Thompson-submasjiengeweer
Die Thompson-submasjiengeweer (ook bekend as die "Tommy Gun", "Chicago Typewriter", "Chicago Piano", "Trench Sweeper" of "Trench Broom") is 'n terugskop-aangedrewe, lugverkoelde, magasyn-gevoerde selektiewe-vuur submasjiengeweer. Dit is in 1918 ontwerp deur Brigadier-generaal John T. Thompson van die VSA weermag. Dit is oorspronklik ontwerp om die dooiepunt van loopgraafoorlogvoering tydens die Eerste Wêreldoorlog te breek, maar is eers voltooi nádat die oorlog beëindig is.
Die Thompson is gebruik deur die Amerikaanse Marinierskorps tydens die sogenaamde "Piesangoorloë",[1] asook die Verenigde State se Posinspeksiediens, die Ierse Republikeinse Leër, die Republiek van China en die FBI (na die Kansas City-slagting).
Die wapen is ook aan die algemene publiek verkoop. Omdat dit so maklik bekombaar was, het die Thompson gedurende die tydperk van die landswye verbod op alkohol berug geword as kenmerkende wapen van verskeie georganiseerde misdaadsindikate in die Verenigde State in die 1920's. Dit was destyds 'n algemene gesig in die media, en is deur beide wetstoepassers en misdadigers gebruik.[2]
Die Thompson is wyd in gebruik geneem deur die Amerikaanse gewapende magte tydens die Tweede Wêreldoorlog, en is ook wyd gebruik deur ander Geallieerde troepe tydens die oorlog. Sy hoofmodelle in hierdie tyd was die M1928A1, M1 en M1A1. Meer as 1,5 miljoen Thompson-submasjiengewere is tydens die Tweede Wêreldoorlog vervaardig.[3]
Dit is die eerste vuurwapen wat as 'n "submasjiengeweer" geëtiketteer en bemark is.[4] Die oorspronklike selektiewe-vuur Thompson-variante word nie meer vervaardig nie, hoewel talle semi-outomatiese siviele weergawes steeds deur die vervaardiger Auto-Ordnance vervaardig word. Hierdie modelle behou 'n soortgelyke voorkoms as die oorspronklike modelle, maar het verskeie modifikasies om aan Amerikaanse vuurwapenwette te voldoen.
Verwysings
[wysig | wysig bron]- ↑ Schroeder, Michael J. (2019-03-26), Digital Resources: The Sandino Rebellion Digital Historical Archive, Nicaragua, 1927–1934, Oxford University Press, doi:10.1093/acrefore/9780199366439.013.77, ISBN 978-0-19-936643-9, http://dx.doi.org/10.1093/acrefore/9780199366439.013.77, besoek op 2021-07-05
- ↑ Bearse 1994, p. 210.
- ↑ Iannamico, Frank (1999). The U.S. M3-M3A1 Submachine Gun. Harmony, Maine: Moose Lake Publishing. pp. 14, 55. ISBN 978-0-9701954-4-9.
- ↑ James, Gary (1996–2006). "Development of the Thompson Submachine Gun".
