Basel Sinfonietta

Dialäkt: Baseldütsch

S Orchester basel sinfonietta isch 1980 vo junge Musiker gründet worde. Iir Ziil isch s, zitgenössischi Muusig, bekannti, nöiji und experimentelli Wärk eme offene Publikum in nöije Zämmehäng z vermiddle.

Organisazioon und Sälbstbestimmig

D basel sinfonietta het het vo Aafang aa beschlosse, ass sie e demokratischs Orchester well si. Die Idee isch dennzumol as öbbis Nöis aagluegt worde. Alli wo mitgmacht häi, häi mit iirem Idealismus und iirem Angaaschemänt drzue biidräit, ass d basel sinfonietta in däm Sinn bis hüte überläbt het. Si isch bis jetzt s äinzige Orchester in dere Gröössenornig in dr Schwiz, wo sich sälber verwaltet und kä Arbetgääber het.

Brojekt

Für iiri Brojekte stellt d basel sinfonietta renommierti Gastdirigänte aa, wie dr Stefan Asbury, dr Fabrice Bollon, dr Mark Fitz-Gerald, dr Emilio Pomàrico, dr Steven Sloane oder dr Jonathan Stockhammer. Si bringt jöörlig fümf bis säggs Äigebrodukzioone uuse, wo si as Konzärtveraastaltere zämme mit lokale Veraastalter in dr ganze Schwiz und au im nooche Usland uffüert. Si bechunnt Iilaadige zu vile Festival in dr Schwiz und im Usland, was bewiist, ass si en intressants Elimänt in dr schwizerische Kulturlandschaft isch. S Orchester isch scho an dr Biennale di Venezia ufdräte, de Dääg für Nöiji Muusig Züüri, de Internationale Feriekürs für Nöiji Muusig Darmstadt, de Kunstfestspiil Herrehuuse, am Festival d’Automne Paris, am Kunstfest Weimar und e baar Mol am Lucerne Festival. D basel sinfonietta isch s äinzige Schwizer Orchester, wo vier Mol zu de Salzburger Festspiil iiglaade worde isch.

D Finanzierig

S Büdsche vo dr basel sinfonietta stoot uf öbbe CHF 2 Millione. Do drvo si CHF 500'000 kantonali Subwenzioone und Gälder vo dr Gmäind; CHF 500'000 chömme vo Sponsore, Stifdige, vo Gönner und vo de Mitgliiderbiidrääg vom Förderveräin; CHF 1'000'000 verdient d basel sinfonietta diräkt. D Muusiker si gliichzitig au Mitgliider.

Weblingg

baselsinfonietta.ch

Dä Artikel basiert uff ere fräie Übersetzig vu dere Version vum Artikel „Basel_Sinfonietta“ vu de dütsche Wikipedia. E Liste vu de Autore un Versione isch do z finde.