Seksspeelding

’n Versameling seksspeelgoed.

Dildo's.

’n Seksspeelding is ’n voorwerp of toestel wat hoofsaaklik gebruik word om seksuele plesier te verskaf, soos ’n dildo of vibrator. Baie gewilde seksspeelgoed word ontwerp om soos menslike geslagsorgane te lyk; sommige vibreer en ander nie. Dit word ook gebruik vir BDSM-apparate en seksmeubels soos ’n strop vir vuisseks, maar word gewoonlik nie gebruik vir byvoorbeeld voorbehoedmiddels of pornografie nie.

Soorte seksspeelgoed

Algemene speelgoed vir penetrasie

’n Soort Ben Wa-balle.

• ’n Dildo is ’n nie-vibrerende speelding wat gebruik word om die vagina of anus te stimuleer. Hulle word gewoonlik van silikoonrubber gemaak, maar kan ook van glas, metaal of ander materiale wees. Hulle het dikwels die vorm van ’n penis.
• ’n Dubbele dildo is ’n lang toestel waarvan albei punte gemaak is vir penetrasie. Twee mense kan so tegelykertyd gepenetreer word, of dit word gebruik vir die dubbele penetrasie van die vrou.
• ’n Aangord-dildo kan gebruik word om ’n ander persoon te penetreer. Dit word dikwels in lesbiese seks gebruik.
• Ben Wa-balle is hol metaalballe wat vir lang periodes in die vagina gedra word. Die rol van die balle in die vagina kan die klimaks verhoog.
• ’n Kegel-toestel word deur die vrou gedra om spiertonus in die pelvisbodem te verbeter.
• ’n Perdeskoen lyk soos ’n regte perdeskoen, maar word van sagter materiale gemaak. Dit word tegelykertyd in die vagina en anus geplaas.
• ’n Seksmasjien is ’n toestel wat deur ’n motor aangedryf word. Dit kombineer penetrasie met ’n rotasie- en/of in-en-uitbeweging.^[1]

Vibrators

’n Glasdildo.

Vibrators is seksspeelgoed wat vibreer vir groter stimulasie. Hulle is in ’n verskeidenheid vorms en groottes beskikbaar, vir interne en eksterne gebruik. Sommige vibrators vir interne gebruik het ’n falliese ontwerp.

• Vibrators vir penetrasie is gewoonlik 12-18 cm lank en 2-5 cm wyd, gewoonlik so groot soos ’n penis.
• Anale vibrators word in die anus geplaas en kan ’n man se prostaat stimuleer. Die veiligste soort het ’n platterige basis wat buite die liggaam bly en keer dat dit te diep ingaan.
• G-kol-vibrators se een punt is gekrul om die stimulasie van die vroulike G-kol te vergemaklik.
• Patroonvibrators is klein en patroonvormig, en kan gebruik word vir direkte stimulasie of in ander seksspeelgoed geplaas word vir groter stimulasie.
• Vibratormasjiene is groot vibrators wat elektrisiteit gebruik en dikwels bemark word as rugmasseerders. Hulle is gewoonlik kragtiger as dié wat met batterye werk. Hulle kan hegstukke van silikoon of rubber hê vir penetrasie of ’n beter tekstuur.

Penisspeelgoed

’n Kunsmatige vagina.

Twee anale proppe.

Anale krale.

’n Fleshlight in die vorm van ’n mond.

• Kunsmatige vaginas, ook bekend as masturbators, word gemaak sodat die penis daarin pas. Hulle kan gevorm wees soos ’n vagina, ’n anus of enigiets met ’n gat daarin vir penetrasie. Sommige is toegerus met seksmasjienopsies wat soos melkmasjiene werk.^[2]
• Fifi is ’n slengterm vir ’n geïmproviseerde vagina; dit word dikwels van ’n materaalstof gemaak.^[3][4]
• ’n Penisring kan ’n ereksie verleng of verbeter deur die bloed binne-in die penis te hou. ’n Man kan dit dra vir erektiele disfunksies of om ’n stywer gevoel in die penis te ervaar. Sommige modelle het ’n uitsteeksel vir die stimulasie van die klitoris tydens seks. Ander vibreer op verskeie maniere.
• Penisringe kan ook bykomende ringe hê wat die testes beheer. Met ’n orgasme trek die testes gewoonlik stywer teen die man se liggaam saam net voordat ejakulasie plaasvind. Dié soort penisring hou die testes weg van die liggaam en maak dus die sensasie van die orgasme meer intens.
• ’n Penisharnas word om die penis en skrotum gedra. Dit het dieselfde doel as ’n penisring. Dit word gewoonlik verbind met BDSM-aktiwiteite, soos penis-en-testes-marteling. ’n Arabiese strop is een so ’n toestel.
• ’n Testesslot is ’n gewone slot wat om die testes gesluit word en hulle weghou van die liggaam af. Dit kan net verwyder word met ’n sleutel of kombinasie.
• ’n Penisbuis is ’n silindriese toestel wat oor die penis geplaas word met die doel om die stimulasie te verhoog van die persoon wat gepenetreer word. Hulle het dikwels sagte knoppies vir verdere stimulasie.
• ’n Penisverlengstuk is ’n gedeeltelik hol voorwerp wat soos ’n kort dildo lyk. Die hol kant word oor die punt van die penis geplaas om die penis te "verleng". Hulle word gewoonlik saam met kondome gebruik om te keer dat hulle tydens seks afval.
• ’n Penismou lyk soos ’n penisbuis, maar is aan albei kante oop sodat twee mans dit saam kan gebruik as ’n vorm van masturbasie of seks sonder penetrasie.

Tepelspeelgoed

• ’n Tepelklamp is ’n klamp wat die tepels stimuleer. Dit kan beheer word deur die mate van druk wat toegepas word.
• Suigtoestelle van rubber of glas kan ook oor die tepels geplaas word; dit laat die tepels swel en maak hulle sensitiewer. Met glastoestelle kan óf hitte óf ’n pomp gebruik word om die suigkrag te skep.

Anale speelgoed

• Anale proppe is gewoonlik korter dildo's wat in die anus geplaas kan word. Hulle het gewoonlik ’n plat agterkant om te keer dat die hele toestel in die anus opgetrek word. Hulle moet net deur een mens gebruik word weens die gevaar van MIV ander siektes wat deur die bloed oorgedra kan word. Hulle moet net vir die anus gebruik word en nie ook in ander openinge gesteek word nie om te verhoed dat skadelike bakterieë na ander dele van die liggaam oorgedra word. Hulle moet ook goed skoongemaak word.
• ’n Prostaatmasseerder het ’n vorm wat ideaal is om ’n man se prostaat te stimuleer – om gesondheidsredes of vir plesier.
• Anale krale bestaan uit ’n reeks balle wat aanmekaar vas is en een ná die ander in die anus gedruk word. Dit word dan uitgetrek, gewoonlik tydens orgasme om die klimaks te verhoog; die spoed wissel na gelang van die effek wat verlang word.

Vleesagtige materiale in seksspeelgoed

• Silikoon is sag en hipoallergenies, dit word maklik warm, is nie-poreus en maklik om met seep en water skoon te maak of te steriliseer. Wanneer speelgoed van silikoon gebruik word, moet silikoon- of silikoongebaseerde smeermiddels nie gebruik word nie, want dit kan die speelding beskadig. Daar is verskillende grade silikoon; dit is belangrik dat seksspeelgoed van mediese-graad-silikoon gemaak word.
• CyberSkin is ’n termiese plastiek-elastomeer wat baie soos regte vel voel. Dit kan maklik skoongemaak word met seep en water. Watergebaseerde smeermiddel is die beste saam met CyberSkin-speelgoed. Dit moet op ’n droë plek gestoor word.
• Lateks word algemeen vir seksspeelgoed gebruik; dit is buigbaar en goedkoop. Hoewel dit algemeen gebruik word, kan sommige mense allergies daarvoor wees. Lateks is poreus en moet goed skoongemaak word met ’n antibakteriese seep en water. Dit moet ook nie met ander mense gedeel word nie. Water- en silikoongebaseerde smeermiddels kan gebruik word, maar oliegebaseerde smeermiddels en petroleumjellie kan die speelding beskadig.

Sien ook

• Seks
• Masturbasie

Verwysings

1. Leung, Isaac (2009). "The Cultural Production of Sex Machines and the Contemporary Technosexual Practices". In Grenzfurthner, J. et al., eds. Do androids sleep with electric sheep? Critical perspectives on sexuality and pornography in science and social fiction. RE/SEARCH, ISBN 978-1-889307-23-7
2. Browne, Ray Broadus (1982). Objects of special devotion: fetishism in popular culture, p. 49 Popular Press, ISBN 978-0-87972-191-6
3. Barrett, Grant (2006). The official dictionary of unofficial English: a crunk omnibus for thrillionaires and bampots for the Ecozoic Age. McGraw-Hill Professional, ISBN 978-0-07-145804-7
4. McInnes, Gavin (2003). Vice Guide to Sex and Drugs and Rock and Roll (Sept.), p. 190