Trappiste

Orde van Cisterciënsers van die
Streng Observansie

Afkorting Orde van Trappiste (O.C.S.O.)
Gestig 1892
Soort Katolieke godsdiensorde
Hoofkwartier Rome, Italië
Webtuiste www.ocso.org

Die Orde van Cisterciënsers van die Streng Observansie (O.C.S.O.: Ordo Cisterciensis Strictioris Observantiae) is ’n Katolieke godsdiensorde van peinsende kloosterlinge wat die Regula Benedicti volg. Hulle is ’n tak van die Orde van Cisterciënsers (Bernardyne) en word gewoonlik Trappiste genoem.

Daar is sowat 170 Trappistekloosters in die wêreld, wat ’n tuiste bied vir omtrent 2 100 monnike en 1 800 nonne.[1]

Geskiedenis

[wysig | wysig bron]

Die orde se naam is afgelei van La Trappe-abdy (of La Grande Trappe) in die Franse provinsie Normandië. ’n Hervormingsbeweging het in 1664 hier begin uit reaksie teen die verslapping van praktyke in baie Cisterciënsiese kloosters.[2] Die hervorming is gelei deur Armand Jean le Bouthillier de Rancé, ’n leek wat tussen 1660 en 1662 amptelik by die abdy aangesluit en in 1663 die ab daarvan geword het.[3] In 1892 het die hervormde "Trappiste" weggeskeur van die Orde van Cisterciënsers en met die goedkeuring van die pous ’n onafhanklike orde gestig.[4]

Kloosterlewe

[wysig | wysig bron]

Die Trappiste lewe volgens die Regula Benedicti van sint Benedictus, wat in die 6de eeu geskryf is en waarin die ideale en waardes van ’n kloosterlewe uiteengesit word.

"Streng observansie" dui op die Trappiste se doel om die Regula Benedicti streng te volg en die drie geloftes af te lê wat daarin uitgestippel word: stabiliteit, lojaliteit aan die kloosterlewe en gehoorsaamheid. Sint Benedictus se aandrang op min praat het in ’n mate ’n invloed op hul lewenswyse, hoewel hulle nie ’n gelofte van stilte aflê soos dikwels geglo word nie.[5] Trappiste praat gewoonlik net wanneer dit nodig is; ’n geklets word dus sterk ontmoedig. Volgens sint Benedictus versteur ’n gepraat ’n dissipel se stilte en ontvanklikheid, en dit kan hom in die versoeking lei om sy eie wil te volg in plaas van dié van God. ’n Gepraat wat lei tot onwelwillende vermaak en gelag, word as boos beskou en is verbode.[6]

’n Trappiste-gebaretaal, wat verskil van ander vorme van kloostergebaretaal, het ontwikkel sodat praat onnodig is. Maaltye word gewoonlik in algehele stilte genuttig omdat lede van die orde veronderstel is om na ’n voorlesing te luister.[7]

Trappiste eet nie die vleis van "vierpotige diere" nie, maar wel vis.[8] Hul maaltye bestaan hoofsaaklik uit "groente, bone en graanprodukte".[8]

Verwysings

[wysig | wysig bron]
  1. ↑ "Directory". Besoek op 8 Oktober 2015.
  2. ↑ M. Basil Pennington, OCSO. "The Cistercians: An Introductory History". The Order of Saint Benedict. Geargiveer vanaf die oorspronklike op 7 April 2010. Besoek op 1 Januarie 2008.
  3. ↑ "Catholic Encyclopedia: Jean-Armand Le Bouthillier de Rance" (in Engels). Newadvent.org. 1 Junie 1911. Geargiveer vanaf die oorspronklike op 23 Desember 2019. Besoek op 9 Maart 2011.
  4. ↑ OCist.Hu - A Ciszterci Rend Zirci Apátsága (31 Desember 2002). "History". OCist.Hu. Besoek op 9 Maart 2011.
  5. ↑ "OCSO.org FAQ".
  6. ↑ "OSB. Rule of Benedict : Text, English, Jan May Sep 3/3". Osb.org. 6 Mei 2006. Geargiveer vanaf die oorspronklike op 24 Mei 2011. Besoek op 9 Maart 2011.
  7. ↑ Rule of St. Benedict, c. 38: Reading must not be wanting at the table of the brethren when they are eating. Die 1949-vertaling deur eerw. Boniface Verheyen, OSB
  8. ↑ 8,0 8,1 Can I maintain my own dietary discipline as a Trappist?, Order of Cistercians of the Strict Observance, archived from the original on 4 November 2016, https://web.archive.org/web/20161104190741/http://www.trappists.org/visitor-questions/can-i-maintain-my-own-dietary-discipline-trappist, besoek op 23 Februarie 2017 

Eksterne skakels

[wysig | wysig bron]