Anthemios von Tralleis
Dr Anthemios vo Tralleis (* z Tralleis (hüte Aydın) in Lüdie in dr 2. Helfti vom 5. Joorhundert; † vor 558, woorschinlig z Konstantinopel) isch e spootantike Mathematiker, Gleerte und Archidekt gsi.
Lääbe und Wärk
[ändere | Quälltäxt bearbeite]Dr Anthemios isch dr Soon vom ene Arzt gsi, wo Stephanos ghäisse het, und het as en usgezäichnete Mathematiker gulte, het aber as Archidekt no gröösseri Erfolg chönne fiire. So het er vo 532 bis 537 im Ufdraag vom oströmische Kaiser Justinian I. zämme mit em Isidor vo Milet d Chille Hagia Sophia z Konstantinopel baut.
Dr Gschichtsschriiber Prokopios brichdet, ass bäidi Archidekte d Läitig vo de Arbäite ghaa häige. Dr Anthemios het s Modäll gmacht, und dr Paulos Silentiarios verzelt, ass sich dr Anthemios vor allem mit de Fundamänt befasst häig. Wo d Kupple im Mai 558 iigstürzt isch, het dr Anthemios scho nüme gläbt.
Dr Anthemios isch under anderem vom Agathias hooch globt worde, und dr Justinian het iim und im Isidor au no anderi Ufdrääg gee. So häige si zum Bischbil sälle e Wääg finde zum d Überfluetige bi dr Festig Dara-Anastasiupolis z stoppe.
Litratuur
[ändere | Quälltäxt bearbeite]- John Martindale: The Prosopography of the Later Roman Empire. Bd. 3. Cambridge 1992, S. 88f.
- The Oxford Dictionary of Byzantium. Bd. 1, S. 109.
|
Dä Artikel basiert uff ere fräie Übersetzig vum Artikel „Anthemios_von_Tralleis“ vu de dütsche Wikipedia. E Liste vu de Autore un Versione isch do z finde. |