Southern Gothic

Dikwels word die Suide voorgestel as 'n idilliese, betowerde wêreld
Maar orals gooi die verlede 'n skadu oor die hede.
Anne Rice, een van die bekendste verteenwoordigers van die genre, verbind New Orleans, as die argetipiese stad van Southern Gothic, met die vampiermite. Sy beskryf haar vampiere as elegante, tragiese, gevoelige karakters. Kritici sien hulle daarnaas as allegoriese simbole van isolasie, as wesens wat ontvreem is van die wêreld rondom hulle; wat tussen ons beweeg, maar gedoem is om buitestaanders bly, tot 'n punt waar die skryweres - en moontlik die leser - meer met hulle identifiseer as met hul slagoffers

Southern Gothic, ook Suidstate-Gotiek genoem, is 'n genre binne die Amerikaanse literatuur wat vanaf die vroeë 19de eeu as 'n selfstandige stroming binne die Gotiese literatuur van Engelssprekende lande begin ontwikkel het. Die handeling van Southern Gothic-romans speel in die Amerikaanse Suide as geografiese en kulturele ruimte af en is diep gewortel in hierdie streek se spanninge en dwalinge; dikwels word kwessies soos geweld, misbruik of armoede getematiseer. Kenmerkend vir die genre is enersyds elemente wat ontleen is aan Engelse Gotiese literatuur soos uitbeeldings van die irrasionele en die afgrondelike in die mens en sy vervreemding van die wêreld, oorweldig deur angs; sy geheime verlange en sy impulse kry dikwels gestalte in groteske karakters.

Andersyds bevraagteken Southern Gothic-literatuur die romantiese beeld van 'n bukolies-idilliese Suide, sy agrariese leefstyl en sy aristokraties-elegante plantasiesamelewing deur lig te gooi op sy skadukant: die ontkenning en onderdrukking van historiese realiteite soos slawerny, rassisme en geweldpleging binne 'n patriargale konteks. Die Suide se morele waardes word in 'n kritiese lig gesien, met 'n sin vir donker humor.

Eksterne skakels

[wysig | wysig bron]
Dagblad- en tydskrifartikels
Agtergrondinligting
Literêre toerisme