Rowan Atkinson

Rowan Atkinson
'n Beeld van die betrokke persoonlikheid.
Rowan Atkinson in 2011
Geboortenaam Rowan Sebastian Atkinson
Geboorte 6 Januarie 1955
Consett, Durham
Nasionaliteit Verenigde Koninkryk
Lewensmaat Sunetra Sastry
Aktiewe jare 1979–nou
Rolprente Mr. Bean
Johnny English
Internet-rolprentdatabasis-profiel

Rowan Atkinson (gebore 6 Januarie 1955) is 'n Britse akteur, skrywer en komediant wat in talle TV-programme en rolprente verskyn. Hy is veral bekend as die hoofkarakter in die TV-program Blackadder en vir sy vertolking van die karakter Mr Bean.[1] Die koerant The Guardian het hom as een van die 50 snaaksste akteurs in Britse komedie gelys,[2] en in 2005 haal hy die lys van grootste 50 komediante ooit in 'n meningspeiling deur mede-komediante.[3]

Lewensloop

[wysig | wysig bron]

Rowan Sebastian Atkinson is op 6 Januarie 1955 in Consett in Durham in die Verenigde Koninkryk gebore. Hy is die jongste van die vier kinders van Eric Atkinson ('n boer) en Ella May, en is tuis onderrig. Atkinson studeer elektroniese ingenieurswese aan die Universiteit van Newcastle en behaal daarna 'n meestersgraad aan die Queen's College van die Universiteit van Oxford.[4]

Atkinson begin sy loopbaan as komediant tydens die Edinburgh Festival. Daarna toer hy met sy eenmanvertoning deur die land. Hierdie vertoning is vir televisie verfilm en is steeds gewild op DVD.

Sy eerste TV-reeks was Not the Nine O'Clock News. Die sukses van hierdie reeks verskaf aan hom die hoofrol in die Blackadder-reeks. Hierdie reeks was uiters gewild en drie opvolgreekse asook enkele afgeleide werke is gebeeldsend. Ná Blackadder kom Atkinson met sy bekendste skepping, Mr. Bean, vorendag.

Rowan Atkinson as Mr. Bean by die Manneken Pis in Brussel (2007).

Atkinson het in 2012 tydens 'n onderhoud gesê dat hy moeg is vir Mr. Bean. Hy is te oud om sulke kinderagtige dinge te doen en sal nie vinnig (of selfs nooit) weer die rol vertolk nie. Sy laaste optrede as Mr. Bean was tydens die Olimpiese Somerspele 2012 in Londen.[5]

Verwysings

[wysig | wysig bron]
  1. ↑ HAT Taal-en-feitegids, Pearson, Desember 2013, ISBN 978-1-77578-243-8
  2. ↑ (en) "The A-Z of laughter (part one)", The Observer, 7 Desember 2003. Besoek op 7 Januarie 2007.
  3. ↑ "Cook voted 'comedians' comedian'" (in Engels). BBC News. 2 Januarie 2005. Geargiveer vanaf die oorspronklike op 26 Oktober 2019. Besoek op 27 April 2016.
  4. ↑ (en) University of Oxford, Queen's College – Honorary Fellows Geargiveer 23 Maart 2012 op Wayback Machine
  5. ↑ (nl) Rowan Atkinson is Mr. Bean beu, besoek op 27 April 2016

Eksterne skakels

[wysig | wysig bron]