Beastie Boys

Dr Ad Rock, dr MCA und dr Mike D

D Beastie Boys sin e Hip-Hop-Trio us Brooklyn, New York gsii. Di drey 'Boys' sin dr MCA (Adam Yauch), dr Mike D (Michael Diamond) und dr Ad Rock (Adam Horovitz) gsii. Nach em Tod vom Adam Yauch im Mai 2012 hed sich d Band ufglöst.

Iri erschti LP isch in Zämenarbet mit em Rick Rubin und z. T. Run DMC entschtande. Das hed drzue gfiert, das "Licensed to Ill" (1986) so vil Heavy Metal Samples wi kai anderi Rap-LP zu däre Zyt gha hed. Aagfange hän d Beastie Boys als Punk-Gruppe; dr Rock-Yfluss isch also e ganz natürligi Sach gsi. Uf irer zwaite LP, "Paul's Boutique", broduziert gröschtedails vo de Dust Brothers, hets zwoor weniger Rock-Yflüss druf gha, aber drfür gilt die LP allgemain als Sampling-Gsamtkunschtwärk. Uf "Check your Head" hets Live-Inschtrumänt druf und au wider me Rock-Yflüss - zu däre Zyt hän au immer mee anderi Bands aagfange, Rock und HipHop z vermische, was letschtlig zum ene neue Stil names Rapcore gfiert hed. Au iri Punk-Wurzle hän d Beastie Boys scho bald wider entdeckt ("Sabotage", "Heart Attack Man"), und uf "Hello Nasty" hän si sich sogar mit brasilianischer Musig versuecht. "To the 5 Boroughs" schliesslig isch wider wi "Paul's Boutique" e rains Rap-Album; dasmol zum erschte Mol vo de Beastie Boys in Aigeregie broduziert. Ufffallend isch der schtarke Old School-Yfluss.

Diskografy

• 1986 Licensed to Ill
• 1989 Paul's Boutique
• 1992 Check Your Head
• 1994 Ill Communication
• 1998 Hello Nasty
• 2004 To the 5 Boroughs
• 2007 The Mix-Up
• 2011 Hot Sauce Committee Part Two

Weblink