Van Morrison

Van Morrison
Van Morrison tydens die Notodden Blues-fees in Noorweë in 2013
Agtergrondinligting
Geboortenaam	George Ivan Morrison
Gebore	31 Augustus 1945 Belfast, Noord-Ierland,  Verenigde Koninkryk
Genres	Rock · rhythm & blues · folk · blues · soul · Keltiese musiek · jazz · country · gospel
Beroep(e)	Sanger Liedjieskryfster Musikant Musiekvervaardiger
Instrumente	Stem, kitaar, harmonika, saxofoon, klawerbord, slagwerk, tamboerien, ukulele
Jare aktief	1958 tot hede
Etikette	Decca · Bang · Warner Bros. · London · Mercury · Exile · Polydor · Verve · Point Blank · Virgin · Universal · Blue Note · Lost Highway · Listen to the Lion · EMI · Manhattan · RCA
Assosiasies	Them
Webwerf	vanmorrison.com

Sir George Ivan "Van" Morrison, OBE^[1] (* 31 Augustus 1945 in Belfast, Noord-Ierland, Verenigde Koninkryk) is 'n Noord-Ierse sanger, musikant, liedjieskrywer en musiekvervaardiger. Vir sy musikale prestasies, sy bydraes tot die toerismebedryf en sy bevordering van weldadigheidsorganisasies in Noord-Ierland is Van Morrison in 2016 tot ridder geslaan.

Morrison, wat ook as "Van the Man" bekendstaan, het sy loopbaan reeds as tienerseun in die 1950's begin toe hy 'n verskeidenheid instrumente soos kitaar, harmonika, klawerbord en saxofoon vir verskeie Ierse musiekgroepe gespeel het wat destyds gewilde treffers opgevoer het. Teen die middel van die sestigerjare het Morrison bekendheid verwerf as hoofsanger van die Noord-Ierse rhythm & blues-groep Them. Een van hul liedjies, Gloria, het 'n klassieke pop-treffer geword.

Sy solo-loopbaan het begin met sy samewerking met Bert Berns, 'n Amerikaanse liedjieskrywer en musiekvervaardiger. Uit die samewerking het in 1967 die enkelsnittreffer Brown Eyed Girl voortgespring. Ná Berns se ontydige afsterwe - hy is op 30 Desember 1967 op die ouderdom van 38 aan hartversaking dood - het die platemaatskappy Warner Bros. Records Morrison se kontrak uitgekoop. Hy het die kans gekry om tydens drie sessies die album Astral Weeks op te neem. Die langspeler, wat deur kritici gunstig ontvang is, het aanvanklik swak verkoop.

Eers met Moondance (1970) het Morrison groter internasionale sukses behaal. Met 'n reeks langspelers en konsertoptredes het hy sy reputasie as een van die leidende popkunstenaars gevestig. Morrison het ook in die volgende dekades voortgegaan om albums vry te stel en konserttoere te onderneem. Soms het hy saamgewerk met ander groot name in die internasionale musiekbedryf soos Georgie Fame en The Chieftains.

Verwysings

1. Rayner, Gordon (13 Junie 2015). "Queen's Birthday Honours: Van Morrison knighted". The Daily Telegraph (in Engels). Telegraph Media Group. Geargiveer vanaf die oorspronklike op 5 Januarie 2020. Besoek op 11 Oktober 2017.