Artur Mas

Artur Mas, 2015

Dr Artur Mas i Gavarró (* 31. Jänner 1956 z Barcelona) isch e katalanische Bolitiker un Generalsekretär vu dr Bartei Convergència Democràtica de Catalunya (CDC). Säll isch e liberali Bartei, wu fir d Abspaltig vu Katalonie vu Spanie isch. Är isch em 23. Dezämber 2010 zum 129. Presidänt vu dr katalanische Generalitat gwehlt wore, dr Gsamthait vu dr bolitische Inschtitutione, wu im Rame vum Autonomystatuts d Sälbschtverwaltig vu dr Autonome Gmainschaft Katalonien uusiebt. Dervor isch er syt em 27. Mai 2004 Oppositionsfierer im katalanische Barlemänt gsii.

Dr Mas isch as eltscht vu vier Chinder in erte großburgerlige Familie ufgwachse. Sy Mueter isch us ere Textil-, sy Vater us ere Metallinduschtriällefamilie. Är isch uf s Lycée Français gange un het derno Bedribs- un Volkswirtschaft studiert. Mit 26 Johr isch er in d Convergència i Unió yydrätte.

Är isch vu 1987 bis 1995 im Stadtrot vu Barcelona ghockt un isch syt 1995 Mitglid vum katalanische Barlemänt. Vu 2001 bis 2003 isch er Conseller en Cap gsii, wu uugfehr eme Minischterbresidänt entspricht.

Bi dr Wahle vum 28. Novämber 2010 het d CiU mit em Artur Mas as Spitzekandidat 62 vu dr 135 Sitz gwunne. Am 23. Dezämber isch er zum 129. Bresidänt vu dr Generalitat gwehlt wore. Im Jänner 2016 isch er vom Carles Puigdemont, wo äbefalls für di katalanische Unabhängigkeit vu Spanie yystoht, abglöst worde.

[ändere | Quälltäxt bearbeite]
 Commons: Artur Mas – Sammlig vo Multimediadateie