Ysergebergte
Die Ysergebergte (Duits Isergebirge, Tsjeggies Jizerské hory, Pools Góry Izerskie) is die mees westelike gedeelte van die Sudete-bergreeks en vorm die verbinding tussen die Duitse Zittause Gebergte en Lausitzer Gebergte en die Pools-Tsjeggiese Reusegebergte.
Die Ysergebergte loop deur die grensgebied tussen Pole en Tsjeggië (net soos in die geval van die Reusegebergte is die groter deel van die bergstreeks aan die Tsjeggiese kant van die grens geleë). Dit is die brongebied van drie riviere - Jizera (Duits Iser), Queis en Lausitzer Neiße. Die Jizera vorm ook die grenslyn tussen Pole en Tsjeggië.
Die hoogste punte in die Ysergebergte is effens hoër as 1 100 meter. Die bekendste bergpiek, Smrk (Duits Tafelfichte, 1 124 m) is naby die grens geleë. Die Jizera ontspring aan sy voet. Die bergkam Wysoki Grzbiet (Hoher Iserkamm) aan die Poolse kant van die grens loop vanuit die Smrk tot by die hoogste bergpiek in die reeks, Wysoka Kopa (Hinterberg, 1 126 m).
Die Ysergebergte bestaan net soos die Rotsgebergte hoofsaaklik uit graniet en vorm met sy hoë neerslae 'n soort reuse-waterreservoir. Die reënwater word deur uitgestrekte nat, sponsagtige turf-moeras feitlik opgesuig. In die moerasgebiede ontspring dan 'n verskeidenheid klein bergriviere wat òf in die Jizera òf in die Lausitzer Neiße uitmond. Aangesien die Jizera deel uitmaak van die Elbe-stroomgebied en die Lausitzer Neiße in die Oder uitmond, vorm die Ysergebergte 'n waterskeiding tussen Noord- en Oossee.
Eksterne skakels
[wysig | wysig bron] |
Wikimedia Commons bevat media in verband met Ysergebergte. |
