Vlag van Bahrein

Vlag van Bahrein

Vlag van Bahrein
Gebruik	Nasionale vlag en vaandel
Verhouding	3:5
Goedgekeur	14 Februarie 2002[1]
Ontwerp	Twee vertikale bane in wit aan die vlagpaalkant en rooi aan die wapperkant, geskei deur vyf wit driehoeke wat ’n sigsaglyn vorm.

Die nasionale vlag van Bahrein is op 14 Februarie 2002 in gebruik geneem. Die vlag vertoon twee vertikale bane in wit aan die vlagpaalkant en rooi aan die wapperkant, geskei deur vyf wit driehoeke wat ’n sigsaglyn vorm.

Simboliek

Die vyf punte van die sigsag wat na die wapperkant wys stel die Vyf Pilare van die Islam voor.

Ontwerp

Wit maak 32,5% van die vlag se oppervlak uit en rooi bedek die orige 67,5%.

Konstruksietekening

Geskiedenis

Die oudste bekende vlae van Bahrein was net rooi. In 1820 het Bahrein ’n verdrag met die Groot-Brittanje onderteken waarin bepaal is dat ’n wit baan tot die vlag toegevoeg sou word om die vredesooreenkoms aan te dui. In 1932 is die skeiding tussen die wit en rooi bane getand gemaak om die vlag van Bahrein van dié van sy bure te onderskei.^[2]

Die vlag het aanvanklik 28 punte in die sigsag gehad maar is in 1972 verminder tot agt.^[2] Op 14 Februarie 2002 is dit verder verminder tot vyf sodat elke punt van die sigsag die Vyf Pilare van die Islam sou voorstel.^[1]

• 
  Vlag van Bahrein voor 1820
• 
  Vlag van Bahrein, 1820 tot 1932
• 
  Vlag van Bahrein, 1932 tot 1972
• 
  Vlag van Bahrein, 1972 tot 2002

Gebruik

Wapperende vlag van Bahrein

Die vlag word op land en ter see as nasionale, burgerlike en oorlogsvaandel gebruik. In 2002 het Koning Hamad bin Isa Al Khalifa ’n dekreet ingevolge Wet 4 van 2002 uitgevaardig wat betrekking op die vlag het:

• Artikel 1: Die Vlag van die Koninkryk van Bahrein sal reghoekig wees en in twee hoofdele verdeel wees; die eerste in rooi en die ander in wit.
• Artikel II: Die Koning sal sy eie vlag hê waarvoor ’n koninklike bevel uitgevaardig sal word om die vorm, mates en plekke te bepaal.
• Artikel III: Die Vlag van die Koninkryk van Bahrein sal op die Koninklike Hof, Paleise, regeringsgeboue, openbare instellings, ambassades, Bahreinse buro’s in die buiteland en Bahreinse skepe vertoon word.
• Artikel IV: Elke nie-Bahreinse skip wat die territoriale water van die Koninkryk van Bahrein binnevaar sal die Vlag die Koninkryk vertoon en sal dit gehys hou totdat dit die territoriale gebied van Bahrein verlaat.
• Artikel V: Die Vlag sal op regeringsgeboue en openbare instellings vertoon word gedurende openbare vakansiedae van sonsopkoms tot sonsak.
• Artikel VI: Die Vlag van die Koninkryk van Bahrein sal nie op voertuie buiten amptelike protokolvoertuie vertoon word nie.
• Artikel VII: Die Vlag van die Koninkryk van Bahrein sal halfstok vertoon word wanneer ’n rouperiode aangekondig word.
• Artikel VIII: Die Vlag van die Koninkryk van Bahrein sal nie vir kommersiële doeleindes aangewend word nie.
• Artikel IX: In die geval dat die Vlag op ’n ander manier gebruik word en nie soos in die voorafgaande artikels nie, kan ’n maksimum straf van een maand, ’n boete wat nie BD 100 oorskry nie of albei opgelê word.^[1]

Ander vlae

• 
  Koninklike standaard van Bahrein
• 
  Vlag van die Bahreinse Verdedigingsmag
• 
  Vlag van die Bahreinse Koninklike Vloot
• 
  Vlag van die Bahreinse Lugmag
• 
  Vlag van die Bahreinse Weermag

Soortgelyke vlae

• 
  Vlag van Katar

Verwysings

1. "Bahrein" (in Engels). Flags of the World. Geargiveer vanaf die oorspronklike op 12 Oktober 1999. Besoek op 27 Mei 2019.
2. "Bahrein – Geskiedenis" (in Engels). Flags of the World. Geargiveer vanaf die oorspronklike op 5 November 2018. Besoek op 27 Mei 2019.

Eksterne skakels

Wikimedia Commons bevat media in verband met Vlae van Bahrein.

• (en) Bahrein by Flags of the World.
• (en) "Flag of Bahrain". Encyclopædia Britannica. Besoek op 27 Mei 2019.