Boris Johnson

dr Boris Johnson (2019) dr Boris Johnson

Dr Alexander Boris de Pfeffel Johnson (* 19. Juni 1964 z New York City, USA) isch e britische Publizischt, Bolitiker vu dr Conservative Party un vum 24. Juli 2019 bis am 6. Septämber 2022 Premierminischter vum Verainigte Chenigrych gsi.

Vu 1999 bis Dezämber 2005 het dr Johnson s konservativ Nochrichtemagazin The Spectator uusegee. Syter 2015 verdritt er dr Wahlchrais Uxbridge and South Ruislip im Weschte vu Greater London im Unterhuus, wun er vu 2001 bis 2008 scho fir dr Wahlchrais Henley aagheert ghaa het. Vu Mai 2008 bis Mai 2016 isch er Burgermaischter vu London un vu Juli 2016 bis Juli 2018 britische Usseminischter gsii.

Dr Johnson het d Kampagne fir e EU-Uusdritt vum Verainigte Chenigrych vor em Referändum am 23. Juni 2016 aagfiert. Dodmol het er as ain vu dr Favorite fir d Noofolg vum Premier David Cameron gulte, isch aber glyych nid i d Chränz chu. Wu speeder d Premierminischterin Theresa May denn aber e Raie Abstimmige im Barlamänt verlore het und drum zrugdrätten isch, isch er am 23. Juli 2019 denn doch no zum Barteifierer vu dr Conservative Party gweelt woore. Ai Dag speter het er s Amt as Premierminischter ibernuu. In dr vorzogne Wahle vum Underhuus vum 12. Dezämber 2019 hed er e großi Mehrheit überchoo.

Noch ere Raie vu Skandäl het er si schließli im Summer 2022 barat erchlärt, vu sym Amt zrugzdrätte. Sy Nochfolgeri isch d Liz Truss wore.

Dr Johnson isch syt Mai 2021 in dritter Eh ghyrote mit dr Carrie Symonds (* 1988). Si hän zäme ne Suhn un e Dochter. Dervor isch er vu 1987 bis 1993 mit dr Allegra Mostyn-Owen ghyrote gsii. Us dr Eh mit dr Marina Wheeler (1993 bis 2018) sin zwee Sihn un zwoo Dechtere firigange. Derzue het dr Johnson e unehligi Dochter, wu 2009 uf d Wält chuu isch.

Literatur

[ändere | Quälltäxt bearbeite]
  • Andrew Gimson: Boris: The Rise of Boris Johnson. Simon & Schuster, London 2006, ISBN 0-7432-7584-5.
  • Sonia Purnell: Just Boris: Boris Johnson: The Irresistible Rise of a Political Celebrity. Aurum Press Ltd., London 2011, ISBN 978-1-84513-665-9.
[ändere | Quälltäxt bearbeite]
 Commons: Boris Johnson – Sammlig vo Multimediadateie