Thinis
Thinis of This (Egipties: Tjenoe) was die hoofstad van Antieke Egipte tydens die Vroegdinastiese Tydperk. Die stad is nog nie weer ontdek nie, maar word dikwels deur antieke skrywers genoem, onder andere die Egiptiese historikus Manetho. Hy het dit ’n stamkonfederasie genoem waarvan die leier, Menes (of Narmer), Bo- en Benede-Egipte verenig het en die land se eerste farao was.
Vanaf die 3de Dinastie, toe die hoofstad na Memphis geskuif is, het Thinis begin agteruitgaan. Sy ligging op die grens van die mededingende Herakleopolis en Thebe van die Eerste Oorgangstydperk en sy nabyheid aan sekere oases met moontlike militêre belangrikheid, het verseker dat Thinis nog ’n aansienlike rol gespeel het in die Ou Ryk en die Nuwe Ryk.
Hoewel die stad se presiese ligging onbekend is, is daar konsensus onder Egiptoloë dat dit in die omgewing van antieke Abydos en die moderne Girga was.[1][2][3]
Verwysings
[wysig | wysig bron]- ↑ Gardiner, Sir Alan Henderson ([1961] 1964). Egypt of the pharaohs: An introduction. Oxford: Oxford University Press. ISBN 978-0-19-500267-6.
{{cite book}}: Gaan datum na in:|date=(hulp) - ↑ Ryholt, K.S.B. (1997). The political situation in Egypt during the Second Intermediate Period, c. 1800 – 1550 BC. Kopenhagen: Museum Tusculanum Press. ISBN 87-7289-421-0.
- ↑ Strudwick, Nigel C. (2005). Texts from the pyramid age. Atlanta: Society of Biblical Literature. ISBN 978-1-58983-138-4.