Sentraal Kalahari Wildreservaat
Die Sentraal Kalahari Wildreservaat (Tswana: Lefelo la diphologolo la Central Kalahari) is 'n uitgebreide nasionale park in die Kalahariwoestyn van Botswana. Die park is in 1961 gestig en beslaan 'n gebied van 52 800 vierkante kilometer ('n elfde van Botswana se oppervlakte), wat dit die tweede grootste wildreservaat ter wêreld maak.[1]
Die landskap is meestal plat of stadig golwend met bosse en gras wat die sandduine bedek, asook dele met groter bome. Baie van die riviervalleie is tot soutpanne gefossileer. Vier versteende riviere kronkel deur die reservaat, insluitend Deception Valley, wat 16 000 jaar gelede begin vorm het.[2]
Boesmans (die San) het die land vir duisende jare as nomadiese jagters bewoon.[3] Sedert die 1990's probeer die Botswana-regering om die Boesmans van die reservaat te verwyder, omdat hulle blykbaar 'n drein op finansiële hulpbronne is, ten spyte van hul inkomste uit toerisme. In 1997 is 'n driekwart van die San-bevolking uit die reservaat verskuif, en in Oktober 2005 het die regering hul gedwonge verskuiwing na kampe buite die park voortgesit, totdat slegs sowat 250 permanente inwoners oorgebly het.[2] In 2006 verklaar Botswana se hof die uitsettings onwettig en bevestig die Boesmans se reg om na die reservaat terug te keer. Die meeste Boesmans word egter toegang tot die park geweier. 'n Landswye verbod op jag het dit ook vir Boesmans onwettig gemaak om hul tradisionele jagter-versamelaar leefwyse te beoefen, ten spyte daarvan dat privaat wildplase jaggeleenthede aan toeriste bied.[4]
In 2014 is 'n diamantmyn (Ghaghoo-myn, wat deur Gem Diamonds bedryf word) in die suidooste van die reservaat geopen. Die maatskappy beraam dat die myn tot $4.9 miljard se diamante kan lewer.[5]
Van die diere wat hier voorkom: buffels, savanne-olifante, witrenosters, gevlekte hiënas, strandwolwe (bruin hiëna), ratels, graatjiemeerkatte, witkwasmuishonde, vlakvarke, jagluiperde, rooikatte, wildehonde, rooijakkalse, bakoorjakkalse, silwerjakkalse, luiperde, leeus, blouwildebeeste, bontkwaggas, elande, swartwitpense, gemsbokke, springbokke, steenbokke, rooibokke, koedoes, erdvarke, waaierstertmeerkatte, vlakhase, ystervarke, bobbejane, rooihartbeeste en volstruise.
Galery
[wysig | wysig bron]-
Swartpiek wat miere vreet. -
Kinders van die Kalahari. -
Grasdakgebou in die reservaat
Verwysings
[wysig | wysig bron]- ↑ Central Kalahari Game Reserve – Attractions – Tourism of Botswana
- ↑ 2,0 2,1 "Go2Africa.com" (in Engels). Go2Africa.com. Geargiveer vanaf die oorspronklike op 5 Julie 2012. Besoek op 24 September 2013.
- ↑ Central Kalahari Game Reserve – Botswana Geargiveer 19 Oktober 2007 op Wayback Machine
- ↑ Dixon, Robyn (28 Februarie 2015). "In Botswana reserve, Bushmen still being deprived of rights". Los Angeles Times.
- ↑ Miller, Jeff (5 September 2014). "Gem Diamonds Opens Its Underground Ghaghoo Mine". Diamonds.net (in Engels). Geargiveer vanaf die oorspronklike op 28 September 2014.
Eksterne skakels
[wysig | wysig bron]- Botswana se toerisme-webwerf
Wikimedia Commons het meer media in die kategorie Sentraal Kalahari Wildreservaat.
