering geword.
Omgewing
[wysig | wysig bron]
Ná die Tweede Wêreldoorlog is die bouvalle en puinmateriaal in die historiese middestad verwyder, en noordwes van die raadsaal het 'n uitgestrekte oop ruimte ontstaan. Na hierdie ruimte, wat tussen die Marx-Engels-Forum, die Sint Mariakerk en die Berlynse televisietoring geleë is, verwys die Departement van Stadsontwikkeling sedert die vroeë 21ste eeu as Rathausforum, alhoewel dit nog geen amptelike naam dra nie.[1] Die Neptunfontein, wat oorspronklik voor die Berlynse kasteel opgerig is, is na die raadsaal se hoofsiglyn verskuif.
Net voor die raadsaal ontstaan sedert 2013 die nuwe moltreinstasie Berliner Rathaus. Gedurende opgrawings, wat voor die begin van die boubedrywighede gedoen is, het argeoloë op die goed bewaarde oorblyfsels van die middeleeuse raadsaal, die raadsaaltoring en die geregsgebou afgekom. Groot dele daarvan sal bewaar bly en in 'n sogenaamde argeologiese venster vertoon word.
Verwysings
[wysig | wysig bron]Eksterne skakels
[wysig | wysig bron]
Wikimedia Commons het meer media in die kategorie Rotes Rathaus.- (de) 'n Virtuele rondgang deur die Berlynse Raadsaal Geargiveer 21 Maart 2015 op Wayback Machine
52°31′7″N 13°24′30″O / 52.51861°N 13.40833°O
Normdata  |
|
|---|