Dr Bluetkräislauf oder Kräislauf isch s Ströömigssüsteem vom Bluet, wo vom Härz und, wenn vorhande, vom ene Netz us Bluetgfääss (kardiowaskulärs Süsteem) bildet wird. In dr Umgangssprooch säit men em au d Bluetbaan, in dr Fachsprooch au Bluetgfäässsüsteem. Bi Dier, wo d Organ von ene vo Hämolymphe statt vo Bluet versorgt wärden, redet mä au vom ene Kräislauf.
Bi mängge Grubbe vo vilzällige Dier hängt s Überlääbe vom Organismus vom Kräislauf ab, wo dr Stoffwäggsel vo jedere äinzelne Körperzälle mööglig macht und ass die chemische und füsiologische Äigeschafte vo de Körperflüssikäite erhalte bliibe. S Bluet nimmt in de Lunge Suurstoff uf und dransbordiert en zu de Zälle, wo iirersits Chooledioxid in s Bluet abgääbe, wo denn in d Lunge dransbordiert und dört usgschnuuft wird. Es nimmt au d Näärstoff wie Fett, Zucker oder Äiwiss us em Verdauigsdrakt uf und dransbordiert sä in die äinzelne Gwääb, wo si je noch Bedarf verbrucht, witerverarbäitet oder gspiicheret wärde. D Stoffwäggsel-- oder Abfallbrodukt, wo entstöön, wie zum Bischbil Harnstoff oder Harnsüüri) wärde denn in anders Gwääb oder zu de Usschäidigsorgan (Niere und Dickdarm) dransbordiert. Usserdäm verdäilt s Bluet au Botestoff wie zum Bischbil Hormon, Zälle vo dr Körperabweer und Däil vom Grünnsüstem innerhalb vom Körper.
S Bluet wird dur Bluetgfääss (latiinisch-anatomisch Vas sanguineum) oder Oodere dransbordiert. Das si Struktuure in dr Form vo Rööre, wo drfür sorge, ass s Bluet bis in d Periferii vom Körper chunnt und denn wider zrugg zum Härz. Mä underschäidet grob zwüsche Schlaagoodere, wo s Bluet us em Härz in d Körpergwääb läite, Weene, wo s Bluet zrugg zum Härz dransbordiere, und de munzige Kapillare, wo in de mäiste Organ und Gwääb e Netzwärk bilde und s Süsteem vo de Schlagoodere mit däm vo de Weene verbinde und wo für e Stoffusdusch verantwortlig si.
Dä Artikel basiert uff ere fräie Übersetzig vu dere Version vum Artikel „Blutkreislauf“ vu de dütsche Wikipedia. E Liste vu de Autore un Versione isch do z finde. |