Basilika des Heiligen Antonius (Padua)

d Basilika vom heilige Antonius
d Chile vo dr Syte

D Basilika vom Heilige Antonius isch e Chile z Padua. Si isch eini vo de berüemtischte Chilene vo Italie und chunt us dr Zyt, wo d Architekte nodisno vo dr romanische zu dr gotische Bouwys hi ggange sind.

d Gschicht vom Bou

[ändere | Quälltäxt bearbeite]

D Chile isch vo 1232 bis 1310 dört, wo dr heilig Antonius vo Padua z’letscht gläbt het, higstellt worde zum es schöns Dänkmol für iin z haa. Dr Franziskanermönch Antonius het z Padua es Chlooschter gründet; er isch als Prediger wytume so beliebt gsi, ass en dr Papscht chuum eis Joor sid denn, won er gstorben isch, ane 1332 scho zum Heilige vo dr katolische Chile usgruefe het. Und do het me z Padua sofort agfange bi sym Grab die Chile boue; zerscht isch das en eifachi romaneschi Predigerchile gsi, aber mit dr Zyt sind Syteschiff, Kapälle, 8 Chupple und Gloggedürm drzue cho; dr nöi Chor isch ane 1310 fertig gsi.

I dr Barockzyt isch bim Chor no d ”Schatzkapäll“ drzuecho. Dört drinn wärde die choschtbarschte Objäkt vo dr Chile ufbewahrt; das sind d Relikwie vom heilige Antonius: syni Zunge, Deili vo syne Stimmbänder und dr Underchifer – also die Orgaan vo sym Körper, wo mit em legendääre Predige z’tue händ. D Phälter für die Sache, d Relikwiaar, sind us em 14. und em 15. Joorhundert.

i dr Chile dinn

[ändere | Quälltäxt bearbeite]

I dr Chile het’s romanischi und gotischi Architekturdeili und choschtbari Kunschtwärch, öpe d Figure, wo dr Donatello gmacht het. S grosse ufghänkte Kruzifix vom Donatello zelt zu de Meischterwärch vo dr Renaissance. E Lüüchter us Bronze isch vo ane 1515.

Im 14. Joorhundert isch uf dr rächte Syte d Kapälle vom heilige Jakobus drzue choo; wo d Basilika ane 1503 d Relikwie vom Papscht Felix übercho het, het me dere Sytekapälle dr nöi name Felixkapälle ggää.

Uf dr lingge Syte isch d Kapälle vo dr Schwarze Madonna (Cappella della Madonna mora), wo a dr Wand Relief us Marmor het, wo öpis us em Läbe vom heilige Antonius zeige. D Orgele vo dr Chile isch vo 1929.

Bi dr Basilika het’s es eigets Chilemuseum, s Museo antoniano di arte sacra.

[ändere | Quälltäxt bearbeite]
 Commons: Basilika vom Heilige Antonius – Sammlig vo Multimediadateie